“Pe Sili Mai Lou Alofa Ia Te A’u i O Latou Nei”

Ia Novema 2019, sa ma asiasi atu ai ma la’u uo i le Nuu Paia. A o ma i ai iina, sa ma toe iloiloina ma suesueina tusitusiga paia e uiga i le soifuaga o Iesu Keriso. I se tasi taeao, sa ma tutu ai i le matafaga i matusisifo o le Sami o Kalilaia i se nofoaga atonu sa feiloai ai Iesu ma Ona soo ina ua mavae Lona Toetu.

Ina ua mavae le Toetu o Iesu, a o ma faitauina le Ioane mataupu 21, sa fagogota Peteru ma isi soo i le po atoa e aunoa ma le faamanuiaina.¹ I le taeao, sa latou vaaia se tagata o tutu i luga o le matafaga o lē sa fai atu ia i latou e lafo la latou upega i le isi itu o le vaa. I lo latou maofa tele, sa faatumulia faavavega ai le upega.²

Sa vave ona latou iloaina o lena tagata o le Alii lava lea, ma sa latou faanatinati atu loa e faafeiloai ia te Ia.

A o latou tosoina le upega i le matafaga, na tumu i i’a, sa fetalai atu Iesu, “O mai inā aai”³ Ua lipotia mai e Ioane e faapea “ina ua uma ona latou aai, ona fetalai atu lea o Iesu ia Simona Peteru, Simona, le atalii o Iona, pe sili mai lou alofa ia te a’u i o latou nei?”⁴

A o ou tūtū ai i lena lava matafaga, sa ou iloa ai o le fesili a le Faaola o se tasi o fesili aupito taua atonu o le a Ia fesili mai ai ia te a’u i se aso. Toetoe ina a ou lagonaina Lona siufofoga o fesili mai, “Russell, pe sili mai lou alofa ia te a’u i o latou nei?”

Pe o tou taumafaufau i le mea na faasino i ai e Iesu Lana fesili ia Peteru, “Pe sili mai lou alofa ia te au i o latou nei?”

Pe a faatatau lenei fesili ia i tatou lava i o tatou taimi, atonu o loo fesili mai le Alii pe o le a le tele o lo tatou pisi, ma le mau faatosinaga lelei ma lē lelei o loo tauva mai mo lo tatou gaua’iga ma o tatou taimi. Atonu e fesili mai ia i tatou taitoatasi pe sili lo tatou alolofa ia te Ia nai lo mea o lenei lalolagi. Atonu o se fesili lenei e uiga i mea o loo tatou faatauaina moni i le olaga, pe o ai o tatou mulimuli i ai, ma pe o faapefea ona tatou vaavaai atu i a tatou mafutaga ma tagata o le aiga ma tuaoi. Pe atonu foi o loo fesili mai o Ia pe o a tonu lava mea e aumaia ia i tatou le olioli ma le fiafia.

Pe aumaia e mea o lenei lalolagi ia i tatou le olioli, fiafia, ma le filemu lea na ofo mai e le Faaola i Ona soo ma ua Ia ofoina mai foi ia i tatou? Ua na o Ia lava e mafai ona aumaia ia i tatou le olioli moni, fiafia, ma le filemu e ala i lo tatou alolofa atu ia te Ia ma mulimuli i Ana a’oa’oga.

Pe o le a faapefea ona tatou taliina le fesili “Pe sili mai lou alofa ia te a’u i o latou nei?”

Pe a oo ina tatou iloa se uiga atoatoa o lenei fesili, e mafai ona avea i tatou ma tagata lelei atu o aiga, tuaoi, tagatanuu, tagata o le Ekalesia, ma atalii ma afafine o le Atua.

I lo’u matua ua ou i ai, e tele maliu ua ou auai atu i ai. Ou te talitonu e toatele foi outou ua matauina le mea ua ou matauina. Pe a patipatia le olaga o se tagata o se aiga ua maliu po o se uo, e seāseā talanoa se failauga i le telē o le fale o le tagata, le aofai o ni ana taavale, po o paleni o ana teugatupe. E masani lava latou te lē talanoa i tusitusiga i faasalalauga faaagafesootai. I le tele o maliu sa ou auai ai, latou te taulai atu i mafutaga ma ē pele ia i latou, a latou auaunaga i isi, lesona ma aafiaga o le olaga, ma lo latou alofa mo Iesu Keriso.

