Fakakomipiuta Pē: Kakai Lalahi Kei Talavoú
Ko e Meʻa Naʻe Akoʻi Mai ʻe ha Tengaʻi Hina Fekauʻaki mo e ʻOfa ʻa e ʻOtuá
Naʻá ku ako ko e taimi ʻoku tau tanumaki ai e ʻofa ʻa e ʻOtuá ʻi he angaʻofá, fakaʻapaʻapá, manavaʻofá, mo e fakakau maí, ʻe tupulekina lahi ia.
Naʻe ʻātakaiʻi hoku ʻapí ʻi heʻeku kei siʻí ʻe ha ngaahi ngoueʻanga musie. ʻI hoku taʻu hivá, naʻá ku fakaʻataʻatā ha kiʻi konga siʻisiʻi ʻi he veʻe ngoué ke tō ai ha ngoue. ʻI he konga kimuʻa ʻo e faʻahitaʻu failaú, naʻá ku tō ha foʻi tengaʻi hina ʻe taha pea tokangaʻi ia ʻi he ʻaho kotoa pē, mo e vēkeveke ke huli haké. ʻI ha ngaahi ʻaho siʻi pē mei ai, naʻá ku fiefia ʻi he ʻasi hake e fanga kiʻi lauʻiʻakau lanu mata ʻi he kelekelé. ʻI he ngaahi ʻaho mo e uike ne hoko atu aí, naʻá ku ofo ʻi he vave e tupu ʻa ʻeku kiʻi tengaʻi hina pē ʻe tahá. ʻI he fengāueʻaki fakalangi ʻa e tengaʻi ʻakaú, kelekelé, huelo ʻo e laʻaá mo e vaí, ne fakaofo e liliu ʻeku kiʻi tengaʻi ʻakaú ki he fuʻu hina ne totolo ki he feituʻu kehekehe.
Hili ha kiʻi taimi nounou mei ai, naʻe ʻasi mai ha ngaahi foʻi moto lanu mata ne toki matala ai e matalaʻi ʻakau lanu moli mo engeenga. Pea ʻi he lolotonga ʻo e faʻahitaʻu māfaná, naʻe liliu ʻa e ngaahi foʻi motó ko ha ngaahi foʻi hina lanu moli fōlalahi. ʻI he hokosia e taimi ke toli aí, naʻá ku tofi hake ʻeku ngaahi foʻi hiná. Naʻá ku ʻohovale! Kuo tupu ʻi he foʻi hina takitaha ha tengaʻi ʻakau ʻe laungeau.
Mahalo te ke fakakaukau loto pē, “ʻOku fakaʻofoʻofa ia, ka ko e hā e kaunga ʻa e tengaʻi hina ko ʻení ki heʻeku hoko ko ha tokotaha lahi kei talavoú?” ʻI heʻeku vakai ki he ngaahi tengaʻi ʻakau taʻefaʻalaua ne maʻu mei heʻeku tolí, naʻe fakafokifā pē ʻa e mahino kiate au ʻa e malava ke liliu ʻa e (tengaʻi ʻakau) siʻisiʻi ʻe tahá ʻi he tokoni ʻa e ʻOtuá ʻo hoko ko e tengaʻi ʻakau taʻefakangatangata mo taʻengata. Naʻá ku mamata “ʻoku ʻikai ha meʻa ʻe faingataʻa ki he ʻOtuá” (Luke 1:37). Naʻá ku aʻusia ʻa e moʻoni ʻo e ngaahi lea ʻi he folofolá “ʻoku fakahoko ʻe he fanga kiʻi meʻa iiki mo faingofuá ʻa e ngaahi fuʻu meʻa lalahi” (ʻAlamā 37:6).
Naʻe fakatupu ʻe he ʻOtuá ʻeku kiʻi foʻi tengaʻi hiná ke ʻomi ai ha ngaahi tengaʻi ʻakau taʻefaʻalaua, ʻe tupulaki mo fakalakalaka ʻi ha founga he ʻikai toe ʻosi. Pea ʻoku tatau pē ia mo ha ngaahi meʻa lahi kehe ʻi heʻetau moʻuí, kau ai ʻa e malava ke ongoʻi mo vahevahe ʻEne ʻofa fakalangí.
Ko Hono Tanumaki e ʻOfa ʻa e ʻOtuá
ʻI he fakalau ʻa e taimí, kuo mahino kiate au kuo tōkaki ʻe heʻetau Tamai Hēvani ʻofá ʻiate kitautolu ʻa e tenga ʻo ʻEne ʻofa taʻengatá. ʻOku feʻunga e ʻofa ʻa e ʻOtuá ʻiate kitautolú ke tōkaki ʻEne ʻofá ʻi hotau laumālié ʻaki ʻa e taumuʻa te tau tanumaki mo fakatupulaki ia ʻi he ngāue tokoní, tuí, fakatomalá, mo hono tauhi ʻo e fuakavá.
