Fuofua Houʻeiki Fafine ʻo Hono Fakafoki Mai ʻo e Ongoongoleleí
Naʻe Loto-Fiemālie ʻa Kalolaine ke Vahevahe
Ko e hā e lahi ʻo e paʻanga naʻe loto-fiemālie ʻa Kalolaine Tipeti ke foaki ke tokoni ki hono fakatau ʻo e kelekele ʻi Saioné?
Tā fakatātā ʻa Toni Oka
Naʻe ngāue mālohi fakatuʻasino mo fakalaumālie fakatouʻosi ʻa Kalolaine Tipeti mo hono fāmilí. Naʻe ngāue ʻa e ngaahi tuongaʻane ʻo Kalolainé ʻi he fahiʻanga papá, ʻo tokoni ʻi hono faʻu ʻo e papa ne lahi ʻaupito ʻi he siteiti ʻo Niu ʻIoke, USA, ʻa ia naʻa nau nofo aí. Ne kau mai hono fāmilí ki he Siasí ʻi he 1832. Naʻe taki hono tuongaʻane ko ʻAlavá ʻi he kolo ʻo e Kāingalotu ʻi honau feituʻú.
ʻI he 1834, naʻe fakahā ange ʻe ʻAlava fekauʻaki mo ha fakahā naʻe foaki ʻe he ʻEikí ki he Palōfita ko Siosefa Sāmitá ʻo kole ki he kāingalotú ke nau foaki pe nō ha paʻanga ke tokoni ki hono “fokotuʻu ʻo Saioné” (Tokāteline mo e Ngaahi Fuakava 101:74). ʻI hono ʻiloʻi ʻe Kalolaine, taʻu 21, naʻe fie maʻu ke fakatau ʻe he Siasí ha kelekele ʻe lava ke tānaki ki ai e Kāingalotú, naʻá ne loto ai ke foaki ha paʻanga pepa ʻe $150 mo ha kelekele feʻunga mo e $107, ʻa ia naʻe lahi hake ia ʻi ha toe foaki ha taha ʻi he koló.1
Naʻe kiʻi tuʻu atu ʻa Kalolaine, mo hono tuongaʻane siʻisiʻi ko Siosefá, mo ha taha ʻo e niʻihi naʻá na tokoua ʻakí ʻi Ketilani, ʻOhaiō, ʻi heʻenau fononga ki Mīsulí. Naʻa nau fetaulaki ai mo Siosefa Sāmita mo e fakataha alēlea māʻolunga ʻi Ketilaní. Naʻe lahi ʻa e moʻua ʻo e Siasí ʻi he taimi ko ʻení, pea naʻe kole ʻe he fakataha alēlea māʻolungá pe ʻe loto-fiemālie ʻa Kalolaine ke ne nō ange ha konga ʻo ʻene paʻangá ki he Siasí. Hangē ko e fakamatala ʻi he fakatahá, “Naʻe fakapapauʻi ia ʻe he fakataha alēleá [ʻa ia] naʻe maʻu ʻe Sisitā Kalolaine Tipeti ha paʻanga ʻe $149.75. … Naʻe ui ia ki he fakataha alēleá pea naʻá ne fakahaaʻi ʻene loto-fiemālie ke nō atu e paʻanga tatau.”2
Ne vakai ʻa Kalolaine ki he aleapau ʻo e noó naʻe fakamoʻoni hingoa ki ai ʻa Siosefa Sāmita, ʻŌliva Kautele, mo Feletiliki Uiliamisi. Kae mahalo naʻe ʻikai ke ne sio kia Siosefa mo ʻŌliva heʻena tūʻulutui ʻo lotu ʻi he ʻaho hono hokó, ʻo ʻoatu ha “fakamālō koeʻuhí ko e fakafiemālie naʻe ʻomi kimuí ni mai ʻe he ʻEikí.”3 Mālō mo e loto-fiemālie ʻa Kalolaine ke vahevahe ʻene ngaahi maʻuʻanga tokoní, naʻe lava ai ke totongi ʻe he Siasí ha moʻua pea hoko atu hono langa ʻo e Temipale Kirtland.