Faafetaia’ia o O Tatou Afā Faaleagaga e ala i le Talitonu ia Keriso

Mo le ono tausaga talu ai, sa ma nonofo ai ma la’u manamea, o Ana, i Texas e lata i le Gulf Coast, lea sa taia ai e ni afā tetele le Iunaite Setete, ma tuua ai ni faatafunaga maoae ma maumau ai ni ola. O le mea e faanoanoa ai, sa tele foi na lava mea faataumaoi na tutupu i masina talu ai nei. E momoli atu o matou alofaaga ma tatalo mo i latou uma o ē sa aafia ai. I le 2017, na matou feagai patino ai ma le Afā o Harvey, lea na oo ai faamaumauga uigaese o timuga i le 60 inisi (150 sm).

O tulafono o le natura e puleaina le fatufatuga o afā. O le vevela o ogāsami e tatau ona le i lalo ifo o le 80 tikeri farenihaite (27 tikeri C), e oo atu i le 165 futu (50 m) i lalo ifo o le alititai. A oo ina fetaia’i matagi ma le ogāsami mafanafana, ona afua ai lea ona mitiīa le sami ma liuāusa atu i le atemosifia, lea e faaliusuavaia ai. Ona fatu ai lea o ao, ma faia ai e savili se mamanu o taaviliga i luga o le fogatia o le ogasami.

Ata

Afā

O afā e maoae lo latou tetelē, e oo atu lava i le 50,000 futu (15,240 m) pe sili atu foi i totonu o le atemosifia ma le taaviliga e le itiiti ifo ma le 125 maila {200 km). O le mea mata’ina, a fetaia’i ia afā ma le laueleele, ona amata lea ona vaivai auā ua le o toe i ai i luga a’e o le ogāsami vevela lea e moomia e fafaga ai lona malosiaga.¹

Atonu o le a e le vaai lava i se afā faataumaoi faaletino. Peitai, ua tofu feagai i tatou, ma o le a feagai lava ma afā faaleagaga ia e faamata’uina ai lo tatou filemu ma tofotofo ai lo tatou faatuatua. I le lalolagi i ona po nei, ua foliga mai ua faateteleina le tupu soo ma le malolosi o na afā. O le mea e faafetai ai, ua saunia e le Alii se auala mautinoa mo i tatou e faatoilalo ai ma le olioli na afā. E ala i le ola ai i le talalelei a Iesu Keriso, ua faamautinoa mai ai ia i tatou “a tu mai se ao uliuli, ma lamatia ai i tatou, pe a oso mai [le] sulu, o le a te’a ai ma le po.”²

Na faamalamalama mai e Peresitene Russell M. Nelson:

“E mafai ona maua e le au paia le fiafia i lalo o soo se tulaga. E mafai ona tatou lagona le olioli e tusa lava pe le o lelei le aso, se vaiaso, po o se tausaga!

“… O le olioli o tatou lagonaina e itiiti lava se mea e faatatau i tulaga o o tatou olaga a o mea uma o loo faatatau i le taulaiga o o tatou olaga.

“Afai o le taulaiga o tatou olaga o Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga.”³

E pei lava ona puleaina e tulafono faalenatura ia afā faaletino, e faapena foi ona pulea e tulafono faalelagi le auala e lagona ai le olioli i taimi o o tatou afā faaleagaga. O le olioli po o le faanoanoa tatou te lagonaina pe a tatou tatalia afā o le olaga ua noatia i tulafono ua faatulagaina e le Atua. Sa faasoa mai e Peresitene Nelson, “Ua ta’ua na mea o poloaiga, ae e tutusa lelei lo latou moni e pei o le tulafono o le sii i luga, le tulafono o le kalave, [ma] le tulafono e puleaina le tātā o le fatu.”

