Kōjem ko an Jetōb Renaaj Peļļo̧k: Ennaan kōn tampeļ eo jān Būreejtōn Nelson

Kiiō jen oktakļo̧k n̄an unin kōnono eo an tampeļ ko,” rikanaan eo ad Būreejtōn Russell M. Nelson ekar ba ilo Oktoba 2018 Kweilo̧k eo Eļap.

Ilo kōmeļeļe ko an rekwojarjar kōn wāween ad erom̧ riwaanjon̄ak ro me rej Armej ro Rekwojarjar ilo Raan Ko Āliktata, ej kab m̧ōj an rōjan̄̄ kōj n̄an ukōt m̧ōko n̄an jikin ekkatak gospel im kakeememej kōj kōn aorōk in kōjerbale et eo ejim̧we etan Kabun̄ eo an Rilo̧mo̧o̧r: Kabun̄ eo an Jisōs Kraist im Armej ro Rekwojarjar ilo Raan Ko Āliktata.

Innām, ekar kajjitōk ilo jouj n̄an aolep armej n̄an kōm̧m̧an bwe tampeļ en juon men eaorōk.

“Jejeļā bwe iien ko ad ilo tampeļ eo eaorōk n̄an lo̧mo̧o̧r eo ad im ad mour ijo ilōn̄tata im n̄an baam̧le ko ad,” ekar ba:

“Ālkin ad bōk kain̄i ko an tampeļ ko ad make im kōm̧m̧ani bujen ko rekwojarjar ippān Anij, kōj kajjojo jej aikuj kōkajoor in jetōb eo ejjab bōjrak im ekkatak eo me emaron̄ kōm̧m̧an wōt ilo m̧weo im̧ōn Irooj. Im rūtto ro jibūd im jim̧aad rej aikuji ad jerbal n̄an er ilo ad jerbal ilo etaer.

“Ļōmņak kōn tūriamo̧ eo eļap im jim̧we eo an Anij, eo, me m̧okta jān pedped ko an laļ, ekar kōpooje juon iaļ n̄an leļo̧k kōjeraam̧m̧an ko an tampeļ n̄an ro rekar mej ilo an ejjeļo̧k aer jeļā kōn gospel eo. M̧akūtkūt kein rekwojarjar an tampeļ rej jān etto. N̄an n̄a wāween ko rekarbōb jān etto rekam̧ōņōņō im bar juon kallim̧ur in aer m̧ool.

“Ro jeiū im jatū, jodik ko an rikapo eo rej ļapļo̧k im ļapļo̧k, ilo kajoor im lōn̄ wāweer. Ad aikuj pād ilo tampeļ eo ilo kajjojo iien ej jan̄in kar ļapļo̧k. Ij akweļap n̄an kom̧ bwe kom̧win lukkun jar im lale wāween ami joļo̧k iien ko ami. Kōwōrļo̧k ami iien ilo ilju im jekļaj im iien ko an baam̧le ko ami. Eļan̄n̄e ewōr ami un ko n̄an deļo̧n̄e juon tampeļ, ij rōjan̄ kom̧ n̄an pukot juon iien kom̧ij karōke im en emakijkij ippān Irooj—n̄an pād ilo m̧weo ekwojarjar im̧ōn Irooj—innām kōjparok iien ņe kōn jejjet im lan̄lōn̄. Ij kallim̧ur kom̧ bwe Irooj enaaj bōktok kabwilōn̄lōn̄ ko Ejeļā ke kom̧ij aikuji ilo ami kōm̧m̧an kaarmejete ko n̄an jerbal im kabun̄jar ilo tampeļ ko An.”¹

Ilo bar juon ennaan eim̧we, Būreejtōn Nelson ekar ba, “jabdewōt iien jabdewōt men rej waļo̧k ilo mour eo am̧, jikin eo ejokņe tata n̄an mour ilo jetōb ej mour ilowaan bujen ko am̧ ilo tampeļ.”²

Ekar jino katak eo an ilo an kōmeļeļeik pen in jerbal eo aikuji n̄an kalōk Salt Lake Tampeļ me jen etto—ilo Taujin iiō—ņae ļan̄̄ ko an mejatoto. Innām, ekar kōmeļeļeik ewi jon̄an aorōkin n̄an kōj n̄an kōkajoor pedped in tōmak ko ad, kōnke kiiō, eļapļo̧k jān kar m̧okta, lo̧mo̧o̧r eo ad indeeo ekauwōtata jān ļan̄ ko an mour in.

“Ro jeiū im jatū rejitōb bōro, iien kein rej raan ko āliktata. Eļan̄n̄e kwe im n̄a aikuj in jutak ņae kauwōtata ko im kareel ko, elukkuun aorōk bwe kōj kajjojo ej aikuj wōr juon ad pedped eo epen kar kalōke ioon ejm̧aan an ad Rilo̧mo̧o̧r, Jisōs Kraist” (Lale Hilamōn 5:12).

