Feituʻu ʻoku Hoko Moʻoni ai e Ngaahi Fakaʻānauá

ʻĪmisi

Saiami, ko hono uaifi ko Latihiká, mo hona fohá

Tā ʻo Saiami, ko hono uaifi ko Latihiká, mo hona foha ko Lisiate M. Lominií

Ne ʻi ai ha ʻuhinga ne fakakaukau ai ha kiʻi taʻahine angalelei ʻi hoku foomu 4 he ako maʻolungá ke ʻomai haʻaku tatau ʻo e Tohi ʻa Molomoná ʻi he lea faka-Pilitāniá. Naʻe ʻikai ke u ʻilo pe ko e hā ia. Naʻe ʻomi ʻe heʻeku tangataʻeikí ha tohi naʻe fakanounouʻi ai e ngaahi talanoa ʻi he Tohi Tapú ʻi he lea faka-Hinitī ʻi heʻeku kei siʻí. Ko ia, ʻi heʻeku feinga ke lau ha ngaahi peesi ʻi he Tohi ʻa Molomoná peá u sio ki he huafa ʻo Sīsū Kalaisí, naʻá ku fakakaukau, “ʻOku hangē ʻeni ko e Tohi Tapú.”

Naʻá ku tauhi e tohí ka naʻá ku tukunoaʻi pē ia. Naʻe ʻikai ke u lea faka-Pilitānia, neongo naʻá ku ako ia ʻi he ako māʻolungá. ʻI he meimei taimi tatau pē, naʻá ku kamata teuteu ki he ngaahi siví mo hoku kaungāmeʻa naʻá ne ʻomi ʻa e Tohi ʻa Molomoná. Naʻe sai kotoa ʻeku ngaahi lēsoni fakaakó tukukehe ʻa e taha.

Naʻá ku talaange ki hoku kaungāmeʻá, “ʻOku ou hohaʻa ʻaupito ki heʻeku ngaahi sivi lea faka-Pilitāniá. ʻOku ou manavasiʻi naʻa faifai peá u tō.”

Naʻá ne tali mai, “ʻOku ʻi ai haʻaku ngaahi kaungāmeʻa te nau lava ʻo tokoni atu ke ke ako e lea faka-Pilitāniá.”

Ko e ngaahi kaungāmeʻa ko iá ko e kau faifekau mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe ʻikai fuoloa kuó na kamata haʻu ki hoku ʻapí ʻo ʻomi ha ngaahi lēsoni kalama lea faka-Pilitānia. Hili ha ngaahi uike siʻi, naʻá na kamata akoʻi mai e ongoongoleleí kiate au.

ʻI heʻeku fakatotolo ki he Siasí, naʻe akoʻi au ʻe he ongo faifekaú fekauʻaki mo e ngaahi fua ʻo e Laumālié (vakai Kalētia 5:22–23) mo tokoni ke mahino kiate au e founga ʻoku lea mai ai e Laumālié kiate kitautolú. Naʻá na talamai foki ke u fehuʻi ki he Tamai Hēvaní pe ʻoku moʻoni ʻena pōpoakí. ʻI heʻeku lotú, naʻe ʻikai ke u ʻamanaki ki ha tali hangē ko ia naʻe maʻu e Siosefa Sāmitá, ka naʻá ku fie maʻu ha tali ke haʻu ʻi he founga naʻá ku ʻiloʻi naʻá ku fai ʻa e fili ʻoku totonú.

Naʻe maʻu e tali ki heʻeku lotú kuo fuoloa e poʻulí ʻi ha founga he ʻikai ke u lava ʻo fakaʻikaiʻi. Ko ha tali ia naʻe fonu ʻi he māmá mo e nongá. Naʻá ku ongoʻi naʻe langaki hake ʻeku moʻuí peá u toe fanauʻi foʻou. Naʻá ku ongoʻi ʻo hangē ne u fie maʻu ke u hoko ko e tokotaha angalelei taha ʻi he māmaní. Naʻe ʻafioʻi ʻe he ʻOtuá ʻa e founga ke tali ʻaki aú, pea naʻá ku ʻiloʻi ʻa e meʻa ke fai hili iá. Ko hono moʻoní, naʻá ku manavahē ʻi he meʻa ʻe ala hoko kiate au kapau ʻe ʻikai te u papitaiso.

ʻI heʻeku talaange ki heʻeku ongomātuʻá, naʻe fakafepakiʻi ia ʻe heʻeku tangataʻeikí—ʻo ʻikai koeʻuhí he ʻoku ʻikai ko ha tangata lelei ia ka koeʻuhí ko e teke mālohi ʻa e anga fakafonuá. Naʻe ʻikai ke ne fakapapauʻi pe ʻe tali fēfē ʻe homau koló ʻeku papitaisó.

Naʻá ne talamai, “Kapau te ke papitaiso, ʻe tuli koe mei hotau ʻapí.”

Naʻá ku loʻimataʻia ʻi heʻeku talaange ki heʻeku faʻeé, “ʻOku ou fie papitaiso moʻoni, ka ko e meʻa ʻeni ʻoku lea ʻaki ʻe he Tangataʻeikí.”

Naʻá ne tali mai, “ʻAlu koe. Te tau sio pe ko e hā e meʻa ʻe hokó.

Naʻá ku ʻalu leva ʻo papitaiso. Hili iá, naʻe ʻikai ke u toe tafoki. Ko e meʻa pē naʻá ku mamata ki aí ko ha ngaahi tāpuaki maʻongoʻonga ʻi heʻeku moʻuí.

Naʻe ʻikai ke tuli au ʻe heʻeku tangataʻeikí, ka naʻe faingataʻa ʻa e moʻuí ʻi ʻapi ʻi ha taʻu ʻe taha pe ua. ʻI he taimi ʻoku hoko ai ha meʻa faingataʻa ʻi homau fāmilí, naʻe fakakaukau ha niʻihi ʻo homau kāingá mo e fāmilí ko e hoko ʻeni koeʻuhí ko ʻeku lavakiʻi e ngaahi ʻotuá ʻaki ʻeku fili ke tali e ongoongoleleí. Ka ʻi he vakai ʻeku ongomātuʻá ki he ngaahi liliu lelei ʻiate aú, naʻe liliu e ngaahi meʻá ʻi ʻapi. Hili ha taʻu ʻe ua mei heʻeku kau ki he Siasí, naʻá ku papitaiso hoku ongo kiʻi tuofafine īkí. Naʻe papitaiso kimui ange ai hoku tuofefine ʻe taha.