Sa faaauau le saunoaga a Peresitene Nelson, “E avea ma se fomulā faigofie: Afai e te manao ia fiafia, tausi ia poloaiga.”⁴

O le masalosalo o se fili o le faatuatua ma le olioli. E pei ona avea le ogāsami vevela ma faavae fanafanau mo afā, o le masalosalo o le faavae fanafanau lea o afā faaleagaga. E pei foi lava o le talitonuga o se filifiliga, e faapena foi le masalosalo. Pe a tatou filifili e masalosalo, ua tatou filifili sei iloga e tau faagaoioi, ma faamatuu atu le mana i le fili, o le mea lea e tuua ai i tatou ua vaivai ma lamatia gofie.⁵

E saili Satani e taitai i tatou i le faavae fanafanau o le masalosalo. Na te saili e faama’a’a o tatou loto ina ia tatou lē talitonu.⁶ O le faavae fanafanau o le masalosalo e mafai ona foliga faatosina mai aua o se vai e matua to’afilemu, ma mafanafana e le manaomia ai ona tatou “ola i upu uma e tulei mai le fofoga o le Atua.”⁷ I na ituaiga sami e faaosooso ai e Satani i tatou e faapafala lo tatou mataāla faaleagaga. O lena faalēano e mafai ona faaosofia ai le leai o se talitonuga maumaututu faaleagaga, lea tatou te “le maalili pe vevela foi.”⁸ Afai tatou te lē taula atu ia Keriso, o le a taitaiese e le masalosalo ma ana mailei i tatou i le lotomusuā, lea o le a tatou lē maua ai ni vavega, fiafia tumau, po o se “malologa o [o tatou] agaga.”⁹

E faapei lava foi ona faavaivaia afā i luga o le laueleele, e suitulaga foi e le faatuatua le masalosalo pe a tatou fauina lo tatou faavae ia Keriso. Ona mafai lea ona tatou vaai i afā faaleagaga i o latou vaaiga e tatau ai, ma e faateleina ai lo tatou malosi e faatoilalo ai. Ona, “pe a auina mai e le tiapolo ana matagi malolosi, ioe, ana ufanafana i le asiosio, … o le a leai sona mana … e toso ifo ai [tatou] i lalo i le to o le pagatia ma le malaia e le gata, ona o le papa lea ua [tatou] atinae ai i luga, o le faavae mautinoa lea.”¹⁰

E pei ona aoao mai Peresitene Nelson:

“O le faatuatua ia Iesu Keriso o le faavae lea o talitonuga uma ma le alātafe o le mana faalelagi. …

E le manaomia e le Alii se faatuatua atoatoa mo i tatou e maua ai Lona mana atoatoa. Ae ua Ia talosagaina i tatou ia talitonu.”¹¹

Talu mai le konafesi aoao ia Aperila, sa matou sailia ai ma lo’u aiga e faamalolosia lo matou faatuatua ia Iesu Keriso ma Lana Togiola e fesoasoani ai ia i matou e “faaliliu [o matou] luitau i se tuputupu a’e e le mafaatusalia ma avanoa.”¹²

O le afafine o le ma atalii o Ruby sa faamanuiaina i se loto malosi, e vave ona taulamua. Ina ua fanau mai o ia, sa le’i pipii lona alā’ai i lona manava. E oo lava i lona pepe meamea, faatasi ai ma le fesoasoani a ona matua, sa taulima ai e Ruby, lenei tofotofoga ma se naunautaiga tulagaese. Ua lima nei tausaga o Ruby. E ui lava o loo laitiiti tele o ia, ae o ia o se faataitaiga mamana o le lē lafo atu i ona tulaga e fuafuaina lona fiafia. E fiafia lava o ia i taimi uma.