Kae fēfē leva e ngaahi taimi ko ia ʻi he moʻuí ʻoku tau ongoʻi mamaʻo ai mei he ʻofa ʻa e ʻOtuá? Ko e taimi ʻe niʻihi ʻoku tau ongoʻi mamaʻo meiate Ia koeʻuhí kuo tau fai ha ngaahi fehalaaki pe fai angahala pea ʻoku teʻeki ai ke tau maʻu ʻa e mālohi pe loto-toʻa ke fakahoko ʻa e ʻuluaki sitepu ki he fakatomalá. Taimi ʻe niʻihi ʻoku tau fuʻu femoʻuekina pea tohoakiʻi ʻetau tokangá ʻe he ngaahi meʻa kehe ʻoku hoko ʻi he moʻuí ʻo ngalo ai ʻiate kitautolu pe fakatoloi ke tau fakahoko ʻa e fanga kiʻi meʻa iiki ʻoku tokoni ke tau ongoʻi ofi ange ai ki heʻetau Tamai Hēvaní mo ʻEne ʻofá. Mahalo te tau ongoʻi foki ʻoku fuʻu lahi haʻatau lotu ʻoku ʻikai tali pe fuʻu tokolahi ha kakai kuo nau fakamamahiʻi kitautolu pe ko e taimi naʻe ʻikai tokoniʻi ai kitautolu ʻe he ʻOtuá.
Mahalo te tau ongoʻi ʻoku ʻikai ke tau maʻu e ʻofa ʻa e ʻOtuá ʻi heʻetau moʻuí ʻo ʻikai ke tau lava ʻo ʻiloʻi ʻa e founga te tau vahevahe ai ʻa e ʻofa ko iá mo e niʻihi kehé.
Ka neongo pe ko e hā e tuʻunga ʻoku ʻi ai ʻetau moʻuí, tatau ai pē pe ko e hā ha faingataʻa pe fakamaau taʻetotonu kuo tau kātekiná, ʻe lava ke tupulaki e ʻofa ʻa ʻetau Tamai Hēvaní ʻi he ngaahi faingataʻa ʻi heʻetau moʻuí. Te ne lava ʻo ikunaʻi ʻa e mamahí, loto ʻitá, mo e taʻefiemālie kotoa pē. Kapau te tau tanumaki ʻa e ʻofa ʻa e ʻOtuá ʻi he angaʻofá, fakaʻapaʻapá, manavaʻofá, mo hono fakakau maí, ʻe tupulekina lahi ia. ʻE hoko ʻetau malava ko ia ke ʻofa mo tokoniʻi e niʻihi kehé ʻo taʻefakangatangata, taʻengata, pea toe fakaʻofoʻofa ange ʻi he meʻa ne tau fakaʻānaua ki aí.
ʻI heʻetau tanumaki e tenga ʻo e ʻofa ʻa e ʻOtuá ʻiate kitautolú, te tau lava ʻo utu e ʻofa haohaoa ʻa Kalaisí—ʻa e ʻofa faka-Kalaisí (vakai, Molonai 7:47). ʻOku utu foki ʻe kinautolu ʻoku nau tanumaki e tenga ʻo e ʻofa ʻa e ʻOtuá ha ngaahi kaungāmeʻa, maheni, mo e tui lahi ange—ko ha meʻa ʻe tolu ʻe lava ke ʻaonga ki he kakai lalahi kei talavou kotoa pē! ʻI heʻetau tanumaki fakalelei ʻa e tenga ʻo e ʻofa ʻa e ʻOtuá, te tau lava ʻo aʻusia ha ututaʻu taʻefakangatangata ʻo e ʻofa taʻengatá ʻi heʻetau ngaahi fetuʻutaki fakafāmilí, ʻetau ngāue ʻi he Siasí, pea mo ʻetau moʻui fakatāutahá.
Ko Hono Vahevahe ʻo e ʻOfa ʻa e ʻOtuá
ʻOku akoʻi ʻe he folofolá “ko e ʻOtuá ko e ʻofa” (1 Sione 4:8). Naʻe pehē ʻe Palesiteni M. Lāsolo Pālati, ko e Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá, ko e “ʻulungaanga mahuʻinga taha ʻo e Tamai Hēvaní mo Hono ʻAlo ʻOfaʻangá ʻa ia ʻoku totonu ke tau holi mo fekumi ke maʻu ia ʻi heʻetau moʻuí, ʻa ia ko e meʻafoaki ʻo e ʻofa faka-Kalaisí, ʻa e ʻʻofa haohaoa ʻa Kalaisíʼ (Molonai 7:47).”1
ʻOku hanga ʻe he ʻofa haohaoa ko ʻeni a Kalaisí ʻo ʻai ke tau lava ʻo ʻofa mo tokoni ki he niʻihi kehe ʻo hangē ko ia ne fai ʻe he Fakamoʻuí. ʻI heʻetau muimui ki he sīpinga ʻo e ngāue tokoni ʻa Kalaisí, ʻoku tau ʻilo ai ʻiate kitautolu e ʻofa ʻa e ʻOtuá pea ako e founga ke vahevahe ai e ʻofa ko iá.
ʻOku ʻiloʻi ʻe kinautolu ʻoku nau ʻiloʻi lelei aú ʻoku ou kei faʻo holo pē ha tengaʻi hina ʻi hoku kató ke fakamanatu mai e lēsoni mahuʻinga ʻo e moʻuí ne u akó: ʻE lava ke toʻo ʻe he Tamai Hēvaní ha kiʻi meʻa siʻisiʻi ʻo hangē pē ko e tenga ʻo e ʻofá ʻi heʻetau moʻuí pea liliu ia ko e ʻofa ʻoku mālohi, ʻikai hano ngataʻanga, pea taʻengata mo e tauhi ki he ʻOtuá, kaungāʻapí, mo kita.