“Feituʻu Naʻá ku Maʻu ai ʻa e Fiemālié,” Liahona, ʻEpeleli 2022.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Feituʻu Naʻá ku Maʻu ai ʻa e Fiemālié
ʻI he hiva mai ʻeku ongo tangata ngāue fakaetauhí, naʻá na fakamālohia ʻeku fakamoʻoni ʻoku mahino, ʻofaʻi, pea he ʻikai teitei liʻaki au ʻe he Fakamoʻuí.
ʻI he taimi naʻá ku mali aí, naʻe ʻikai ke u teitei fakakaukau ʻe hoko ʻa e foʻi lea vete malí ko ha konga ʻo hoku hisitōlia fakataautahá. Neongo ʻeku kole mo e feinga lelei taha ke fakahaofi homa vā fetuʻutakí, naʻe mavahe hoku husepānití pea ngata ʻema nofo-malí. Ne u ongoʻi ʻo ne ʻikai ke u lava ha meʻa.
Naʻe hoko ai ha taimi ʻo e mamahi lahi, fakamāʻia mo e ʻamanaki kuo ʻikai ke hoko. Kuo teʻeki ai ke u aʻusia ha mole pe mamahi lahi ange.
ʻI he uhouhonga ʻo ʻeku mamahí, naʻe ʻaʻahi mai ʻeku ongo tangata ngāue fakaetauhi. Ne na fakafiemālieʻi au mo foaki mai ha tāpuaki. ʻI hona leʻo matolú, ne na hivaʻi haʻaku foʻi himi ne ʻikai ke u ʻiloʻi. ʻI he taimi faingataʻa ko iá kiate au, ko e himi fakaʻofoʻofa mo fakanonga taha ia kuo faifaiange peá u fanongoá. Ne peheni ʻena hivá:
[Te u maʻu mei fē ʻa e melinó?
Ko fē hoku fakafiemālieʻangá
ʻI he taimi kuo ʻikai ke toe ʻi ai ha maʻuʻanga tokoni ke ne fakafiefiaʻi aú?
Pea kafo e lotó, loto ʻitá, pe mafasiá,
Ne u fakamamaʻo moʻoni au,
Fekumi ki hoku laumālié? …
ʻOku ʻifē ʻa e toʻukupu fakanonga ke ne feau hoku mamahí?
Ko hai, ko hai ʻe mahino ki aí?
Ko Ia, Tokotaha pē]. 1
Naʻe ʻikai ke u malava ʻo mapukepuke hoku loʻimatá ʻi he ngaahi leá mo e hivá. Naʻá na fakapapauʻi mai kiate au, mo fakamālohia ʻeku fakamoʻoní, ʻa e moʻoni ko ia ʻoku mahino ki he Fakamoʻuí hoku tūkungá, ʻofaʻi au, pea he ʻikai te Ne teitei liʻaki au ʻi hoku mamahí.
Koeʻuhí ko e meʻa naʻe aʻusia ʻe he Fakamoʻuí ʻi Heʻene Fakaleleí, ʻoku mahino ai kiate Ia ʻa e ngaahi ongo ʻoku tau maʻú. Neongo pe ko e hā e ngaahi tūkunga faingataʻa ʻoku tau fehangahangai mo iá, ʻokú Ne ʻafioʻi ʻetau mamahí. Naʻá Ne mamahí maʻatautolu. (Vakai, ʻAlamā 7:11–12.)
ʻI he ʻosi e hiva ʻeku ongo tangata ngāue fakaetauhí, naʻá ku manatuʻi e ngaahi lea naʻe fakaʻaongaʻi ʻe ʻĪsaia ke fakamatalaʻi ʻaki ʻa e Fakamoʻuí: “Ko e moʻoni kuó ne toʻo kiate ia ʻa ʻetau ngaahi vaivaí, ʻo ne fua ʻetau ngaahi mamahí. … Pea ʻi hono ngaahi taá ʻoku tau moʻui ai’ (ʻĪsaia 53:4–5).
Te tau lava ʻo fakapapauʻi ʻoku mahino ki hotau Fakamoʻui ko Sīsū Kalaisí hotau ngaahi tūkungá, ʻofa ʻiate kitautolu, pea te Ne ʻi hotau tafaʻakí maʻu pē—naʻa mo ʻetau ngaahi mamahi taupotu tahá.