Ol Fas Fasfala Woman blong Restoresen
Gat Tras long Lod
From se Meri An Yang i save Lod tru long olgeta skripja, dip fet blong hem i kipim ol filing blong hem i “kwaet tru long ol strong hariken.”1
Meri An Anjel i laki blong save groap long wan hom we skripja stadi i kam faswan. Hem i laekem tumas ol tijing blong Sevya.2 Hem i lanem eli long laef blong hem se hem i save harem voes blong Lod tru long ol skripja mo fanem pis long ol tijing blong Hem.
Hem i harem oli prijim gospel blong Jisas Kraes we i bin kambak long Rod Aelan, YSA, long 1831, mo afta we hem i ridim Buk blong Momon, Meri An i bin konvet i kam long gospel.
Hem i muv i go long Ketlan, Ohaeo long 1833, mo long ples ia hem i mitim Brigham Yang, mo maredem hem long stat blong 1834. Blong nekis 48 yia, tru long plante muvmuv mo hadtaem, Meri An Anjel Yang i gohed blong harem Lod tru long ol skripja mo putum tras blong hem we i no muvmuv long Lod.
Eksampol, hasban blong hem i go long wan misin long Inglan long 1839, 10 dei nomo afta we hem i bonem gel blong tufala, Alis. Long 20 manis we i bin folem, Meri An mo ol sikis pikinini blong tufala oli bin fesem i had. Oli bin safa from sik mo stap laef long kon bred nomo, melek mo sam vejetebol blong garen.3 Meri An i bin faenem wan smol wok blong sapotem famli blong hem mo blong tekem kea long hemwan mo ol smol pikinini blong hem. Yet, Lod i helpem olgeta tru long ol hadtaem ia. “Hemia i wan gudfala samting,” hem i raet long hasban blong hem, blong “gat tras long Lod.”4
Meri An i stap dipen long save blong hem long skripja, mo i stap kam blong andastan wetem wan tru tingting se oltaem Lod i bin stap wetem hem, lavem hem mo andastanem hem, speseli long ol plante hadtaem blong hem. “Bae Lod i daerektem yumi long evri samting mo toktok pis long ol bigfala taem blong tes mo tudak” i bin prea blong hem.5