“Konifelenisi Lahí: Ko ha Fakataha Fakaemāmani Lahi ʻa e Siasí,” Liahona, Sepitema 2021
Ngaahi Tefitoʻi Meʻa Mahuʻinga ʻo e Ongoongoleleí
Konifelenisi Lahí: Ko ha Fakataha Fakaemāmani Lahi ʻa e Siasí
ʻOku tau fakafanongo ki he kau palōfitá mo e kau taki kehe ʻo e Siasí lolotonga e konifelenisi lahí. ʻOku nau akoʻi mai ʻa e meʻa ʻoku finangalo ʻa e ʻOtuá ke tau fanongo ki aí.
ʻI ʻEpeleli mo ʻOkatopa ʻo e taʻu kotoa pē, ʻoku fakahoko ai ʻe he Siasí ha ngaahi fakataha ʻoku ui ko e konifelenisi lahi. ʻOku akoʻi mo fakamoʻoniʻi ʻe he kau takí ʻa Sīsū Kalaisi mo ʻEne ongoongoleleí. ʻOku fakahoko ʻa e konifelenisi lahí ʻi Sōleki Siti, ʻIutā, USA, pea ʻoku fakamafola ia ʻi he funga ʻo e māmaní ʻi ha ngaahi lea fakafonua ʻe 80 tupu. ʻOku fakaafeʻi ʻa e kāingalotu kotoa pē mo e kakai kehe ʻoku nau mahuʻingaʻia aí ke fakafanongo ki he ngaahi leá.
Ko e Ngaahi Fuofua Konifelenisi ʻa e Siasí
Naʻe fokotuʻu fakaʻofisiale ʻa e Siasí lolotonga ha fakataha ʻi he ʻaho 6 ʻo ʻEpeleli 1830 (vakai, Tokāteline mo e Ngaahi Fuakava 20). Naʻe fakahoko e fuofua konifelenisi lahí ʻi he ʻaho 9 ʻo Sune 1830. Talu mei ai, kuo fakahoko e ngaahi konifelenisi lahí ʻo fakatatau mo e fakahinohino ʻa e Palesiteni ʻo e Siasí ʻi ha feituʻu pē ʻe lava ke fakataha ki ai ‘a e kāingalotú. ʻI he 1840 tupú, naʻe kamata fakahoko ʻe he kau takí ʻa e konifelenisí ʻo tuʻo ua he taʻu.
Founga Hono Fokotuʻutuʻu ʻo e Konifelenisí he ʻAho ní
ʻOku lea ʻa e Kau Palesitenisī ʻUluakí, Kōlomu ʻo e Kau ʻAposetolo ʻe Toko Hongofulu Mā Uá, mo e kau taki kehe ʻo e Siasí lolotonga e konifelenisi lahí. ʻOku fakahoko ʻa e hivá ʻe he Kuaea Tāpanekale ʻi he Temipale Sikueá mo e ngaahi kuaea kehe ʻa e Siasí. ʻOku ʻi ai ha fakataha ʻe nima ʻi he konifelenisi lahi takitaha: tolu ʻi he Tokonakí pea ua ʻi he Sāpaté.
Ngaahi Akonaki ‘a e Kau Takí
ʻI he ngaahi māhina kimuʻa he konifelenisí, ʻoku lotua ʻe he kau taki ʻo e Siasí ʻa e meʻa ke akoʻí. ʻOku ueʻi kinautolu ʻe he ʻEikí ke nau ʻiloʻi e meʻa ʻoku totonu ke nau lea ʻakí. ʻOku nau akoʻi e ngaahi moʻoni ʻo e ongoongoleleí mo fakaafeʻi kitautolu ke tauhi e ngaahi fekau ʻa e ʻOtuá. ʻOku nau fakamoʻoni foki kia Sīsū Kalaisi mo poupouʻi kitautolu ke tau muimui kiate Ia.
Ako mei he Konifelenisí
Kimuʻa ʻi he konifelenisi lahí, te tau lava ʻo lotu ke fakafanongo ki he meʻa ʻoku finangalo e ʻEikí ke tau akó. ʻI heʻetau fakafanongo ki he ngaahi leá, ʻe akoʻi kitautolu ʻe he Laumālié ki he meʻa ʻoku fie maʻu ke tau ʻiló. Hili e konifelenisí, ʻoku ʻasi e ngaahi leá ʻi he ChurchofJesusChrist.org, ʻi he polokalama Gospel Library, pea ʻi he Liahoná. Te tau lava ʻo ako ʻi he faʻa lotu ʻa e ngaahi leá ke ʻilo lahi ange fekauʻaki mo Sīsū Kalaisi mo ʻEne ongoongoleleí.
Mei he Ngaahi Folofolá
Naʻe akoʻi ʻe Sīsū Kalaisi ʻoku totonu ke tau faʻa fakataha (vakai, 3 Nīfai 18:22).
ʻI he taimi ʻoku lotu fakataha ai e kāingalotu ʻo e Siasí, ʻe nofoʻia kinautolu ʻe he ʻEikí (vakai, Mātiu 18:20).
Naʻe fekauʻi ʻe he ʻEikí ʻa e kāingalotu ʻo e Siasí ke nau “feakoʻaki mo fefakamaamaʻaki” (Tokāteline mo e Ngaahi Fuakava 43:8).
ʻI hono fakahaaʻi ʻe he kāingalotu ʻo e Siasí ʻa e tui kia Kalaisí, ʻe ʻiate kinautolu ʻa Hono Laumālié ʻi heʻenau fakataha maí (vakai, Tokāteline mo e Ngaahi Fuakava 44:2).