M̧ōņōņō ilo Al ko ilo Bōro

Walnetta Broederlow McCall kar ratimjuon an iiō ke juon mijenede ekar kajjitōk wōn emaron̄ kōjan̄jan̄ piano n̄an jarlepju eo ekāāl. “Ikar jidik jidik kajutak peiū!” ej keememejļo̧k. Mijenede eo, Elder Charles W. Ashman, ekar jab pere kōn jon̄an iiō eo an ak jon̄an an jeļā. Ekar leļo̧k Walnetta al ko n̄an kamelmel, im wiik eo tok juon ekar erom̧ rikōjan̄jan̄ piano ilo kweiļo̧k ko aer.

Ke baam̧le eo an Walnetta ekar em̧akūt jān Fiji n̄an Devonport ilo North Shore ilo Auckland jejjo iiō emootļo̧k ālkin Tariņae eo an Laļin Kein Karuo, jemen, Oscar P. Broederlow kar e wōt membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata ilo eria eo. Ak mijenede rekar jino jerbal im ejjab to ebwe jon̄an rikāāl ro rekar oktak n̄an kōm̧m̧ani kweiļo̧k ko ilo Devonport Labour Hall, karōke jān jinen Walnetta, Hilda E. Lobendahn Broederlow.

Ke Doulul eo an Kōrā ro ekar ejaak ijo, juon kurup edik in sister ro rej kijoor kweiļo̧k aolep wiik ilo m̧weo im̧ōn Sister Norma Roberts. Jinen Walnetta ekar bōke ippān bwe en kōjan̄jan̄ piano n̄an jipan̄ ‘Mama ro rej Al’. “Būraimere ejan̄in kar ejaak,” liin ej keememejļo̧k, “innām aolep iien ij reilikļo̧k ij pok bwe ilo n̄a, pād ilo Doulul eo an Kōrā ekar itok m̧okta jān Būraimere!”

Kapeel eo an Walnetta ilo kōjan̄jan̄ ekar kajoorļo̧k ilo an wōnm̧aanļo̧k n̄an jerbal. Ekar kam̧oole kabūlon̄lon̄ in eddōkļo̧k eo an Kabun̄ eo ilo eria eo an, im ippān tok ekar itok iien eo em̧m̧an n̄an kōļapļo̧k tōlan eo an. Ilo iiō ko jinoin an jodikdik, branch eo an ekar erom̧ Auckland 5th Ward, im m̧ōnjar kāāl eo an ekar wōr juon o̧kwōn jarōm. Walnetta ejan̄in kar kōjan̄jan̄ o̧kwōn m̧okta. “Armej eo ekar kōlaake ekar letok juon book jidik im kwaļo̧k kilen kōjerbale—ekar bōk emaron̄ jon̄oul lalem minit ko,” liin ekar ba. Enij kar ede eo iien an bōk kōmeļeļe ko kōn kilen kōjan̄jan̄ o̧kwōn . . . bōtaab ekar jab mad. “Ikar jeļā bwe Irooj enaaj kar jipan̄ n̄a. Innām ikar kōm̧m̧an bwe en juon aō jerbal n̄an ekkatak kōn aolepen aō im n̄an ekkatak, ekkatak, ekkatak!”

Ilowaan 70 iiō kiiō, kijejeto eo an Walnetta n̄an kōjan̄jan̄ ekar kōjeraam̧m̧an elōn̄. Ke Būreejtōn Steve Midgely, juon kar stake būreejtōn n̄an Whangarei Stake, ekar ben an kabbok rio̧kwōn n̄an juon stake conference, Walnetta ekar m̧ōņōņō in uwaake kajjitōk eo an. Im jabdewōt iien Eria Būreejtōn David Baxter ej tōl ilo Takapuna Ward ilo iien Kwojkwoj, aolep iien ej pōjrak ilo o̧kwōn eo ālikin kweiļo̧k eo n̄an kam̧m̧oolol Wanetta kōn kōjan̄jan̄ eo.

“Ijeļā n̄aij kōnono n̄an aolep rikōjan̄jan̄ ro ke ij ba jej en̄jake kam̧m̧oolol n̄e aolep ro jitōn bōro im membōr ro rej kam̧m̧oolol kōn kōjan̄jan̄ eo me jej kōjan̄i,” liin ej ba. “Em̧ōj aō kōjan̄jan̄ n̄an ward, stake, Pacific Eria kweiļo̧k ko [im] jipan̄ kuwaer an Kabun̄ in, eļaptata ilo iien jiāe kōjan̄jan̄ ko.” Liin ekar en̄jake uteij ilo an kar maron̄ jerbal ippān elōn̄ rial ro rejeļā al im rikōjan̄jan̄ ro ilo Kabun̄ in ilo aer kōjan̄jan̄ al ko.

Aolep iiō ko Walnetta ekar jerbal ilo elōn̄ kūr ko im m̧ōņōņō kōn en̄jake kein barāinwōt. Rainin ej en̄jake an uteij n̄an kōjan̄jan̄ ilo ward eo an Taupo Ward, n̄an karuwainene Jetōb Kwojarjar im kōm̧m̧ane juon ainikien n̄an kautiej iien kwojkwoj eo aer. Reilikļo̧k n̄an iakwe eo an ilo kūr eo an, elukkuun kam̧m̧oolol kōn menin letok eo Elder Ashman ekar leļo̧k n̄ane aolep iiō ko remootļo̧k ke ekar kajjitōk juon rikōjan̄jan̄ piano ej balentier. “Karuwainene eo an n̄an kōjan̄jan̄ ilo iien kweiļo̧k ko im [an] lōke ilo n̄a ekar kōjeraam̧m̧an mour eo aō,” liin ekar ba.

Kōjan̄jan̄ ekar mōkaj an juon wāween an kwaļo̧k iakwe n̄an Jemedwōj Ilan̄ im Jisōs Kraist, im kajjojo al ekar ekkatak eļap m̧eļeļeier n̄an e. Al eo jinoin tata ekar kōjan̄jan̄ kake, “Lord, Dismiss Us With Thy Blessing.”

“Ej juon jar bwe Jetōb eo an Anij enaaj pād ipped aolep iien,” Walnetta ekar ba, “im aolep iiō ko, m̧ool in ekar waļo̧k ilo mour eo aō.”

Enaaj kar bar kālet juon al em̧m̧an ippān? Ālkin jejjo ļōmņak ko, kōjjemļo̧k eo an Walnetta ej, ejjab. “Ta eo aorōk tata n̄an n̄a ej bwe jekdo̧o̧n al ta eo ij kōjan̄e, ij kam̧m̧oolol aolep iien bwe ij en̄jake Jetōb ilo aō kōjan̄ al eo.” Ekar wōnm̧aanļo̧k: “Spencer W. Kimball (1895–1985) ekar ba juon iien, ‘Jejjab pād ilo juon jikin, āinwōt rikōjan̄jan̄, n̄an im̧we buruen ro rej ron̄jake.’¹

“Ij en̄jake aorōk in eddo in.”