O Le Filemu o Keriso e Faaumatia ai le Feitaga’i

Ou uso e ma tuafafine pele, i le taimi o le faatinoga o se suega o le atuatuvale, e faateleina le galuega o le fatu. O fatu e mafai ona taulimaina le savali, e ono faigata ona lagolago ia manaoga o le tamoe i luga o le a’ega. O lea faiga, e mafai ai ona faaali mai e le su’ega o le malosi se faama’i tugā e le o mafai ona iloatino. O soo se faafitauli e faailoa mai, e mafai loa ona togafitia a o le’i matua’ia ni faafitauli ogaoga i le olaga i aso taitasi.

O le faama’ioti o le KOVITI-19 ua mautinoa lava le avea ma se su’ega o le malosi i le lalolagi atoa! Ua faaalia i le suega ni taunuuga su’ifefiloi. Ua atiina a’e tui saogalemu ma le aogā.¹ Ua ositaulaga ma le totoa fomai poto faapitoa, o faiaoga, o tausimatua, ma isi—ma o loo faia pea lava. Ua faaalia e le toatele o tagata le limafoai ma le agalelei—ma o loo faia pea lava. Ae, o loo faaalia pea lava foi tulaga faava’atu’ia. O loo mafatia tagata lē ma’alofia—ma o loo tupu pea lava. O i latou o loo galulue e taulima nei tulaga lē paleni iloga e ao ona faamalosi’auina ma faafetaia.

O le faama’ioti o se su’ega foi o le malosi faaleagaga mo le Ekalesia a le Faaola ma ona tagata. E faapena foi ona su’ifefiloi ona taunuuga. Ua faamanuiaina o tatou olaga i le auaunaga i se “ala maualuga atu ma paia atu,”² o le mataupu aoaoina o le Sau, Mulimuli Mai ia te A’u ma le a’oa’oina o le talalelei e faatotonugalemu-i-le-aiga ae lagolagoina-e-le-Ekalesia. E toatele ua latou saunia ma tuuina atu le fesoasoani mutimuti alofa ma le faamafanafanaga i nei taimi faigata ma o loo faia pea lava.³

Ae peitai, i nisi tulaga, o loo faaalia ai e le su’ega o le malosi faaleagaga le lilifa atu i fefinaua’iga ma fevaevaea’iga. O loo ta’u mai ai e tatau ona tatou galulue e suia o tatou loto ma ia lotogatasi o ni soo moni o le Faaola. E le o se lu’itau fou lenei, ae o se tulaga taua tele.⁴

Ina ua asiasi atu le Faaola i sa Nifaē, sa Ia a’oa’o atu, “E le tatau ona i ai ni fefinauaiga ia te outou. … O le ua i ai le agaga o le finauga e le mai ia te au lea, a e mai le tiapolo, o le tama lea o finauga, ua ia faaosoina foi loto o tagata e fefinauai ma ita, o le tasi i le isi.”⁵ Pe a tatou fefinaua’i ma le tasi ma le isi i le ita, e ‘ata Satani ae tutulu le Atua o le lagi.⁶

E ‘ata Satani ae tutulu le Atua ona o ni mafuaaga pe a ma le lua. Muamua, o finauga e faavaivaia ai la tatou molimau autasi i le lalolagi ia Iesu Keriso ma le togiola e maua mai i Lona “mana, … alofa mutimutivale, ma le alofa tunoa.”⁷ Na fetalai le Faaola: “O le poloaiga fou ou te tuu atu ai ia te outou, ia outou fealofani. … O le mea lea e iloa ai e tagata uma lava o o’u soo outou, pe afai ua outou fealofani.”⁸ E moni foi lona faafeagai—ua iloa uma lava e tagata e le o i tatou o ni Ona soo pe a tatou lē fealofani. E feto’i Lana galuega pe a i ai finauga po o le feitaga’i⁹ i totonu o Ona soo.¹⁰ Lona lua, o finauga e lē maloloina mo i tatou taitoatasi. Ua faoa mai ia i tatou le filemu, olioli, ma le mapusaga, ma ua feto’i ai foi lo tatou gafatia e lagonaina ai le Agaga.

Sa faamalamalama mai e Iesu Keriso e faapea o Lana mataupu e “le o le faaoso o loto o tagata i le ita, o le tasi e faasaga i le isi; ae o [Lana] mataupu [o le] aveesea o mea faapena.”¹¹ Afai e vave ona ou ita pe tali atu i manatu eseese e ala i le ita po o le faamasinosino, ua ou “le pasia” le suega o le malosi faaleagaga. O le lē pasi o lea su’ega, e le faapea ai ua leai so’u faamoemoe. Ae ua ta’u mai ai ua manaomia ona ou suia. Ma o se mea lelei le iloa o lena mea.

