MULIMULI I LE PEROFETA
O Faitotoa Faaleagaga O Le a Tatalaina: O Savali e uiga i le malumalu mai ia Peresitene Nelson
O le a e aoaoina pe faapefea ona tatalaina le veli i le va o le lagi ma le fogaeleele, pe faapefea ona fesili atu mo agelu a le Atua e tausia oe, ma pe faapefea foi ona faalelei atili le mauaina o le taitaiga mai le lagi.
“O lenei se’i tatou liliu atu i le autu o malumalu,” na saunoa mai ai lo tatou perofeta ma Peresitene Russell M. Nelson i le Konafesi Aoao ia Oketopa 2018.
I lana tima’iga paia i le auala e avea ai i tatou ma ni faaa’oa’o sili o ni Au Paia o Aso e Gata Ai, faatoa maea ona ia faamalosia i tatou e avea o tatou fale ma taula’iga o aoaoga faaletalalelei ma sa faamanatu mai ai ia i tatou le taua o le faaaogaina o le igoa sao o le Ekalesia a lo tatou Faaola: O Le Ekalesia a Iesu Keriso o le Au Paia o Aso e Gata Ai.
Ona ia talosagaina toafimalie lea o le faapotopotoga i le lalolagi atoa ina ia avea le malumalu ma faamuamua.
““Tatou te iloa o o tatou taimi i le malumalu e alagatatau mo lo tatou faaolataga ma le faaeaga ma atoa ai ma o tatou aiga,” na ia saunoa mai ai:
“I le mae’a ai ona tatou maua o o tatou lava sauniga paia o le malumalu ma osia feagaiga paia ma le Atua, e manaomia e i tatou uma taitoatasi le faamalosiauga faaleagaga faifaipea ma le aoaoina lea ua na o le maota o le Alii e mafai ai. Ma e manaomia e o tatou augatuaa i tatou e auauna atu o ni sui mo i latou.
“Mafaufau i le alofa tunoa tele ma le faimeatonu o le Atua, o le, a o lei faavaeina le lalolagi, na saunia le auala e maua ai faamanuiaga o le malumalu e i latou ua maliliu e aunoa ma se silafia o le talalelei. O nei sauniga paia o le malumalu ua mai anamua. Ia a’u o na mea anamua e faagaeetia ai ma o se isi molimau o lo latou faamaoni.
“Ou uso e ma tuafafine pele, o osofaiga a le fili ua matua faateteleina, i le malosi ma i auala eseese. O le manaomia ona tatou iai i le malumalu i taimi uma ua faateleina atu. Ou te augani atu ia te outou ina ia vaavaai ma le agaga tatalo pe faapefea ona e faaaluina lou taimi. Faaalu taimi i lou lumanai ma i lena o lou aiga. Pe afai e maua ni ou avanoa talafeagai i se malumalu, ou te apoapoai atu e sailia se auala e faatulaga ai se taimi faifaipea atofaina ma le Alii—ia iai i Lona maota paia—ona tausia lea o lea taimi atofaina i le tonu ma le olioli. Ou te folafola atu o le a aumaia e le Alii vavega ua Ia silafia o loo e manaomia a o e faia osigataulaga e auauna atu ai ma tapuai i Ona malumalu.”1
I se tasi saunoaga musuia, sa folafola mai e Peresitene Nelson, “Soo se taimi e aliae ai soo se ituaiga o fevesiaiga i lou olaga, o le nofoaga aupito sili ona saogalemu i le faaleagaga o le ola ai lea i totonu o au feagaiga o le malumalu!”2
Sa ia amata lana lauga i le faamatalaina lea o le tulaga lavelave o galuega faufau e manaomia e toe faamalosia ai le Malumalu faasolopito o Sate Leki—agai atu i le Meleniuma—faasaga atu i malosiaga o le natura. O lea, sa ia faamatalaina le matua alagatatau mo i tatou ona faamalosia o tatou lava faavae faaleagaga, aua i le taimi nei, e sili atu nai lo le taimi muamua, o lo tatou faaolataga e faavavau ua faamatauina lea e afa o le olaga.
“Ou uso e ma tuafafine pele, o aso nei e gata ai. Afai ole a talitalia e oe ma a’u le oo mai o faalavelave ma avega mamafa, e matua taua mo i tatou uma taitoatasi ona iai se faavae faaleagaga mausali e fausia i luga lava o le papa o lo tatou Togiola, o Iesu Keriso” (tagai Helamana 5:12).
