Peran eo n̄an Kajjitōk

Ke Te Awhina ekar dik ekar pen. Ekar rūttoļo̧k ippān jibūn m̧ae iien ekar 8 an iiō, innām ekar em̧akūt jān juon em̧ n̄an bar juon em̧, ijo uno ko rekajoor im jorreen ekar m̧ōkaj aer waļo̧k jān m̧ōn̄ā im tōmak. “Ejjeļo̧k kōnono kōn Anij,” ekar ba, “Ejjeļo̧k kōnono kōn kappukōt kōmour im jeorļo̧k bwōd . . . Ikar rūttoļo̧k ippān baijin in dike im matōrtōr kōnke ejjeļo̧k rekar katakin n̄an em̧m̧anļo̧k.”

Āinwōt juon jodikdik, ekar jebwābwe. “Ejjeļo̧k aō tōl, kōjparok, im ejjeļo̧k juon imaron̄ reiļo̧k n̄ane. Ikar pok im jaje ia imaron̄ loe aeņōm̧m̧an,” liin ekar kemeemej. Ekar jeļā juon wōt kain mour jemaan, im ejjab to, ekar tōl liin n̄an juon jikin jipan̄ kōn an an̄ūr kōn dren in kadōk.

Ejjab to ālkin an kar diwōj, ekar ioon mijenede ro jān Kabun̄ eo Jisōs Kraist im Armej ro Rekwojarjar ilo Raan Ko Āliktata. Ekijon̄ kar loe er jōka, im ekar kileļo̧k, ak ilo jejjo un ko ilo raan ņe, Te Awhina ekar en̄jake juon kajoor n̄an kūr tok er.

“Ekar lōn̄ juon aō kajjitōk,” liin ej kemeemejļo̧k. “Komaron̄ ļōmņak ej juon kajjitōk ekōjak, ak ilo am̧ kar rūttoļo̧k kōn ejjeļo̧k jabdewōt kōn Anij . . . Ikar jaje.” Ekar ba n̄an mijenede ro, “N̄e komaron̄ uwaake n̄a juon kajjitōk, inaaj ron̄jake [ennaan eo ami].”

Innām ekar kajjitōk: “Anij ej ke juon em̧m̧aan ak juon kōrā?”

Juon iaan mijenede ro ekar uwaak, “Anij ej Jemedwōj Ilan̄ eo ej iakwe.”

Uwaak eo ekar boktok juon kain en̄jake eitok ilo jidimkij kōn alikkar im aeņōm̧m̧an n̄an Te Awhina. Ekar kōņaan jeļā eļapļo̧k. “Ekwe,” liin ekar ba n̄an mijenede ro. “Inaaj ron̄jake kom̧.”

Em̧ōj an kiiō 10 iiō jān iien eo Te Awhina ekar peptaij āinwōt juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ekar erom̧ juon mijenede e make, ejjab to ālikin peptaij eo an, ke ekar jerbal ilo Australia Brisbane Mission. Innām, ilo 2020, ekar m̧areik Josh, ‘em̧m̧aan in etōņak eo an.’ Ripālele rein rej reim̧aanļo̧k n̄an liāp ippān doon—n̄an iien im n̄an indeeo—iien wōt enaaj peļo̧k New Zealand Hamilton Tampeļ eo.

Reilikļo̧k ilo iaļ eo an aiboojoj ekar ijino kōn juon kajjitōk epidodo, Te Awhina ej kakeememej bwe Rikanaan Josep Smith ekar bōk revelesōn eo an eļaptata kōnke ekar wōr an peran n̄an kajjitōk ippān Anij . . . āinwōt Josep Smith, Te Awhina ekar ekkatak bwe jet iien uwaak eo ejjab kajju itok.

Ke mijenede ro rekar jino kōm̧eļeļeik kōn Naan in Mālōtlōt, uwaak eo an TE Awhina jinoin tata ekar, “Ejjab, kom̧m̧ol.” Ak men̄e ekar en̄taan kōn itia eo n̄an joļo̧k men ko rekajoor, ekar kabulon̄ emake kōn ewi m̧ōkaj in an pokake. Ilo m̧ool, “Ilo jemļo̧kin ekkatak eo an [mijenede ro], ikar joļo̧k kope,” ekar ettōn̄.

Ejjab aolep men rekar em̧m̧an ilo kijejeto, ak Te Awhina ekar wōnm̧aano̧k im kar nōbar e kōn kōmour im jeorļo̧k bwōd jān Pinmuur eo an Jisōs Kraist. Ilo iiō ko, ekar boktok kajoor n̄an liin im kōjatdikdik n̄an jeļā bwe Josep Smith ke ej dik wōt ekar irre ippān marok eo enana, m̧okta jān an kar loe Visōn eo M̧oktata, eo en kar jipan̄lo̧k epepen eo ekāāl an gospel eo ilo laļ in.

Naan ko an Elder Jeffrey R. Holland ekar jipan̄ Te Awhina m̧eļeļe wāween in:

“Ej ilo alikkar im ilo lukkuun m̧ool bwe m̧okta jān iien ko relļap, aaet m̧okta jān iien ko relļap an jetōb, emaron̄ itok apan̄, jab errā, im marok. Mour in ewōr jet iaan iien kein n̄an kōj, im jet iien rej itok ilo ad epaake juon kālet aorōk ak juon iaļ eaorōk ilo mour ko ad.”¹

“Ilo aō kemem e 10 iiō in deļon̄e tok oror in, em̧ōj aō loe kōmour eo ej itok wōt n̄e jej reiļo̧k n̄an Kraist im ukweļo̧k,” Te Awhina ekar ba. “Ij kam̧m̧oolol kōn mijende ro, kōn m̧ool ko rekar katakin eō . . . im kōn ta eo gospel eo ekar kōm̧m̧an n̄an mour eo aō.”