Aua tou te aveseseina la’u tala. Ou te le o fai atu faapea, o le i ai o se fale manaia po o se taavale manaia e sese, pe e leaga foi le faaaogaina o faasalalauga faaagafesootai. O le mea lea o loo ou fai atu ai e faapea i le i’uga, e itiiti lava se taua o na mea pe a faatusa i le alofa i le Faaola.

Pe a tatou alolofa ma mulimuli ia te Ia, ua tatou faatuatua ia te Ia. Ua tatou salamo. Ua tatou mulimuli i Ana faataitaiga ma ua papatiso ma maua le Agaga Paia. Ua tatou tumau e oo i le i’uga ma tutumau i luga o le ala o feagaiga. Ua tatou faamagalo atu i tagata o o tatou aiga ma tuaoi e ala i le lafoa’iese o mea faafatu’ulu tatou te taofiofia. Tatou te tinoū ma le naunautai e tausi poloaiga a le Atua. Tatou te tinoū ia usiusitai. Tatou te osia ma tausia feagaiga. Tatou te āva i o tatou tama ma tina. Tatou te faataatia ese faatosinaga lē lelei a le lalolagi. Tatou te saunia i tatou lava mo Lona Afio Mai Faalua.

I totonu “O Le Keriso Soifua: O Le Molimau a Aposetolo,” tatou te faitau ai: “[O Iesu] o le a i ai se aso e toefoi mai ai i le lalolagi. … O le a pule o Ia o le Tupu o Tupu ma nofotupu foi o le Alii o Alii, ma o le a tootutuli tulivae uma ma tautatala laulaufaiva uma e tapuai i Ona luma. O le a taitoatasi i tatou ma tutu ina ia faamasinoina e Ia e tusa ma a tatou galuega ma manaoga o o tatou loto.”⁵

I le avea ai ma se tasi o Aposetolo na sainia le pepa o faamatalaga “O Le Keriso Soifua” e mafai ona ou faapea atu o le iloaina o Iesu “o le malamalama, o le ola, ma le faamoemoe o le lalolagi”⁶ ua aumaia ai ia te a’u se manao tele atu e alofa atili ia te Ia i aso uma.

Ou te molimau atu o loo soifua le Tama Faalelagi ma Iesu Keriso. Ou te molimau atu e alolofa i La’ua ia te i tatou. Ua a’oa’o mai e tusitusiga paia e faapea “Aua ua faapea lava ona alofa mai o le Atua i le lalolagi, ua ia aumai ai lona Atalii e toatasi, ina ia le fano se tasi e faatuatua ia te ia, ae ia maua le ola e faavavau.”⁷ Ua a’oa’o mai foi e tusitusiga paia e faapea o Iesu “na alofa tele i le lalolagi na ia tuu atu ai lona lava ola, ina ia mafai e le toatele o e talitonu ona avea ma atalii [ma afafine] o le Atua.”⁸

Ua alofa tele le Tama Faalelagi ia i tatou ua Ia saunia ai Lana ata o le faaolataga ma se Faaola o le tagata autu lea. Ma na alofa tele Iesu ia i tatou le lalolagi o lea i lena Fono sili i le Lagi, ina ua fesili le Tama Faalelagi, “O ai se Ou te auina atu?” Na tali atu Iesu, o le Ulumatua o fanau agaga uma a le Tama, “O A’u lenei, auina atu au.”⁹ Na fetalai atu o Ia i le Tama, “Lo’u Tama e, ia faia Lou finagalo, ma ia ia te Oe pea le mamalu e faavavau.”¹⁰ Sa ofofua atu Iesu e avea ma o tatou Faaola ma Togiola ina ia mafai ai ona tatou avea e faapei o i La’ua ma toefoi atu ai i lo La’ua afio’aga.