“O lea ou te fesili atu ai ia te outou taitoatasi, o le a le malosi o lou faavae? Ma o le a ni faamalosiauga i lau molimau ma ni malamalamaaga o le talalelei o manaomia?
“O le malumalu o loo taoto lea i le totonugalemu o le faamalosia o lo tatou faatuatua ma malosiaga faaleagaga aua foi o le Faaola ma Lana aoaoga faavae o le fatu autu lea o le malumalu. O mea uma lava o aoaoina i le malumalu, e ala mai faatonuga ma ala mai le Agaga, e faateleina ai lo tatou malamalama ia Iesu Keriso. O Ona sauniga taua e fusia ai i tatou ia te Ia e ala atu i feagaiga paia o le perisitua. O lea, pe a tausia a tatou feagaiga, o le a Ia faaeeina ia i tatou Lana faamalologa, mana faamalosi (tagai Mataupu Faavae ma Feagaiga 109:15, 22). Ma oi, o le a o tatou matua manaomia Lona mana i aso o i luma.
“Ua folafola mai ia i tatou e faapea ‘afai ua (tatou) saunia o le a (tatou) le matatau,’ (Mataupu Faavae ma Feagaiga 38:30; tagai Mataupu Faavae ma Feagaiga 10:55). O lenei faamautinoaga e iai sona uiga loloto i aso nei. Ua tautino mai e le Alii e ui lava o luitau fou o aso nei, o i latou e fausia o latou faavae ia Iesu Keriso, ma ua aoao e faalatalata atu i Lona mana, e le manaomia ona gauai atu i atugaluga tulagaese o lenei vaitaimi.”3
Na faaauau Peresitene Nelson e faapea, “mo outou taitoatasi ua osia feagaiga o le malumalu, ou te aioi atu ia te oe e saili—i le agaga tatalo ma faifaipea—ia malamalama i feagaiga o le malumalu ma sauniga. O le a tatalaina faitotoa Faaleagaga. O le a e aoaoina pe faapefea ona vavaeina le veli i le va o le lagi ma le fogaeleele, pe faapefea foi ona fesili atu mo agelu a le Atua e tausia oe, ma pe faapefea foi ona faaleleia atili le mauaina o le taitaiga mai le lagi. O au taumafaiga ma le filiga e faatinoina o le a faamalosi ma saga faamalosia ai lou faavae faaleagaga. . . .
“Faamolemole talitonu mai pe a ou fai atu o lou faavae faaleagaga pe afai e fausia mausali ia Iesu Keriso, o le a e le manaomia ona fefe. A o e faamaoni i au feagaiga na osia i le malumalu, o le a faamalosia oe e Lona mana. Ona, pe a tutupu mai mafuie faaleagaga, o le a mafai ona e tulai malosi atu aua o lou faavae faaleagaga ua mausali ma le mafaagaeetia.”4
E finagalo Peresitene Nelson ia o tatou manatua o malumalu e taua i o tatou olaga o ni Au Paia o Aso e Gata Ai aua, mulimuli ane, latou te taitai atu i tatou i lo tatou Faaola o Iesu Keriso.
I se ata vitio talu ai nei sa faamanatuina ai le toe faapaiaina o le Malumalu i Uosigitone D.C., na saunoa ai lo tatou perofeta:
“Ua matua faamanuiaina i tatou i le iai lea o malumalu. O le a faateleina le numera o a tatou malumalu a o tuputupu ae le Ekalesia. Ae e le o le fuainumera, ma e le o le nofoaga. E le o le tusiga o ata o fale. O sauniga i le lotoifale.
“Pe a e vaai i le malumalu, e tatau ona e iloaina o le faailoga lea o Iesu Keriso, aua o Ia lo tatou Puluvaga i le Tama. Ua na o Ia ma e ala atu ia te Ia tatou te oo atu ai i lo tatou Tama Faalelagi.
“Ma o se faailoga foi o lo tatou faatuatua i le olaga pe a mavae le oti. O malumalu taitasi e tu o se laasaga, o se laasaga paia i le ola e faavavau mo i tatou ma o tatou aiga.”5