Ia Avea o se Faaa’oa’o ia Iesu Keriso

I la’u suesuega patino o tusitusiga paia, sa uunaia fiafia lava a’u i le liuga o Saulo o Tasesa, lea na lauiloa mulimuli ane o Paulo, e pei ona faamatala mai i le Tusi Paia.

O Paulo o se tagata malosi i le sauaina o le Ekalesia ma le au Kerisiano. Ae ona o le mana o le lagi ma le Togiola a Iesu Keriso, sa suia atoatoa ai o ia, ma avea ai o se tasi o auauna sili a le Atua. O lona faaa’oa’o o le olaga, o le Faaola, o Iesu Keriso.

I se tasi o aoaoga a Paulo i Korinito, sa ia valaaulia ai i latou ia avea ma ni e faaa’oa’o atu ia te ia e pei o ia lava ia Keriso (tagai 1 Korinito 11:1). O se valaaulia faamaoni lea ma le aoga mai i ona po o Paulo seia oo mai i le asō: ia avea ma faaa’oa’o ia Keriso.

Sa amata ona ou tomanatu i le uiga o le avea ma faaa’oa’o ia Keriso. A o le mea e sili ona taua, sa amata ona ou fesilisili, “Pe faapefea ona ou faataitai ia te Ia?”

Ina ia avea o se faaa’oa’o ia Keriso o le taumafai malosi lea e faaogatusa a tatou faatinoga, amio, ma olaga i na mea e fai e le Faaola. O le mauaina lea o amio faaleatua. O le avea lea o se soo moni o Iesu Keriso.

Sa ou suesueina ni nai itu o le soifuaga o le Faaola, ma sa ou teuina ai e avea o se vaega o la’u savali i le asō, ni Ona uiga auaumama se fa ua ou taumafai e faata’ita’i i ai ma ou te faasoa atu ia te outou.

O le uiga auaumama muamua o le Faaola o le lotomaualalo. Sa lotomaualalo tele Iesu Keriso mai le mua’i olaga. I le Fono i le Lagi sa Ia aloaia ma tuu atu ia faamuamua le finagalo o le Atua i le ata o le faaolataga mo tagata. Na Ia fetalai, “Lo’u Tama e, ia faia Lou finagalo, ma ia ia te Oe pea le mamalu e faavavau” (Mose 4:2).

Ua tatou iloa na aoao mai e Iesu Keriso le lotomaualalo ma sa faamaualaloina o Ia lava ina ia faamamalu ai Lona Tama.

Ia tatou ola ma le lotomaualalalo aua e aumaia ai le filemu (tagai i le Mataupu Faavae ma Feagaiga 19:23). E muamua le lotomaualalo i le mamalu, ma e aumaia ai le alofa o le Atua i o tatou luga: “Ioe, ia usiusitai outou uma lava o le tasi i le tasi, ia oofu outou i le lotomaulalo; aua e tetee atu le Atua i e faamaualuga, ae foaiina mai le alofa tunoa i e faamaulalo” (1 Peteru 5:5). E aumaia e le lotomaualalo tali mālū. O le puna lea o se uiga amiotonu.

Na aoao mai Elder Dale G. Renlund:

“O tagata taitoatasi e feoai ma le faamaulalo ma le Atua, e manatua mea na faia e le Tama Faalelagi ma Iesu Keriso mo i latou.”

“Tatou te galulue ma le mamalu faatasi ma le Atua e ala i le savavali ma le faamaulalo faatasi ma Ia” (“Ia Fai le Amiotonu, Ia Naunau i le Alofa, ma Ia Feoai ma Lou Atua ma le Lotofaamaulalo,” Liahona, Nov. 2020, 111, 109).