“Kōn menin ij kajjitōk ippāmi kajjojo, epen ke pedped eo ami? Im ta kein kōkajoor ko n̄an naan in kam̧ool eo ami im meļeļe eo ami kōn gospel eo kom̧ij aikuji?

“Tampeļ eo ej pād ioļap n̄an kōkajoorļo̧k tōmak eo ad im kōkajoor jetōb eo ilo kōj kōnke Rilo̧mo̧o̧r im katak ko An rej lukkuun unleplep in tampeļ. Men otemjej katakin ilowaan tampeļ eo, jān kōmeļeļe im jān Jetōb eo, ej kōļapļo̧k ad meļeļe kōn Jisōs Kraist. Kain̄i ko An raorōk rej likwōj kōj n̄an E kōn bujen ko rekwojarjar an priesthood. Innām, ilo ad kōjparoki bujen ko ad, Ej letok n̄an kōj An kōmour, im kajoor in kōkajoorļo̧k (lale Katak im Bujen ko 109:15, 22). Im o, ekōjkan ad naaj aikuji kajoor eo An ilo raan ko rej pād im̧aan.

“Jekar bōk juon kallim̧ur ‘bwe eļan̄n̄e [jej] pojak [jej] jamin mijak,’ (Katak im Bujen ko 38:30; lale Katak im Bujen 10:55). Kallim̧ur in eļap tokjen rainin. Irooj ekar kwaļo̧k bwe men̄e apan̄ ko jekar jab jeļā kaki rainin, ro rej kalōk pedped eo aer ioon Jisōs Kraist, im kar ekkatak wāween n̄an kepaakļo̧k kajoor eo An, ban aikuj inepata kōn tōre kein.”³

Būreejtōn Nelson ej wōnmanļo̧k wōt, “n̄an kom̧ kajjojo ro rekar kōm̧m̧an bujen ko an tampeļ, ij akweļap ippemi n̄an kappukot—jar im jokkun wōt juon—n̄an meļeļe bujen ko an tampeļ im kain̄i ko. Kōjem ko ilo jetōb renaaj peļļo̧k. Kwonaaj ekkatak wāween kōjepel ikōtaan lan̄ im laļ, ewi wāween n̄an kajjitōk ippān enjeļ ro an Anij bwe ren pād ippam̧, im ewi wāween an em̧m̧anļo̧k am̧ bōk tōl jān lan̄. Kijejeto ko am̧ retiljek n̄an kōm̧m̧an āindein renaaj kapenļo̧k im kōkajoorļo̧k pedped eo am̧ ilo jetōb. . . .

“Jouj tōmak eō n̄e ij ba bwe n̄e pedped eo am̧ ilo jetōb ej ekkal pen ilo Jisōs Kraist, kwojjab aikuj in mijak. Ilo am̧ m̧ool wōt n̄an bujen ko kwar kōm̧m̧ani ilo tampeļ, kwonaaj kajoorļo̧k kōn kajoor eo An. Innām, n̄e m̧akūtkūt in laļ ilo jetōb rej waļo̧k, kwonaaj maron̄ jutak pen kōnke pedped eo am̧ ilo jetōb epen im eban em̧m̧akūtkūt.”⁴

Būreejtōn Nelson ekōņaan bwe jen keememej bwe tampeļ ko relukkuun aorōk ilo mour ko ad āinwōt Armej ro Rekwojarjar ilo Raan Ko Āliktata kōnke, ilo m̧ool, rej tōl kōj n̄an ad Rilo̧mo̧o̧r Jisōs Kraist.

Ilo juon pijaan alooj ilo kar keememe bar aje eo an Washingtōn D.C. Tampeļ eo, rikanaan eo ad ekar ba:

“Jelukkuun jeraam̧m̧an bwe ewōr tampeļ. Elōn̄ļo̧k namba in tampeļ ko ilo an Kabun̄ in eddōkļo̧k. Ak ejjab kōn namba, im ejjab kōn ia eo. Ejjab kōn kain jekjek in an ekkal. Ej kōn kain̄i ko lowaan.

“N̄e kwoj kalimjōk juon tampeļ, kwoj aikuj kile bwe ej juon kōkaļļe in Jisōs Kraist, E eo ej Ikōtaad im Jemed. Kōn E wōt im ilo E jemaron̄ tōpar Jemedwōj Ilan̄.

“Ej bārāinwōt juon kōkaļļe in tōmak eo ad ilo mour ālkin mej. Kajjojo tampeļ ej jutak āinwōt juon bun̄tōn, juon bun̄tōn ekwojarjar n̄an mour indeeo n̄an kōj im baamle ko ad.”⁵