Ia Me talu ai, sa faafetaia’ia ai foi ma le faatuatua e Ruby se isi foi afā i lona olaga. Sa fanau mai o ia ma se lima e le’i atoa lona malosi, lea sa manaomia ai se ta’otoga e toe faaleleia ai. A o le’i faia lenei ta’otoga lavelave, sa matou talatalanoa ai ma ia ma avatu ia te ia se atatusi o loo faaalia matagofie ai se lima o se tamaititi o loo uumauina le a’ao o le Faaola. Ina ua ma fesili atu ia te ia pe o popole, sa ia tali mai, “E leai, o lea ou te fiafia!”

Ata

Ruby ma le ata vali o le aao o le Faaola

Ona ma fesili atu lea ia te ia, “Ruby, o faapefea ona tupu lena mea?”

Sa ta’u mai ma le mautinoa e Ruby, “Aua o le a uuina e Iesu lo’u lima.”

O se vavega le toe malosi mai o Ruby, ma o loo fiafia pea o ia. E ma’eu le eseese o le mamā o le faatuatua o se tamaitiiti mai le faavalevalea o le masalosalo lea e mafai ona faaosoosoina soo ai i tatou a o faasolo ina tatou matutua!¹³ Ae e mafai lava ona tatou avea uma e faapei o tamaiti, ma filifili e faataatia ese lo tatou lē talitonu. O se filifiliga faigofie lava.

Sa aioi atu ma le filiga se tamā popole i le Faaola, ma faapea atu, “Afai e te mafaia soo se mea, … fesoasoani mai ia te i matou.”¹⁴

Ona fetalai atu lea o Iesu ia te ia:

“Afai ua e mafaia ona talitonu, e mafaia mea uma lava i le talitonu.

“Ona alaga loa lea o le tamā … ua fai mai ma le tagi, Le Alii e, ua ou faatuatua; ia e fesoasoani i lo’u le faatuatua.”¹⁵

Sa filifili ma le poto e lenei tama lotomaualalo e faalagolago atu lona talitonuga ia Keriso nai lo lona lava masalosalo. Na faasoa mai e Peresitene Nelson, “Ua na o lou lētalitonu o le a taofia le Atua mai le faamanuiaina o oe i vavega e aveese ai mauga mai lou olaga.”¹⁶

E ese le alofa mutimutivale o lo tatou Atua i le tuuina mai o lona faamoemoega mo i tatou i le maualuga o le talitonuina ae le o le maualuga o le iloa!

Ua a’oa’o mai Alema:

“Amuia o ia o le e talitonu i le afioga a le Atua.”¹⁷

“[Aua] e alofa mutimutivale le Atua i tagata uma o e e talitonu i lona suafa; o lea ua ia finagalo ai, i le tulaga muamua lava, ia outou talitonu.”¹⁸

Ioe, o le mea muamua e finagalo le Atua ia tatou talitonu ia te Ia.

O le ala sili tatou te faafetaia’ia ai o tatou afā o le talitonu lea ia Keriso ma le tausiga o Ana poloaiga. O lo tatou talitonuga ma le usiusitai e fesootai ai i tatou i le mana i talaatu o lo tatou lava faatoilaloina [o soo se mea] o loo tupu—pe le o tupu—i o tatou olaga.”¹⁹ Ioe, “e faamanuia vave mai lava [le Atua] ia i [tatou]” i le talitonu ma le usiusitai.²⁰ O le mea moni, e mavae taimi o lo tatou suiga i le fiafia ma “ua faaolaina ia Keriso” pe a tatou faaaoga lo tatou faatuatua ia te Ia ma tausi Ana poloaiga.²¹

Uso e ma tuafafine, tau ina ia tatou filifili ia i le asō e “aua le masalosalo, ae ia talitonu.”²² “O le ala sa’o o le talitonu lea ia Keriso.”²³ “Ua uma ona “togitogoia i tatou … i luga o alofilima o [Ona] aao.”²⁴ O Ia o lo tatou Faaola ma le Togiola, o lē o loo tu i o tatou faitotoa ma tu’itu’i mai.²⁵ I le suafa o Iesu Keriso, amene.