Ina ua mavae ona asiasi atu le Faaola i Amerika, sa autasi tagata; “ma sa leai se finauga i le laueleele atoa.”¹² Pe tou te manatu na autasi tagata ona sa tutusa uma i latou, pe ona sa leai ni eseesega o manatu? Ailoga. Nai lo lena, na mou atu finauga ma le feitaga’i ona sa latou faamuamua le avea o i latou ma so’o i lo isi mea uma. Sa le’i taua o latou eseesega pe a faatusatusa i lo latou alofa fefaasoaa’i i le Faaola, ma sa latou lotogatasi o ni “suli i le malo o le Atua.”¹³ O le taunuuga “sa le mafai ona i ai o ni tagata e sili atu ona fiafia … na foafoa e le aao o le Atua.”¹⁴

O le lotogatasi e manaomia ai le taumafaiga.¹⁵ E atia’eina pe a tatou faafaileleina le alofa o le Atua i o tatou loto¹⁶ ma tatou taulai atu i lo tatou taunuuga e faavavau.¹⁷ Tatou te lotogatasi i lo tatou uluai faasinomaga autu o ni fanau a le Atua¹⁸ ma lo tatou tuuto atu i upumoni o le talalelei toefuataiina. O le isi itu, o lo tatou alolofa i le Atua ma le avea o i tatou ma soo o Iesu Keriso, e faaosofia ai le popole moni mo isi. Tatou te faatauaina le felanulanua’i o uiga o isi, o vaaiga mamao, ma taleni.¹⁹ Afai e le mafai ona tatou faamuamuaina lo tatou avea ma soo o Iesu Keriso i luga atu o mea tatou te fiafia i ai ma o tatou lava manatu faaletagata, e tatau la ona tatou toe su’esu’e a tatou faamuamua ma suia.

Atonu tatou te tau lilifa ane e faapea, “Ioe e mafai ona tatou lotogatasi—pe afai e te ioe faatasi ma a’u!” O se auala sili atu o le fesili lea, “O le a se mea e mafai ona ou faia e faafailele ai le lotogatasi?” E mafai faapefea ona ou tali atu e fesoasoani i lenei tagata ia faalatalata atili ia Keriso? O le a se mea e mafai ona ou faia e faaitiitia ai finauga ae fausia ai se nuu mutimuti alofa ma fetausia’i i le Ekalesia?”

A oo ina avea le alofa o Keriso ma mea aupito taua i o tatou olaga,²⁰ tatou te taulimaina feeseeseaiga i le agamalu, onosai, ma le agalelei.²¹ E tuuitiitia lo tatou popole i o tatou lava lagona ma’ale’ale ae tele atu le popole mo o tatou tuaoi. Tatou te “saili ia masuigamalie ma ia lotogatasi.”²² Tatou te lē auai i le “faamasinoina o masalosaloga,” faamasino i latou tatou te lē ioe i o latou manatu, pe taumafai foi e fai se mea ia latou tautevateva ai.²³ Ae, tatou te manatu faapea o i latou e eseese o tatou manatu o loo faia le mea sili latou te mafaia i aafiaga o le olaga latou te oo i ai.

Sa faigaluega lo’u toalua o se loia mo le silia ma le 20 tausaga. I le avea ai ma loia, sa tele ina faigaluega o ia ma isi e matua’i iloga ona fautuaina ni manatu faafeagai. Ae sa ia a’oa’o e le ioeina e aunoa ma le lē migao po o le ita. Sa mafai ona ia faapea atu i se loia o tetee, “Ua mafai ona ou iloa atu o le a tatou le ioe faatasi i lenei mataupu. Ou te fiafia ia te oe. Ou te faaaloalo i lou finagalo. Ou te faamoemoe e mafai ona e ofo mai ia te a’u lea lava foi faaaloalo e tasi.” E tele taimi e mafai ai ona maua le feāvata’i moni ma oo lava i faigauo e ui ina i ai eseesega.

E oo foi i ni fili na i ai, e mafai lava ona lotogatasi i le avea ai ma soo o le Faaola.²⁴ I le 2006, sa ou auai i le faapaiaga o le Malumalu o Helsinki Finelani e faamamaluina ai lo’u tamā ma matua matutua o ē sa avea ma uluai tagata liliu mai i le Ekalesia i Finelani. O le au Finelani, e aofia ai ma lo’u tamā, sa moemiti i se malumalu i Finelani mo le fiasefulu tausaga. I lena taimi, o le itu o le malumalu ua aofia ai Finelani, Esitonia, Lativia, Litunia, Pelarusi, ma Rusia.

I le faapaiaga, sa ou a’oa’oina ai se mea ofoofogia. O le aso muamua o le faagaoioiga masani sa faataatia ese mo tagata o le Ekalesia mai Rusia e faatino ai sauniga o le malumalu. E faigata ona faamatala le maofa tele o lenei mea. Sa tele taua na tauina e Rusia ma Finelani i le tele o seneturi. Sa lē talitonuina ma lē fiafia lo’u tamā e le gata ia Rusia ae o tagata Rusia uma. Sa ia faaalia ma le o’oo’o na lagona, ma o ona lagona o ni lagona masani o le ita o Finelani ia Rusia. Sa ia taulotoina ni lagisolo ta’uta’ua sa talafaasolo ai taua o le seneturi lona 19 i le va o Finelani ma Rusia. O ona aafiaga i le Taua Lona Lua a le Lalolagi ina ua toe fefaasagataua’i Finelani ma Rusia, na le’i suia ai lava ona manatu.

