O Se Faatosinaga i le Lalolagi Atoa mo le Lelei

A o faaauau pea e perofeta ma aposetolo a latou auaunaga, o a latou faatosinaga mo le lelei ua faamanuiaina ai le tele o olaga ma faafaileleina ai se agaga i le lalolagi atoa o le auauna atu, galulue faatasi, ma le faamoemoe. O nisi nei o faatumutumuga o lena galuega i le ono masina talu ai.

I le taimi o le Olimipeka o le Taumafanafana a Tokyo, sa tuu ai i luga se avea’i e Peresitene Russell M. Nelson i ala o faasalalauga faaagafesootai e uiga i le manaomia ona faaitiitia le fefinaua’i ma e uiga i le taua o le faauo, faaaloalo, ma le galulue faatasi.

Sa auai Elder Jeffrey R. Holland o le Korama a Aposetolo e Toasefululua i se talatalanoaga faavitio i le lalolagi atoa e faapogai i Windsor, Egelani. Sa talanoaina e failauga o le konafesi le soifua maloloina faalemafaufau ma faalelagona o le faitau miliona o tagata i tolauapiga a tagata sulufai. Na valaau mai Elder Holland mo le lagolago ina ia mafai ai e tagata sulufai ona faailoa atu “le faatuatuaga faalelotu lava lea e tuuina atu ai ia i latou lo latou faasinomaga.” Sa auai foi Sister Sharon Eubank, Fesoasoani Muamua i le Au Peresitene Aoao o le Aualofa ma le peresitene o le Auaunaga Alofa a le Au Paia o Aso e Gata Ai, i lea talatalanoaga.

Sa saunoa Elder Quentin L. Cook o le Korama a Aposetolo e Toasefululua i se aufono e uiga i le galulue faatasi o ekalesia soofaatasi sa faia i le Iunivesite o Notre Dame i Initiana, ISA. Sa luiina e Elder Cook tagata auai o le faatasiga ina ia “tutu o se sulu o le talitonuga ma le lotogatasi i se lalolagi e masani ona ta‘uleagaina ai mea uma e lua.”

Na saunoa Elder Ronald A. Rasband o le Korama a Aposetolo e Toasefululua i le Felafolafoaiga a le G20 Interfaith sa faia i Bologna, Italia. (O malo G20 e maua ai le 20 tamaoaiga aupito tele i le lalolagi.) “Pe a tuuina atu i tapuaiga le saolotoga e lauolaola ai, e faatino e tagata talitonu i soo se mea ni faatinoga faigofie ma o nisi taimi o ni faatinoga lototoa o auaunaga,” na saunoa ai Elder Rasband. I le fonotaga lava lea e tasi, sa saunoa ai Sister Eubank e uiga i aafiaga o le fiaai ma le matelaina i le mativa a o laitiiti. “O suiga e na o le pau le ala e … ausia ai o sootaga patino o le faatuatuaina,” o lana tala lea.

I le mavae ai o se mafuie lea na faataumaoia ai Haiti, sa saunoa ai Elder Ulisses Soares o le Korama a Aposetolo e Toasefululua i se faasalalauga o le faigalotu i tagata e tautatala i le gagana Farani i le atu Keripiane, ma faamanatu atu ia i latou e faapea “o le faatuatua e tatalaina ai le mana o le Atua i o tatou olaga.” O Sister Reyna I. Aburto, Fesoasoani Lua i le Au Peresitene Aoao o le Aualofa, na auai i le faigalotu ma sa galulue faatasi foi ma tagata o le au paia i fonotaga faaleautaitai ma konafesi faalesiteki. “E mafai ona tatou tutu malolosi,” sa ia fai mai ai, “e tusa lava pe oo mai matagi ma luluina le eleele o siomia ai i tatou.” Sa saunoa foi Elder Soares i se faasalalauga o le faigalotu mo le autalavou i Keripiane, ma faamanatu atu ia i latou faapea “tatou te manaomia le faatosinaga a le Agaga Paia i o tatou olaga.”