O mau nei e lua o loo a’oa’o mai ai foi e faapea o le toefoi atu i lo La’ua afio’aga e manaomia ai ona tatou talitonu. E manaomia ona tatou talitonu ia Iesu ma i le fuafuaga o le fiafia a le Atua. Ia talitonu o le alofa lea ma mulimuli i lo tatou Faaola ma tausi poloaiga, tusa lava pe i ai i le lotolotoi o tofotofoga ma feteenaiga.

O le lalolagi i le taimi nei ua lē mautonu. Ua i ai le lē fiafia, feeseesea’iga, faanoanoaga, ma mea faalavefau.

Na saunoa Peresitene Dallina H. Oaks i le 2017 ma ta’ua ai mea nei: “O aso faigata nei, ua tumu i le popole tele: o taua ma tala o taua, o faama’i o ma’i pipisi, o lamala, o lologa, ma fesuia’iga o le tau i le lalolagi atoa.”¹¹

E le mafai ona tatou lafoaia lo tatou alolofa ma le faamoemoe ia Iesu, tusa lava pe tatou te fetaiai ma luitau lofituina tele. O le a lē faagaloina lava i tatou e le Tama Faalelagi ma Iesu. E alolofa i La’ua ia i tatou.

Ia Oketopa ua mavae, na a’oa’o mai ai i tatou e Peresitene Russell M. Nelson i le taua o le faamuamua o le Tama Faalelagi ma Iesu Keriso i o tatou olaga. Na a’oa’o mai e Peresitene Nelson i tatou o se tasi o uiga o le upu Isaraelu o le “ia faamuamua le Atua.”¹²

Sa ia fesili mai ia i tatou taitoatasi i fesili nei: “O e loto e faamuamua le Atua i lou olaga? O e loto e avea le Atua ma faatosinaga sili ona taua i lou olaga? Pe o le a e faatagaina Ana afioga, Ana poloaiga, ma Ana feagaiga e faatosinaina mea e te faia i aso taitasi? Pe o le a e faatagaina Lona siufofoga ia faamuamua i lo se isi lava leo? O e loto e faataga soo se mea o finagalo o Ia e te faia ia faamuamua i lo isi faamoemoega uma? O e loto e tofatumoanaina lou loto i Lona finagalo?”¹³

E tatau ona tatou manatua i taimi uma o lo tatou fiafia moni e faalagolago i la tatou mafutaga ma le Atua, ma Iesu Keriso, faapea ma le tasi ma le isi.

O se tasi auala e faapupula atu ai lo tatou alofa o le auai faatasi ma le aiga, uo, ma tuaoi i le faia o nai mea iti e faaleleia atili ai le feauaunaa’i o le tasi ma le isi. Ia faia mea e avea ai lenei lalolagi o se nofoaga e sili atu ona lelei.

O a mea e mafai ona e faia i lou lava olaga e faaalia ai e te alofa muamua i le Alii?

A tatou taulai atu i le alofa i o tatou tuaoi e pei ona Ia alofa ia i latou, ua amata ona tatou alolofa moni ia i latou o siomia ai i tatou.¹⁴

Ou te toe fesili atu, e mafai faapefea ona e tali atu i le fesili a le Faaola “Pe sili mai lou alofa ia te a’u i o latou nei?”

A o e mafaufau i lenei fesili e pei ona sa ou faia, ou te tatalo ia mafai ona e tali atu e pei ona sa faia e Peteru i tausaga ua leva, “Ioe, le Alii e; ua e silafia ou te alofa ia te oe,”¹⁵ ona faaali atu lea e ala i le alofa atu ma auauna atu i le Atua ma i latou o siomia ai oe.

Ou te molimau atu ua faamanuiaina i tatou i le i ai o le talalelei a Iesu Keriso e faatonufolau ai i tatou i le ala tatou te ola ai ma taulima ai le tasi ma le isi. O Ia, tatou te iloa ai le taua tele o afafine ma atalii uma o le Atua ia te Ia.

Ou te molimau atu o Iesu Keriso o lo tatou Faaola pele. O Ia o le Alo Pele e Toatasi o le Atua. Ma ou te tuuina atu ai lenei molimau ma le lotomaulalo i le suafa o Iesu Keriso, amene.