O le uiga auaumama lona lua o le Faaola o le lototele. Pe a ou mafaufau ia Iesu Keriso i le 12 o ona tausaga, o nofo i totonu o le malumalu o le Atua faatasi ai ma foma’i o le tulafono ma aoao atu i latou i mea paia, na ou matauina na ia te Ia, i le talavou o Lona soifua, se lagona lelei o le lototele, o se lototele faapitoa. E ui o le toatele sa faamoemoe e vaai i se alii talavou o aoao e foma’i o le tulafono, ae sa Ia aoaoina i latou a o “latou faalogologo ia te ia, ma tuufesili atu i ai” (Faaliliuga a Iosefa Samita, Luka 2:46 [i le Luka 2:46, vaefaamatalaga i]).

Sa ma faamisiona talai i le Misiona a Mbuji-Mayi i le Ripapelika Temokarasi o Congo mai le 2016 i le 2019. O le ala e malaga ai i le misiona mai le tasi sone i le isi o le alatele. Sa tulai mai se mea ofoofogia i lena itu sa i ai tagata faomea faaauupegaina i mea maamaai sa tulioso ane i le auala ma faalavelaveina ai le fegasoloai o tagata malaga.

E toalima faifeautalai sa malaga mai le tasi sone i le isi o se vaega o le siitaga, sa aafia ai fua i nei faalavelave. O le aafia fua ai foi o i matou i nei mea ofoofogia i se taimi muamua, sa amata ona matou popole mo le soifua ma le saogalemu o i matou uma, ua oo ai foi ina mumusu e malaga i nei auala e asiasi i faifeautalai ma faia konafesi a sone. Matou te le iloa pe o le a le umi o le a i ai. Sa ou tusia se lipoti, lea na ou auina atu i le Au Peresitene o le Eria, ma sa ou faaali atu i ai o matou lagona o le popole e faaauau pea ona malaga pe afai o le aualatele e na o le pau lea o le auala e oo atu ai i faifeautalai.

Na tusi mai Elder Kevin Hamilton, o le Peresitene o lo matou Eria o Aferika i Sautesasae e tali mai ia te au: “O la’u fautuaga o le faia o le mea sili e te mafaia. Ia fai ma le poto ma ia lototatalo. Aua le tuuina oulua lava po o faifeautalai ma le iloa, i ala faataumaoi, ae ia agai foi i luma i le faatuatua i le taimi lava lea. ‘Aua ua le foaiina mai e le Atua ia te i tatou le Agaga e matau ai; a o le Agaga e faamalosi ai, ma alofa ai, ma mafaufau tonu ai’ (2 Timoteo 1:7).”

O lea apoapoaiga na matuai faamalolosia ai i ma’ua ma mafai ai ona matou faaauau e malaga ma galulue ma le lototele seia o ina uma le ma misiona, ona sa ma faalogo i le taitaiga mai lo tatou Tama oi le Lagi e ala i lena mau.

I tusitusiga paia o ona po nei, tatou te faitau ai upu musuia a le Perofeta o Iosefa Samita ua atagia mai ai le faamalosiauga a le Alii ia i tatou: “Uso e, tatou te lē o atu pea ea i lenei savali sili? O atu i luma ae lē o le solomuli. Lototetele, uso e; o atu pea, o atu pea i le manumalo!” (Mataupu Faavae ma Feagaiga 128:22).

Ia tatou maua le lototele e fai ai le mea tonu, tusa lava pe lē taualoa—le lototele e puipuia ai lo tatou faatuatua ma galulue e ala i le faatuatua. Ia tatou maua le lototele e salamo ai i aso taitasi, le lototele e talia ai le finagalo o le Atua ma usitai i Ana poloaiga. Ia tatou maua le lototele e ola amiotonu ai ma faia mea ua faamoemoeina mai ia i tatou i o tatou tiutetauave ma tulaga eseese.

O le uiga auaumama lona tolu o le Faaola o le faamagaloga. I le taimi o Lana misiona i le olaga nei, sa puipuia e le Faaola se fafine sa molia ane i le mulilua mai le fetogia i ma’a. Sa Ia poloaiina le fafine e “alu ma aua ne’i toe agasala” (Ioane 8:11). O lea na faaosofia ai o ia e salamo ma i’u ai ina faamagaloina, aua e pei ona tusia i le mau, “sa faamamaluina e le fafine le Atua mai lena lava taimi, ma talitonu i lona suafa” (Faaliliuga a Iosefa Samita, Ioane 8:11 [i le Ioane 8:11, vaefaamatalaga i]).

