Ko e Fuofua Fakamoʻoni ʻo Sīsū Kalaisí

ʻĪmisi

Sīsū Kalaisi ʻi Ketisemani

Kalaisi ʻi Ketisemani, tā fakatātaaʻi ʻe Michael T. Malm

ʻOku fie maʻu maʻupē ʻi heʻeku ngāue ko e palōfesá ke u fakahoko ha fakatotolo ʻi Selusalema fekauʻaki mo e Tohi Tapú mo e Ngaahi Takainga Tohi ʻo e Tahi Maté. Kuo tāpuekina au mo hoku uaifi ko Kamilá ke ma faʻa folaua e Tahi Kālelí. ʻOkú ma fakaʻaongaʻi e ngaahi faingamālie ko ʻení ke ma fakakaukau ai ki he ngaahi potufolofola lahi ʻoku fakamatala ki he ngaahi tahí.

Hangē ko ʻení, ʻoku pehē ʻe Maika ʻe hanga ʻe Sihova ʻo “lī [ʻetau] ngaahi angahala kotoa pē, ki he loloto ʻo e moaná” (Maika 7:19)—ʻo ʻikai ko ha konga siʻi pē ka ko e kotoa ʻo kinautolu. ʻOku ʻuhinga ʻa e “kotoá” ki ha fakamolemole kakato. ʻOku ʻuhinga ʻa e “lolotó” ki lalo ʻi he fukahi vaí, ʻa ia ʻe puli atu ʻetau ngaahi angahalá ʻo lauikuonga.

Meʻamālié, ʻoku ʻikai lī ʻe Sihova ʻetau ngaahi angahalá ki he matāfangá, ʻa ia ʻe lava ke mamata ki ai e niʻihi kehé. ʻIkai ngata aí, ʻoku hoko e vai ʻo e tahí ko ha fakafofonga ʻo e fakamaʻá. ʻOku fufulu ʻetau ngaahi angahalá ʻo fakafou ʻi he finangalo lelei ʻa Sihova ke fua ʻetau ngaahi angahalá (vakai, ʻĪsaia 53:11). ʻOku fakapapauʻi mai ʻe ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻi heʻetau fakatomalá, ʻoku fakapapauʻi ai hotau feituʻu ʻi Hono tafaʻakí (vakai, peesi 4)..

ʻOku ʻomi ʻe he kau palōfita kehe ʻi he Fuakava Motuʻá ha ngaahi potufolofola mālohi mo mahino fekauʻaki mo e Fakamoʻuí. ʻOku hoko ʻeni koeʻuhí ko e Fuakava Motuʻá, ko ha fakamatala ia ʻoku fakatefito ʻia Sīsū Kalaisi. Ko hono moʻoní, ko e Fuofua Fakamoʻoni ia ʻo Sīsū Kalaisí.

ʻOfa pē ʻe ongo kiate kimoutolu ʻa e foʻi moʻoni ko ʻení he taʻú ni ʻi hoʻomou ako ʻa e Fuakava Motuʻá, pea ʻoku ou fakatauange ʻe fakamālohia hoʻomou fakamoʻoni ki he moʻoni ko iá ʻi heʻeku kiʻi tokoni siʻisiʻi ki he Liahona ʻo e māhina ní (vakai, peesi 40)..

Fakaʻapaʻapa atu,

Donald W. Parry

Palōfesa ʻi he ʻUnivēsiti Pilikihami ʻIongí