E a Tia n Riki ao N Taainako E na Riki Bwa Kairara

Ngai ma tariu ao mwaneu ti ikawairake n onimakinan te Atua, ma ara utu aki taua te aro. Ti karaoi oin ara waaki ao tiaki tabe n reiakinna bwa tera bukin rokora iaon te aba.

Ngkanne, imwain ae I a roko n tebwi tabun au ririki, iai tabeman ara koraki a mate, ao I iangoia ngkana N na kona ni manga nooriia riki. I uringnga tibu te unimwaane e kauringiira n aki mamatu n rang ibukina ngkana ti mate, tina matu n akea tokina, ao e anganai te nano ni kan atatai. Te mate ti te tabo ae rootongitong n akea tokin te matu?

Ngkai tamneiu e ukeuke ibukin te kaeka nakon bwa tera ae e na riki imwin ae ti mate, kain rarikira—te bitiobi ngkoa ibukin Ana Ekaretia Iesu Kristo ibukiia Aika Itiaki ni Boong aika Kaitira—e kanakoia mitinare man ana ekaretia bwa a na kaitibo ma ngaira. A reireina tariu Fiasili, ao Ngai ana eaungkerio ae kaokaki Iesu Kristo ao kabwarabwara nakoira te Babaire ni Kamaiu, are e bon kaekai au titiraki ni kabane iaon te mate . . . n te kabane!

Ngai ao Fiasili ti waekoa ni bwabetitoaki. Bon 13 ana ririki ao Ngai ai tibwa 12.

Ara karo a kukurei ibukira ngke ti kaaina te Ekaretia, ma aki tangirira n riki bwamwakorona. Imwiin bwabetitoakira, tariu ao Ngai ti kataia n tamaroa n roroko n te bootaki n taromauri, ma e bon aki beebete, riki ma te kaiangatoa n kairarang inanon mweengara. N aron te katooto, n taainako tina rineia imarenan te nako n te bootaki n toa ao kabanean ara Tabati iaon te bike ma ara utu.

Ma Ngai ao Fiasili ti mwakuri ni kakorakora ara koaua i bon iroura. Ti iangoia bwa ngkana ara karo a konaa ni kariaia te euangkerio, naba, tina bon aki maeka inanon te aonaaba ae uoua. Ngaia, ti kaoiia mitinare n reireiniia, ao inanon te waaki, mwanera are uarereke—ao ai tarira nako ake a maeka ma ngaira—a kaaina te Ekaretia.

E anaa te tai ae maan ibukiia ara karo. Tariu e a kaman tia n riki bwa te mitinare i Suva, Biti, ngke n te kabane ao tinara e a bwabetitoaki. Tamara e riki bwa te membwa ae aki kakaonimaki inanon te tai ae maan, ao bon te kimwareirei n noorakiia ngaiia uoman ni moana rorokoia nakon te taromauri ma ngaira.

Ngkanne inanon 2019, I a weteaki nako Biribin Quezon City Mition. Te beku ikekei bon ti tebo ma maiuakinan te mii—N taainako I tangira kateia Filipino ao n rangi n tangiria n reiakina Tagalog. Ma te taneiai ni mitinare naba e reireinai koauan aroia ara Karo I Karawa, ao ngke I okira mweengau nako Samoa n te ririki ae nako, I namakina nanou ae matoa n nooriia au utu ni kabaeaki nakoia n tatabeman ibukin ngkai ao n akea tokina.

Iai ara mwakuri tabeua ae ti na karaoia imwain are ti na kona ni katiaa te kouru anne. Au karo a teimatoa ni boou nakon te euangkerio ao n reitinako n reiakina taekan te otenanti ni kamaiu n te euangkerio. Mwaneu e bon teimatoa ni kakaea kawaina—ni ukoria ngkana te mition tabena n taai aika a na roko—ao ngai ma Fiasili ti reitinako n aki botuakinna. Ti bon kamatoa ni “waaki rake ma te nano matoatoa iroun Kristo, ni karekea ootamwaakan te kantaninga ae kororaoi ao ana tangira te Atua,” ngkai ti kataia ni kananoa te ibuobuoki ibukin rairakiia ara utu.

N tabetai I iangoia bwa I kanga Ngai ma tariu ni kunea te euangkerio ao ni karekea te motinnano n tiku inanon ririki ni kabane aikai, riki ma akean ara karo n te taromauri n te tai ae maan. I ataia ngkai bwa Tamara are I Karawa e a tia ni kairiira inanon kawaira. Riki inanon ara kangaanga, ti a tia n namakina Baina inanon maiura n tatabemaniira, ao I ataia bwa—ai aron are E karaoia ibukiia Iaretaite inanon Ita 2:7—E na aki motirawa imwain are ti na roko n tamaroan biken te aba ni berita are e katauraoaki ibukira.