Papa long Heven I Wantem Yumi blong Gobak long Hem
I Kam long Elda Ulisses Soares
Blong Kworom blong Olgeta Twelef Aposol
Maet yu stap bin wokbaot longtaem lelebet long rod ia we i gobak long Papa long Heven bitim wanem we yu ting long hem.
Papa mo mama blong mi, Aparecido mo Mercedes Soares, oltaem tufala i drim blong givim seves long wan misin. Oli wantem blong pembak Lod from ol plante blesing we i bin kam long famli blong olgeta stat long taem we oli bin joenem Jos. Ansa blong olgeta i bin kam long 1989 taem we oli bin akseptem wan koling blong givim seves long Sao Paolo Brasil Temple.
Sam manis i pas nomo long misin blong tufala, papa blong mi i bin safa long wan hat atak mo lusum laef blong hem. Long taem blong fenerol blong hem, mi haggem mama blong mi taem mitufala i stap stanap long fored blong kofin blong papa blong mi.
“Mama, ?wanem nao nekis samting bae yu mekem?” Mi askem.
“Papa blong yu mo mi i bin drim long misin ia,” hem i ansa. “Mi stap givim seves naoia, mo bae mi gohed blong givim seves—blong hem mo blong mi.”
Wan presiden blong tempol we i kaen, i givim wok long wan narafala wido blong stap olsem kompanion blong mama blong mi, mo mama blong mi i gohed long misin blong hem blong ova 20 manis. Misinari seves blong mama i blesem hem, mo fet mo eksampol blong hem i blesem famli blong mi mo mi.
Long taem blong misin blong hem, tu(2) brata blong mi tu i bin ded, mo mi mo waef blong mi i bin lusum tu pikinini blong mitufala. Fasbon pikinini i bin bon eli bifo long stret deit blong hem mo i smol tumas mekem se i no save laef, mo mitufala i lusum sekenwan from i lusum laef blong hem insaed long bel blong mama blong hem. Long taem we famli blong mifala i stap go tru long ol hadtaem ia, mama blong mi i stap long tempol evri dei blong stap gohed blong mekem fet blong hem i strong oltaem—mo stap mekem fet blong mifala tu i kam strong moa—long plan blong fasin blong sevem man.
Fet blong hem long wan kam tugeta bakegen we i gat bigfala glori wetem papa blong mi, mo promes ia blong laef we i no save finis insaed long ples we Papa blong yumi long Heven i stap long hem, mo hemia i bin sapotem hem blong 29 yia olsem wan wido kasem en blong ol dei blong hem, taem hem i gat 94 yia.
Plan Ia blong Stap Glad
Yumi kasem blesing olsem Ol Lata-dei Sent blong save se gospel i bin kambak long wol ia. Plan blong fasin blong sevem man i “bigfala plan blong hapines” (Alma 42:8). Long olgeta we oli stap tru mo stap fetful, plan ia i promesem wan praes we i nogat en insaed long ples we God i stap long hem.
Olsem we i stap insaed long Doktrin mo Ol Kavenan tru long revelesen, kolosap evri pikinini blong Papa long Heven bae oli go insaed long wan kingdom blong glori. Tru long Atonmen blong Sevya, olgeta ia we bae oli girap “long taem blong laef bakegen long ded blong olgeta we oli stret” (Doktrin mo Ol Kavenan 76:17) bae oli mekem olgeta oli kam stret evriwan mo kasem selestial glori.
Plante long ol memba blong Jos Ia blong Jisas Kraes blong Ol Lata-dei Sent oli akseptem doktrin ia. Be sore tumas, sam oli no bilivim se hemia i blong laef blong olgetawan tu. Oli mekem ol mistek. Progres blong laef blong olgeta long saed blong spirit, i stap gro, be i slo. Oli stap askem olgetawan sapos bae oli save gud inaf blong kasem selestial kingdom.
Sapos yu faenem yuwan insaed long grup ia, tingbaot toktok blong Lod we i go long wan narafala grup blong ol man we oli bin biliv: “Leftemap hed blong yufala mo yufala i glad, from mi save kavenan we yufala i bin mekem wetem mi.” (Mosaea 24:13).
God i lavem yumi mo i wantem yumi blong gobak long ples we Hem i stap long hem. Maet yu stap wokbaot longtaem finis long rod ia we i gobak long Papa long Heven bitim wanem we yu ting long hem.