I se tausaga a o lumanai le faapaiaga o le Malumalu o Helsinki Finelani, sa fono ai le komiti o le Malumalu, sa aofia faapitoa ai tagata o le Ekalesia i Finelani, e talanoaina fuafuaga mo le faapaiaga. I le taimi o le fonotaga, sa matauina e se tasi o le a tele aso e faimalaga mai ai le Au Paia Rusia e auai i le faapaiaga ma atonu e faamoemoe ia maua o latou faamanuiaga o le malumalu a o le’i toe taliu i aiga. Sa fautuaina e le taitaifono o le komiti, o Uso Sven Eklund, e faapea e mafai ona faatalitali teisi le au Finelani, ae avea tagata Rusia ma uluai tagata e faatinoina sauniga o le malumalu i le malumalu. Sa malilie i ai sui auai uma o le komiti. Sa tolopo e Tagata Faatuatua o le Au Paia o Aso e Gata Ai i Finelani o latou faamanuiaga o le malumalu ina ia taulima ai le Au Paia mai Rusia.

O le Peresitene o le Eria sa i ai i lena fonotaga a le komiti o le malumalu, o Elder Dennis B. Neuenschwander, sa tusia mulimuli ane, “E le’i i ai se taimi muamua na sili ai ona ou mitamita i tagata Finelani nai lo lo’u mitamita i lea taimi. O le talafaasolopito faigata o Finelani ma lona tuaoi i sasa’e … ma lo latou fiafia na’ua ona ua i’u ina fauina [se malumalu] i o latou lava laueleele, na faataatia ese uma lava. O le faatagaina o tagata Rusia e ulufale muamua i le malumalu [sa] o se faaupuga o le alofa ma le ositaulaga.”²⁵

Ina ua ou lipoti atua lenei agalelei i lo’u tamā, sa liusuavaia lona loto ma tagi, o se mea e seāseā tupu i lena Finelani faatalatū. Mai lava i lena taimi se’ia oo ina maliu o ia, i le tolu tausaga mulimuli ane, na te le’i toe faaalia lava se isi manatu lē manuia e uiga ia Rusia. I le musuia ai i le faataitaiga a ona uso-a-Finelani, sa filifili lo’u tamā e faamuamua lona avea ma se soo o Iesu Keriso i lo isi mafaufauga uma. O le au Finelani sa le na o ni au Finelani; o Rusia sa le na o ni au Rusia; sa le’i lafoa’ia e se tasi o nei vaega a latou aganuu, talafaasolopito, po o aafiaga e tafiesea ai le feitaga’i. Sa le’i manaomia ona latou faia. Ae, sa latou filifili e fai lo latou avea ma soo o Iesu Keriso ma o latou faamuamua autu.²⁶

Afai e mafai ona latou faia, e mafai foi la ona tatou faia. E mafai ona tatou aumai o tatou tupu’aga, aganuu, ma aafiaga i le Ekalesia a Iesu Keriso. Sa le’i faafitia e Samuelu lona tupu’aga o se sa Lamana,²⁷ e le’i faafitia foi e Mamona lona tupu’aga o se sa Nifae.²⁸ Ae sa faamuamua e i la’ua taitoatasi lo la avea ma ni soo o le Faaola.

Afai e lē tasi i tatou, e lē a Ia i tatou.²⁹ O la’u valaaulia o le ia lotototoa i le faamuamuaina o lo tatou alofa i le Atua ma le avea ai ma soo o le Faaola i lo isi mafaufauga uma.³⁰ Ia tatou tausia le feagaiga o loo i ai i totonu o lo tatou avea ma ni soo—le feagaiga ia tasi.

Ia tatou mulimuli i le faataitaiga a le Au Paia mai le salafa o le lalolagi o ē ua faamanuiaina i le avea ai ma soo o Keriso. E mafai ona tatou faalagolago ia Iesu Keriso, o Ia o lo “tatou filemu, [o lē] na … soloia foi le pa vaeloto sa vaeluaina ai i tatou; ua ia faaumatia foi i lana [taulaga togiola] le feitaga’i.”³¹ O le a faamalosia la tatou molimau ia Iesu Keriso i le lalolagi, ma o le a tatou tumau i le soifua maloloina faaleagaga.³² Ou te molimau atu a tatou “tia’iese finauga,” ma avea “faapei o le Alii i le alofa ma lotogatasi ma Ia i le faatuatua,” o le a avea Lona filemu ma a tatou.³³ I le suafa o Iesu Keriso, amene.