“ʻOku Mau ʻi Heni Maʻau,” Liahona, ʻEpeleli 2022.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
ʻOku Mau ʻi Heni Maʻau
Te u manatuʻi maʻu pē ʻa e ngaahi fepōtalanoaʻaki mo e ʻofa naʻá ne tokoniʻi au ʻi heʻeku fononga faingataʻa ki ʻapí.
Naʻe toki ʻosi pē hoku faitoʻo kanisā ʻi Seni Tieko, Kalefōnia, USA, pea naʻe fie maʻu ke u fakaʻuli foki ki ʻapi, ʻi ha maile naʻe laka hake ʻi he 600 (km ʻe 965) hono mamaʻó. Naʻá ku helaʻia mo taʻelata, pea naʻá ku lotua ha tokoni mo ha fakahinohino.
Kuo laka hake ʻi he tuʻo 50 ʻeku fononga fakauike ki Seni Tieko ki ha senitā faitoʻo kanisā, ka naʻe faingataʻa ange ʻa e fonongá ni koeʻuhí ko e mahaki fakaʻauha COVID-19. Naʻe taʻofi ʻe he ngaahi fakangatangata ʻo e mahaki fakaʻauhá hoku uaifí mei heʻema fononga fakatahá, pea naʻe ʻikai ke u lava ʻo puna ʻi ha vakapuna he naʻe hohaʻa ʻeku kau toketaá naʻá ku maʻu e vailasí. Kapau te u puke, mahalo he ʻikai ke u toe moʻui. Ko e fili pē ne toé ke u fakaʻuli meʻalele pē.
Naʻe tā telefoni mai hoku uaifí mo ʻeku faʻeé. Ne na fakatou hohaʻa koeʻuhí ko au. Ko ha fāinga ʻeni ʻe fuoloa.
ʻI he ʻiloʻi ʻe hoku tokoua ngāue fakaetauhi ko Misa Poloú naʻá ku ʻi Seni Tieko pea teu ke u foki ki ʻapí, naʻá ne hohaʻa foki. Naʻá ne fetuʻutaki mai ke vakaiʻi au pea fokotuʻutuʻu ha taimi-tēpile fepōtalanoaʻaki telefoni. Naʻá ne kole ki ha kau mēmipa ʻe niʻihi ʻo ʻemau kōlomu kaumātuʻá ke nau taufetongi ʻi he tā telefoni mo talanoa mai kiate au ʻi ha houa ʻe taha. ʻE hoko ʻenau tā telefoni maí ko ha fakafeʻao, fakaʻāʻā mo ha fakatokanga.
Lolotonga ʻeku fakaʻuli houa ʻe 10, naʻá ku fiefia ʻi he feohi mo e kau tangata leleí ni ʻi heʻenau talanoa mai kiate aú. ʻI he ʻosi pē ʻa e houa takitaha, ne mau pōpoaki fakamāvae leva. ʻE toe tatangi mai leva ʻeku telefoní, pea naʻá ku ʻai leva ke ongo mai e lea ʻa e tokotaha tā telefoni foʻoú ʻi he meʻa fakaleʻolahi ʻeku kaá.
ʻI heʻeku fakamālō ki he kau tā telefoni maí, ne nau faʻa pehē, “ʻOku ou fiefia ʻi heʻeku lava ʻo tokoní. Tokoua, ʻoku mau ʻi heni maʻau.”
ʻI heʻeku manatu ki he angaʻofa ʻa e kau tangata lelei ko ʻeni ʻa ia ne nau toʻo ha houa ʻe taha ʻo honau taimi mohé ke tokonia au ke u aʻu lelei ki ʻapí, ko ha meʻa fakamāfana. Ko ha pō lōloa moʻoni ʻeni, ka te u manatuʻi maʻu pē ʻemau pōtalanoá mo e ʻofa ne fakahaaʻi mai ʻe he kau tangata ko ʻení.
ʻOku tau ʻi ha fonongaʻanga lōloa mo faingataʻa he taimi ʻe niʻihi, ki hotau ʻapi fakalangí. ʻOku tau fie maʻu kotoa pē ha kakai lelei ke fakalotolahiʻi kitautolu ʻi heʻetau fonongá.
ʻOku ou houngaʻia ʻi he kakai tokolahi kuo nau lotua au mo hoku fāmilí, tokoniʻi, mo ʻofaʻi kimautolu lolotonga e taimi fuoloa ne u fefaʻuhi ai mo e kanisaá—tautautefito ki he kau tangata ʻi heʻemau kōlomu kaumātuʻá kuo nau tokoniʻi, poupouʻi, mo tataki kimautolu ʻi he foʻi laka kotoa pē ʻo e fonongá (vakai, Mātiu 25:35–40).