Ko Sīsū Kalaisi Hotau Fakamoʻuí

Lau fekauʻaki mo e founga ʻoku tuhu ai ʻa e Fuakava Motuʻá ki he Fakalelei ʻa Kalaisí ʻi he peesi 40. Hiki ha lisi ʻo e ngaahi sīpinga ʻo e Fakalelei ʻa e Fakamoʻuí ʻi he Fuakava Motuʻá.

Naʻe fakamoʻoni e kau palōfitá, kau ai mo kinautolu ʻi he Fuakava Motuʻá, kia Sīsū Kalaisi mo ʻEne Fakaleleí. Aleaʻi mo ho fāmilí ʻa e founga ʻoku kei tatau ai pē ʻa e fatongia ʻo e kau palōfitá he ʻaho ní. Kuo fakamoʻoniʻi fēfē ʻe he palōfitá kimuí ni ʻa Kalaisi?

Lau e fakamatala ʻa ʻEletā Tanikeni ʻi he peesi 44 fekauʻaki mo e fakafanongo mo e talangofua ki he kau taki ʻo e Siasí. Aleaʻi mo ho fāmilí ʻa e ʻuhinga ʻoku mahuʻinga ai ke tau muimui ki he faleʻi kuo fai mai ʻe hotau kau takí. ʻE lava ke ke fakaafeʻi ho fāmilí ke mou vaʻinga ʻi he “ʻOku pehē ʻe Saimoné (Simon Says)” ke fakatātaaʻi ʻa e tefitoʻi moʻoni ko ʻení.

Vakai ki he peesi 48 ki hano fakafehoanaki ʻo e ngaahi fakataipe ʻo e ʻuluaki Laka Atú mo e Fakalelei ʻa Sīsū Kalaisí ke poupou ki he ako fakauike ho fāmilí ʻi he Haʻu, ʻo Muimui ʻIate Aú.

ʻEkesōtosi 14–17

ʻĪmisi

fakatātā ʻo hono fokotuʻu ʻe Mōsese ʻa e vaʻa ukameá mo hono fakamavaeuaʻi ʻo e Tahi Kulokulá

ʻI he tokoni ʻa e ʻEikí, naʻe tataki ʻe Mōsese e fānau ʻa ʻIsilelí mei ʻIsipite. Ne nau ilifia he naʻe taʻofi kinautolu ʻe he Tahi Kulokulá pea tulimui mai e kau tau ʻa Feló ʻiate kinautolu. “‘Pea pehē ʻe Mōsese ki he kakaí, ʻOua te mou manavahē, tuʻu fakalongolongo pē, ʻo mamata ki he fakamoʻui ʻa [e ʻEikí]” (ʻEkesōtosi 14:13).

1. Fakaʻaliʻali ha fakatātā ʻo e mavaeua ʻa e Tahi Kulokulá. Lau fakataha ʻa e ʻEkesōtosi 14:21–29. Fakatokangaʻi ange e ngaahi ngāue ʻi he ngaahi veesi ko iá.

2. Fakafaivaʻi hono fakamavaeuaʻi ʻo e Tahi Kulokulá, ʻo fakaʻaongaʻi ʻa e ngaahi fakatātā ʻi ʻolungá. Toutou fakahoko ia kae ʻoua kuo maʻu ʻe he tokotaha kotoa pē ha faingamālie ke ne fakatātaaʻi ʻa e ngaahi konga ʻoku nau fie maʻú.

Fealēleaʻakí: Naʻe fakaʻaongaʻi fēfē ʻe he fānau ʻo ʻIsilelí ʻa e tuí ʻaki ʻenau fakahoko e meʻa naʻe fekau ʻe he ʻEikí? Te tau fakaʻaongaʻi fēfē ʻa e tuí ʻi he taimi ʻoku tau aʻusia ai ha ngaahi faingataʻa ʻi heʻetau moʻuí?

ʻEkesōtosi 20

Lau e Fekau ʻe Hongofulú (ʻEkesōtosi 20:3–17). Naʻe foaki ʻe he ʻOtuá e ngaahi fono ko ʻení ki he kakai ʻIsilelí ke tokoni ke nau tupulaki fakalaumālie mo moʻui lelei ange. ʻOku toe maʻu foki e ngaahi fekaú ʻi he Tohi ʻa Molomoná (vakai, Mōsaia 13:11–24) pea pehē ki he Tokāteline mo e Ngaahi Fuakavá (vakai, 42:18–29; 59). ʻE lava fēfē ke tokoniʻi kitautolu ʻe he ngaahi fekaú ʻi he ʻahó ni?

1. Hiki takitaha e ngaahi Fekau ʻe Hongofulú ʻi ha ngaahi laʻipepa kehekehe.

2. ʻAi ke tangutu fuopotopoto e fāmilí pea tuku e ngaahi fekaú ʻi lotomālie.

3. ʻAi ke lau ʻe he tokotaha takitaha ha fekau pea talaange ʻa e anga ʻene feʻunga mo ha taha ʻo e ngaahi kulupu ko ʻení:

   • ʻOku akoʻi kitautolu ʻe he Ngaahi Fekau 1–4 ki he ʻofa ʻa e ʻOtuá.

   • ʻOku akoʻi kitautolu ʻe he Ngaahi Fekau 5–10 ki hotau ngaahi vā fetuʻutakí mo ʻetau feohi mo e niʻihi kehé.

4. Ko e lahi taha ʻo e ngaahi fekaú ʻoku talamai ai e meʻa he ʻikai ke tau faí. Tuku ki he mēmipa takitaha ʻo e fāmilí ke nau fakakaukau ki ha ngāue lelei ki he fekau takitaha.

Fealēleaʻakí: Fakakaukau ki ha ngaahi founga kuo tākiekina ai ʻe he Fekau ʻe Hongofulú hoʻo moʻuí mo e anga fakafonua ʻokú ke moʻui aí. Ko e hā te tau lava ʻo fai ke manatuʻi ai e ngaahi fekaú mo muimui ki aí?