I se faigalotu o le Kerisimasi ia Tesema 2018, sa saunoa ai lo tatou Peresitene pele o Russell M. Nelson e uiga i a tatou meaalofa ua tatou maua mai le Faaola. Na saunoa o ia faapea o se tasi meaalofa na ofoina mai e le Faaola o le gafatia e faamagalo atu ai:

“E ala i Lana Togiola le i’u, e mafai ai ona e faamagalo atu ia i latou o ē faatiga ia te oe ma ē atonu latou te lē taliaina lava le tiutetauave mo lo latou agaleaga ia te oe.

“E masani lava ona faigofie ona faamagalo atu i le tasi o loo saili ma le faamaoni ma le lotomaualalo i lau faamagaloga. Ae o le a tuuina atu e le Faaola ia te oe le tomai e faamagalo ai soo se tasi sa agaleagaina oe i soo se auala” (“O Meaalofa e Fa ua Ofoina atu e Iesu Keriso ia te Oe” [Faigalotu o le Kerisimasi a le Au Peresitene Sili, 2 Tes., 2018], broadcasts. ChurchofJesusChrist.org).

Ia tatou faamagalo atu ma le lotofaamaoni le tasi ma le isi ina ia maua ai le faamagaloga a le Tama. O le faamagalo atu e faasaoloto ai i tatou ma tatou agavaa ai e taumamafa i le faamanatuga i Aso Sa taitasi. E manaomia lo tatou faamagalo atu ina ia avea ai ma soo moni o Iesu Keriso.

O le uiga auaumama lona fa o le Faaola o le taulaga. O se vaega o le talalelei a Iesu Keriso. Na tuuina mai e le Faaola le taulaga aupito maualuga o Lona soifua mo i tatou ina ia mafai ai ona togiolaina i tatou. O le lagonaina o le tiga o le taulaga, sa Ia ole atu ai i Lona Tama e aveese le ipu, ae na Ia agai atu pea i le faaiuga o le taulaga e faavavau. O le Togiola lenei a Iesu Keriso.

Na aoao mai e Peresitene M. Russell Ballard le mea lenei: “O le ositaulaga o [se] faaaliga o le alofa mama. O le maualuga o lo tatou alolofa mo le Alii, mo le talalelei, ma mo o tatou uso a tagata e mafai ona fuaina i mea ua tatou naunau e ositaulagaina mo i latou” (“The Blessings of Sacrifice,” Ensign, Me 1992, 76).

E mafai ona tatou ositaulagaina o tatou taimi e faatino ai le auaunaga, e auauna atu ai i isi, e fai ai mea lelei, e fai ai galuega o talafaasolopito o aiga, ma faalautetele ai o tatou valaauga i le Ekalesia.

E mafai ona tatou avatu a tatou mea tautupe e ala i le totogi o sefuluai, taulaga anapogi, ma isi foai e fausia ai le malo o le Atua i le lalolagi. Tatou te manaomia le ositaulaga e tausia ai feagaiga na tatou osia ma le Faaola.

O la’u tatalo, o le mulimuli ia Iesu Keriso ma utuvai atu i faamanuiaga o Lana Togiola, tatou te lotomaualalo atili ai, atili lototetele ai, faamagalo atu pea lava pea, ma tatou ositaulaga atili ai mo Lona malo.

Ou te molimau atu o loo soifua lo tatou Tama Faalelagi ma Na te silafia i tatou taitoatasi, o Iesu o le Keriso, o Peresitene Russell M. Nelson o le perofeta a le Atua i aso nei. Ou te molimau atu o Le Ekalesia a Iesu Keriso o le Au Paia o Aso e Gata Ai o le malo o le Atua i le lalolagi ma e moni le Tusi a Mamona. I le suafa o Iesu Keriso, lo tatou Togiola, amene.