Irakin Ana Kairi Tamau

Au utu ae bubura iai aron kateia ni kaakibotu ae kakaraoki. Ni bongin taian motirawa, bootaki ni inoono, ke tabeua taai aika onoti, ti tatangiria ni uota ana booti ai tamau mai Tongatapu, rabwatan te aba ae Tonga, nakon te aba ae tikauarerei i buki ae arana Pangaimotu. Ikekei, ti kabanea te bong anne n takakaro n nete ke buuru, te kayaking ao, eng, te amwarake ao te uaua.

N rokora i Pangaimotu, ara booti e rooro itinanikun te nama, ao te booti ae uarereke e katokaia ikawai nakon te aba. Ataei—ai tariu ao tariu—aki tangiria n tataninga te bao. A tangiria ni uarake man te booti ae bubura nakon te aba, ao ngkanne, imwiin tokin ara bong ni mwanangara ae abwabwaki, a manga bane ni uaua n oki.

Ngke I uarereke, n taainako I tangiria n iriia, ma e bon kangaanga irou bwa n na uaua ibukina taari irarikin ara booti e rangi n nano. E bon kakamaakai are I bon aki kona n toua aontano ma rangau—I bon kakoaua bwa te bwai teuana e na tauai ni katikai rikaaki. N ikotaki ma te raroa imarenan te aba ma te booti e taraa n rangi n raroa. Tera ngkana I a kua imwain rokou ikekei?

Au karo e ataia bwa e rangi ni kakawaki ibukiu bwa N na karaoa te uaua anne.

Ngke e a moanna ni bung taai n te bong teuana i Pangaimotu, tamau e weteai nakoina. E na bon buokai man te aba nakon te booti.

Tamau e nakonako ma ngai n riaon te kaora ao inanon te ran ae nano. N te tai ae waekoa are I aki namakina touan aontano are e mena iaau, I a maaku ao ni kataia n tineia, ma e aki kariaia. I rangi n un, I kaoa ranin matau, ma au karo e tiku irariki ao ni kaungaai n teimatoa ni uaua.

N iangoana teuana, n aron mwaitin kamwaingingan baiu ao n toutoui n rangau, I namakinna bwa kanga ai aron ae I aki nakon te tabo teuana. I a bon rang ni kua! Au karo e aamarau n taekinna are I bitaki man au tabo ni uaua.

I taua ma nanou n rangi ni kakauongo nakon bwanaana, ni ikeike ao n reitinako n uaua, are I aki ataia ae ti a tia n roko n te booti—n rang waekoa nakon are I a tia ni kantaningaia.

Te namakin ae abuee n tokanikai e roko irou imwina ngke I tamarake n tokara te booti ao I a tiba ataia are iaon te mwananga anne—ngke I kabanea au iango iaon au uaua ao iaon au karo—e bua maakakin marawa irou.

Ririki n nako, I a tia ni karaoa te uaua, n oki ao n nako, ni mwaitin te tai ma akean te maaku. Are e a tia n taraa ni kangaanga ngkoa ngkai e a tia n riki ni beebete.

I iangoia bwa e kanga au karo ni kairirai iaon au moan tokanikai ni uaua n nakon te booti. E rang akoi, ma e matoa. E anganai bwa n na bon rinanon te kangaanga I bon ibukiu, ma e tiku ni kaan irarikiu ni kabanea mwanangara. N mwaitin te tai I nakonnano ao n totoko, ma e reitanako kaungaakiu ma te taotaona nnano ao te tangira.

I a tia ngkanne n reiakinna bwa Tamara are I Karawa e mwakuri n aron te kawai ae ti te arona. E a ataira bwa ti mena iaon te aba n reiakinna, ao n taainako, aio e kainnanoira n otinako man mweengaraoira. E atai mwaitin ara kangaanga iaon te aba e na riki ni kangaanga ao ni kammaraki, ao are tina riai n rinanoi boni ngaira bwa ti aonga n rikirake, ma E bon teimatoa ni mena irarikira, ni kairiira ao ni kaungaira, ao ni buokiira ni bitii mamarara nakon korakorara.

Ngkana ti kaitarai ara kangaanga ma te nanorinano ao te onimaki, a konaa ni uotiira riki ni kaniira nakon Tamara are I Karawa. A kona n reireiniira n onimakina Ana tangira te Atua ibukira ao ana kantaninga bwa ti na tokanikai. N ai aron are e karaoia au karo ibukiu inanon ririki aika mwaiti n nako i Pangaimotu, Tamara are I Karawa e kona ni bitiira nakon arora aika tamaroa riki ao ni buokiira ni katiai aika mwaiti riki nakon are ti konaa i bon iroura.