Juon Haka im Bok in Mormon

Ilo jinoin 2022, kar leļo̧k n̄a n̄an New Zealand Huntly, Waikato eria eo. Ikar jerbal ilo mijen eo aō emaron̄ kar juon iiō ilo tōre eo, im kar kajjitōk ippa n̄an jipan̄e eo m̧ōtta, Elder Kafalava, eo ekar kāāl ilo jerbal in.

Juon raan, juon eo ej kab oktak tok n̄an Kabun̄ in etan Brother Tengu ekar kōņaan kōm̧m̧an jerbal in mijnede ippamim. Ikar jab lukkuun jeļā eļap kōn Brother Tengu iien eo, ijeļo̧kin ekar kobatok ilo Kabun̄ in emān allōn̄ m̧oktaļo̧k im ekar iakwe Bok in Mormon. Ekar ejjeļo̧k en kōm en kar loļo̧k raan eo, kōn menin kōmim kar kālet n̄an kaḷḷaḷḷaḷ ilo kōjem ko.

Jekar loe ial eo am n̄an m̧ōn juon emmaan, juon Rimāori. Ekar kōpeļļo̧k kōjem eo, im ikar ļōmņak eoktak reitok in mejān . . . eoktak. Bōtaab jekar jino kōnono ippān, im em̧m̧an bwe ekar kōnaan tok n̄an kōm.

Ekar ba n̄an kōm ejjab tōmak ilo Anij. “Ij tōmak ilo ainikien ņo im iien,” ekar ba im kwaļo̧k n̄an kōm jet kein kōjan̄jan̄ ko ekar jeke im likwoji ippān doon n̄an juon kain marmar.

Ālkin jidik iien ikar ebweer, ikar ļōmņak, “Warar, eban tōprak.” Ak Elder Kafalava ekar wōnm̧aanļo̧k wōt im kōņaan ippān em̧m̧aan in ilo kōjem eo ilo an Brother Tengu jutak turin, ej jibwe juon kape in Bok in Mormon.

Ļo̧k ilbōk, ikaju bōk juon im̧we ekajoor n̄an tuuj kōn haka eo n̄an em̧m̧aan in. “Kōm̧m̧ane ļo̧k haka eo n̄ane?” Ikar ettōn̄ kōn n̄a make. “Ilukkuun ban kōm̧m̧ane menin!” Ak ijjab maron̄ kar irre ippān en̄jake in, innām ikar kajjitōk ippān emmaan in, “Ah. Em̧m̧an ke n̄e inaaj kōm̧m̧ane waj haka e?”

Ālkin aō āliklik jidik, ekar em̧ōņōņō em̧m̧aan in. “Ekwe em̧m̧an. Wōnm̧aanļo̧k wōt, Bro. Ekwe!”

“M̧okta jān aō kōm̧m̧ane waj haka e,” ikar ba, “kōtļo̧k bwe in kwaļo̧k ta m̧eļeļein.” Ikar kōm̧eļeļe ke haka in mijen eo am, me ej kakeememej kōm etke jej kwaļo̧k kōn gospel eo. Ej kōm̧eļeļeik mijenede ro āinwōt ritarinae in meram eo, kōjparok kōn kajoor an Anij ilo am kwaļo̧k kōn ennaan eo ekwojarjar kōn mour indeeo.

Ālkin aō riiti ukook eo ilo kajin English, ikar jinoe . . . im en̄ eo ej n̄a, make iaaō ilo etōņaak eo—juon ripālle jān Salt Lake City, Utah—kōn limo ikar lelōn̄ļo̧k peiū n̄an lōn̄̄ im kōwanlaļ tak n̄an ubō ilo aō tuuj kōn haka in mijen eo am n̄an Rimāori in jenak kajeen.