“Stret mo Tru”
Long Doktrin mo Ol Kavenan 76, Lod i talemaot olsem wanem ol pikinini blong Hem oli save kasem selestial kingdom. Sapos yu wan memba blong Jos mo yu gat wan testemoni, yu bin stat blong wokbaot long rod ia blong yu finis, olsem we Doktrin mo Ol Kavenan i tokbaot:
-
Yumi mas “kasem testemoni long saed blong Jisas” mo biliv “long nem blong hem” (ves 51).
-
Yumi mas baptaes andanit long wota (luk long 51).
-
Yumi mas “kasem Tabu Spirit tru long fasin blong putum han antap long hed” tru long wan we i gat prishud atoriti (ves 52).
Be i gat ol narafala step we oli tekem wan ful laef blong traehad from, mo sam memba oli slakem tingting taem oli stap mekem ol mistek mo no kasem ol gol blong olgeta. Yumi evriwan i stap wok long ol impoten samting ia we yumi mas mekem. Tangkyu long Atonmen blong Jisas Kraes, from tru long hemia, yumi evriwan i save kasem olgeta samting ia:
-
Obei long ol komanmen mo blong oli “wasemaot mo klinim [yumi] long evri sin blong [yumi]” (ves 52).
-
“Oli win tru long fet,” (ves 53).
-
Oli kasem “Tabu Spirit blong promes i silim olgeta” (ves 53), we i Tabu Spirit, we i stap witnes “i go long Papa se ol odinens blong sevem [yumi], oli bin mekem i stret mo ol kavenan we oli go wetem, yumi bin folem.”1 Papa i promesem siling ia “long olgeta evriwan we oli stret mo tru” (ves 53).
Blong stap “stret mo tru,” Presiden Esra Taft Benson(1899–1994) i bin talem, hem i “ wan stret wei blong olgeta we oli gat strong tingting mo no fraet blong soem testemoni blong olgeta long Jisas. Oli gat strong paoa long tingting blong faet from trutok mo fasin blong stap stret mo gud. Olgeta ia, oli ol memba blong Jos we oli givim ona long ol koling blong olgeta insaed long Jos (luk long D&K 84:33), oli pem taeting mo ol ofring blong olgeta, oli laef long wan klin fasin, oli givim sapot long ol lida blong Jos tru long toktok mo aksen, oli obei long Sabat olsem wan tabu dei, mo oli obei long evri komanmen blong God.”2
Blong kasem digri o ples we i moa hae insaed long selestial kingdom, we oltaem oli stap tokbaot olsem fasin blong kam olsem god, i gat wan las samting we wan i mas mekem. Yumi mas kam insaed long “kavenan blong mared we i niu mo i no gat en” (Doktrin mo Ol Kavenan 131:2.), we i tekem ples insaed long tempol, mo olgeta we oli gat stret prishud atoriti nao oli mekem. Tru long plan blong sore blong Papa long Heven, yumi save se ol selestial blesing bae i go long olgeta we oli nogat janis blong kasem ol odinens blong siling long tempol long laef ia be oli bin stap strong blong stap fetful kasem en.
Yumi lanem se evri pikinini blong God we oli stap obei long ol komanmen blong Hem oli fetful, i nomata long ol situesen blong laef, bae oli kasem blesing mo “bae oli go insaed long heven, blong mekem se oli save stap wetem God long wan ples blong hapi we i neva gat en” (Mosaea 2:41). Insaed long plan blong fasin blong sevem man, we i gat sore mo lav, we i kam long Papa blong yumi long Heven, oltaem i gat hop we i blong yumi yusum.
Blesing blong Fasin blong Sakem Sin
Foto I Kam long Hyun Lee
Profet blong yumi we yumi lavem tumas, Presiden Russell M. Nelson i bin tijim se: “Lod i no askem blong yu kam stret evriwan naoia, long taem ia blong progres blong yumi long laef we i no save finis. Be Hem i askem yumi blong stap kam antap long fasin blong kam klin evriwan. Blong sakem sin evri dei, i rod blong folem blong kam klin evriwan, mo fasin blong stap klin evriwan i tekem paoa i kam.”3
Presiden Nelson i bin talem tu se “paoa blong mekem mo stap gud moa evri dei” i tekem i kam long yumi “paoa we i mekem yumi kam strong.”4 Taem yumi yusum paoa we i mekem yumi kam strong agensem man o woman we i folem fasin blong wol (luk long Mosaea 3:19), yumi kam moa kolosap long rod ia we i gobak long Papa.