Ijeļā ro rūtūrim rekar kōņaan jeļā ta eo ekar waļo̧k. Elder Kafalava ekar kāāl wōt n̄an an jeļā haka e, im ekar pinniki eō, ak ilo aō wōnm̧aanļo̧k kōn peiū im neō im ro̧ro̧, ikar loe bwe Brother Tengu ekar lelōn̄ļo̧k Bok in Mormon eo an—ekar erļo̧ke pein ilo an āliklik, kajim̧we an reim̧aan—n̄an emmaan eo ej jutak ilo kōjem eo.

Ikar kalimjōkļo̧k lein me ej kab oktak tok, im ļōmņak, “Kwoj ta? Kolukkuun kakkure haka e aō.” Innām ikar loe an deel em̧m̧aan eo ilo kōjem eo, ejjab kōn n̄a, ak kōn Bok in Mormon.

Ejjab to, ke ekar m̧ōj haka eo aō, emmaan eo ekar em̧akūt im ba, “Kiiō, ta bok ņe?” Brother Tengu ekar wōnm̧aanļo̧k n̄an kwaļo̧k naan in kam̧ool eo an ekajoor. Ekar kōnono kōn marok eo ekajoor eo kar juon iien ekar lukkun kaboole jon̄an ekar ļōmņak n̄an bōk make mour eo an. Ekar kōnono kōn juon iien aorōk iien eo juon m̧ōttan ilo jikin jikuuļ ekar kajjitōk n̄e ekōņaan ioon mijenede ro.

Brother Tengu ekar kwaļo̧k an kam̧m̧oolol kōn mijenede ro, ak ekar ba ej kōn Bok in Mormon eo—eo ekab de jibwe ilo pein—eo ekar tōlļo̧k e n̄an meram eo. Ekar kam̧ool bwe Bok in Mormon ekar uwaake kajjojo iaan kajjitōk ko an, eo ekar boktok n̄an e aeņōm̧m̧an . . . “Ekar lo̧mo̧o̧ren mour eo aō!”

Kōn bulon̄, em̧m̧aan eo ilo kōjem eo ekar lem̧aanļo̧k pein im kajjitōk, “Imaron̄ ke jibwe?” Innām, kōn pein ioon kōbar eo, ilo ejjeļo̧k kōmeļeļe, em̧m̧aan eo ekar jino jar ioon Bok in Mormon eo.

Jekar likūti juon an kape ippān, im ilo am kar etaļ jān ijo, ikar bulon̄ kōn baj raan jab eo. N̄e ejjeļo̧k men enaaj waļo̧k jān wāween eo, ebwe bwe enaaj juon men em̧m̧an n̄an jeje ilo jōnōļ eo.

Ke jekar bar loļo̧k juon wiik tokālik, em̧m̧aan eo ekar ikkūr tok n̄an kōm “Ah, ewōr aō kajjitōk n̄an komiean̄ bratōr raņ: Elmen aō peptaij?”

Ikar ilibōk. Ilo an kar waļo̧k, em̧m̧aan in ekar riiti aolepen bok in Alma, im Alma ekar kōnono eļap kōn peptaij. Im kiiō, “Ikōņaan peptaij,” ekar ba, “im ikōņaan bwe kwon peptaiji n̄a.”

Ij reilikļo̧k ilo aō bulon̄ kōn kar en̄jake in. Kōm kar kein jerbal ko ilo pein Anij, looreļo̧k im̧we eo an Jetōb Kwojarjar n̄an etal im kaḷḷaḷḷaḷ, n̄an kōpelļo̧k lon̄imim im n̄an kwaļo̧k n̄an em̧m̧aan in ikkure in haka eo.

N̄an ukōtetok, ekar im̧we n̄an riiti Bok in Mormon im kar oktak n̄an gospel eo an Jisōs Kraist. Bok in Mormon ej kōm̧m̧an oktak eo em̧ool. Ej ta eo ej kalōk tōmak.

Em̧m̧aan eo ilo kōjem ekar peptaij ruo allōn̄ tokāļik. Ej kab kar bōk Priesthood eo an Aron. Menin ej juon naan in kam̧ool n̄an n̄a ke oktak ej juon menin bwilōn̄.