From se i no gat samting we i no klin we i save stap long ples we God i stap long hem (luk long Moses 6:57), yumi wok evri dei blong traehad blong jenisim fasin yumi long saed blong spirit—insaed long ol tingting blong yumi, ol filing blong hat, mo ol wei we yumi stap mekem samting. Folem ol toktok blong Aposol Pol, yumi lukaotem blong kam wan niufala man long Kraes, we sloslo, bae ol fasin blong olfala laef blong yumi bifo oli finis, nao laef blong yumi i kam niuwan olgeta. (luk long 2 Korin 5:17). Jenis ia bae i kam laen folem laen taem yumi traehad blong mekem mo stap gud moa evri dei
Blong stap folem Sevya mo traem blong kam olsem Hem, i wan rod blong mas blokem ol samting we yu nomo yu wantem, we oli tokbaot olsem se i blong yu mas karem kros blong yuwan (luk long Matiu 16:24–26). Yumi tekem kros blong yumi antap long yumi taem yumi:
-
Kontrolem ol filing blong hat, kontrolem ol samting we bodi i wantem, mo ol samting we yumi laekem tumas.
-
Wetem longfala tingting, yumi “stap biaen long evri samting we Lod i tingting blong putum long” yumi (Mosaea 3:19).
-
Tanem baksaed blong yumi long evri fasin we i no olsem blong god (luk long Moronae 10:32).
-
Mekem tingting blong yumi i stap biaen long wanem we Papa i wantem, olsem we Sevya i bin mekem.
?Mo wanem nao yumi mekem taem yumi foldaon? Yumi tanem yumi i go long Papa mo askem Hem blong “sevem [yumi] tru long atonmen mo blad blong Kraes blong [Hem ] i save fogivim ol sin blong [yumi]”Mosaea 4:2 Bakegen, yumi traehad blong winim ol samting we yumi no strong long olgeta mo lego sin fogud. Yumi prea from gladhat, we i paoa blong mekem samting mo hiling long saed blong spirit, we i kam long Jisas Kraes.5 Yumi karem kros blong yumi mo statem bakegen wokbaot blong yumi, i nomata sapos i wan longfala mo had rod , we i go kasem promes graon long ples we Tufala i stap long hem.
Trastem Ol Promes blong Hem
Fasin blong nomo save ded mo laef we i no save finis, blong yumi, oli wok mo glori blong God (luk long Moses 1:39). Wok blong yumi blong kasem glori ia, i blong gat strong testemoni taem yumi stap laef long wol ia.
Long visen, profet Josef Smit i luk olgeta we, olgeta we oli stap fetful “bambae oli winim evri samting” (Doktrin mo Ol Kavenan 76:60). Samtaem afta, hem i talemaot se: “Evri jea blong king mo ples we hem i rul, ol ples blong prins i rul mo ol paoa, bae mi soemaot mo givim long olgeta evriwan we oli bin stap strong wetem strong tingting from gospel blong Jisas Kraes” (Doktrin mo Ol Kavenan 121:29).
Taem yumi trastem ol promes ia, bae yumi no givap long yumiwan, long olgeta we yumi lavem o long ol nara pikinini blong God. Bae yumi traehad blong mekem bes blong yumi mo helpem ol narawan blong mekem semmak. Taem yumi mekem yumiwan, bae i no gat wan long yumi we bae i gud inaf blong Lod i sevem yumi insaed long selestial kingdom, be “hemia nomo sapos i tru long ol gudfala wok, mo sore, mo gladhat blong Tabu Mesaea” (2 Nifae 2:8), nao bae blesing ia bae i save kasem hem.
Taem bae yumi stap gohed blong stap fetful, mi testifae se bae yumi kasem “glad ia we bae i neva save finis” long ples we Papa mo Pikinini, Tufala i stap long hem. “O tingbaot, tingbaot se ol samting ia oli tru; from Lod God i bin talemaot ol samting ia” (Mosaea 2:41).