Taitaia e le Agaga, I Laasaga Taitasi o le Ala

O tagata auai o Le Ekalesia a Iesu Keriso o le Au Paia o Aso e Gata Ai i Niu Sila sa olioli ina ua faamautinoa mai e lo tatou perofeta o le a fausia se isi malumalu, i lenei taimi i Aukilani. O le sauniga o le suatiaina o le eleele mo le tulaga o le malumalu fou sa faatulagaina mo Iuni 2020, ma o masina na muamua atu, sa amata fuafuaina ai e taitai o le Ekalesia i le lotoifale lea mea faasolopito.

O musika paia o se vaega taua lava o soo se potopotoga a le Ekalesia ma o taitai faamaopoopo o lea fuafuaga sa talosaga atu ia Sister Adele Wi Repa mai le Uarota a West Harbour o le Siteki a Henderson i Aukilani e na te taitaia se aitema o pesepesega mo lea faamoemoe.

“Sa ou ataata,” sa saunoa ai Adele, “aua ou te le i mafaufauina sa latou iloa se isi tagata! Peitai sa ou lagona le matua faafetai ma le amanaiaina.”

O le mea muamua lava na fai e Adele o le sailia lea o le pese talafeagai mo le faamoemoe. Sa ia sailia i le initoneti mo pepa musika talafeagai, ae na vave ona manino e manaomia ona ia faatulagaina le viiga e ia lava. O le taunuuga o lana taumafaiga o se faatulagana matagofie o le viiga alofagia, O le Uluai Tatalo a Iosefa Samita.

Na sosoo ai, o le taimi loa e tuufaatasi ai se aufaipese.

I lena taimi, o le faamai o le KOVITI-19 na faamalosia ai le lokaina i lalo o Niu Sila, ma o tuufaatasiga uma a le Ekalesia sa taofia le tumau. “E leai se tasi na iloa le umi na manaomia ai i matou e nonofo faatalitali’,” na fai mai ai Adele, “peitai o le sauniga o le suatiaina o le eleele o le malumalu e tatau ona faaauauina pea.” Sa manaomia ona ia sau ma se isi fuafuaga e sui ai se aufaipese tu’usa’o.

Sa suesueina e Adele le avanoa o se aufaipese pueina i luga o upega tafailagi ma sa faailoa iai o lenei ituaiga o poloketi o le a manaomia ai le faitauafe o tala ma le faitau selau o itula. O se tala faanoanoa lea, lea i ni tulaga masani sa tatau ona faavaivaia ai Adele, peitai o le taimi lenei sa ese. O le taimi lenei, “ua le na o soo se tasi sa o matou sauniuni iai,” sa ia fai mai, “Ae o le Alii.”

Sa ia tutumau pea ma sa ia aapa atu i se talavou fai atatifaga ma o se tagata musika i lana siteki: Tuagane Anthony Butters. E ui ina le mautinoa foi e Anthony latou pe faapefea ona faia se aufaipese tuufatasia i luga o upega tafailagi ina ia tino mai, o lenei luitau “na faaosofia ai lona fiafia,” sa fai mai ai Adele. “Sa ia loto malie e tuu iai se taumafaiga.”

Sa o latou faanatinati loa e galulue.

Sa o latou iloa o aogapese o le a le mafai i taimi o le loka i lalo, o lea sa o latou pueina ai taulagiga o musika ma vaega o leo taitasi o faatulagaga faamusika a Adele mo tagata pepese e aoaoina i le fale. Ona o latou tuuina atu lea o se valaau faalauaitele e sailia ai tagata o le latou aufaipese pueina i luga o upega tafailagi.

Na sosoo ai, sa o latou taumafai e faamautinoa e ui lava ina lei faia ni faataitaiga, ae o tagata pepese uma sa aoaoina a latou vaega i se tulaga sa’o. Sa o latou fuafuaina foi pe faapefea ona pueina siufofoga o tagata pepese taitasi, e faapefea ona teuteu faatasi le tele o leo pue, ma pe faapefea ona gaosia se faatinoga faaata vitio lea e ono faasalalauina i le aso o le sauniga o le suatiaina o le eleele o le malumalu.

Mo Adele ma Anthony, o le vaega tele lava o se tulaga o le “taitai a’u e le Agaga, ona sa ou lē muaʼi iloa muamua mea e tatau ona ou faia”¹. Peitai sa o la lilifa i aoaoga i luga o le Google ma le YouTube, ma sa o la galulue ma le lototetele i faalavefau uma lea sa alia’e ane i le gasologa o le ala.

O lea aafiaga patino sa faigata mo le aufaipese, foi latou. O le tuuina o se taimi ia lava mo teuteuga, e na o le 3 vaiaso mo tagata pepese e aoao ai le musika, ma o i latou taitoatasi sa tatau ona faia se puega faatasi o leo ma le ata vitio. O lea luitau sa faamaonia na tele atu mo nisi. Na saunoa ai Adele, “Sa ou maua ni feau na talosaga mai pe mafai ona o ese ma le lotomaulalo ona sa o latou lagona o o latou siufofoga e lei lelei tele.” O isi tagata pepese sa lelei lava i le puega leo, peitai sa le fiafia tele i le pueina o ata, ma e toatele atu isi na le taugalemu i le faaaogina o tekonolosi uma sa manaomia.

O i latou na tutumau sa mafai ona lafoina atu a latou puega leo ia Adele, o lana galuega na sosoo ai o le amata lea ona teuteuina faatasi uma i latou. “Sa lofituina au i le lagona o le a le mafai ona faia lau vaega o le galuega i le taimi faatulagaina,” na saunoa ai Adele. “Sa ou fai atu i lo’u toalua mo se faamanuiaga perisitua.”

I nai itula mulimuli ane, sa ia maua ai se valaau sa lei fuafuaina i le telefoni mai se uo i Hawaii. Sa faamatala atu e Adele i lana uo e uiga i faigata o ia feagai ai i le aufaipese pueina i luga o upega tafailagi, ma sa ia fai mai, “E mafai ona ou fesoasoani atu ia te oe.”

O lenei uo—O Milton Kaka—sa toe valaau mai i le aso na sosoo ai e logo aloaia mai o lona pule i le Nofoaga Autu o Aganuu a Polenisia, lea foi sa lokaina i lalo, sa faatagaina mai mo ia le lua vaiaso e galulue ai i lenei poloketi faapitoa faatasi ma Adele. I le faatumuina i le loto faafetai, sa auina atu ai e Adele se feau faafetai i le pule a Milton, lea na tali mai e faapea e pei lenei mea o se sao o le Nofoaga Autu mo Aganuu a Polenisia “mo o matou tausoga Māori.”

Sa tuufaatasi malosiaga o Milton ma Adele ma Anthony, ma o leo sa pueina ma ata vitio na iu lava ina tuu faatasia. O le ata vitio o faatinoga a le aufaipese pueina i luga o upega tafailagi sa saunia e faamatu’u atu mo le faamanatuina o le suatiaina o le eleele o le malumalu.

I le toe mafaufau ai i le faatinoga mulimuli a le aufaipese tuufaatasia i luga o upega tafailagi, na saunoa ai Adele, “O se uo pele i le aufaipese na ia aoteleina e sili atu i lo au:

‘E le gata sa ou faalogo i ni siufofoga matagofie, peitai sa ou faalogoina uma foi le afu toto, loimata, le le momoe i po, tatalo, alofa, faatuatua ma le usiusitai lea sa faaaluina i le aumaia o lenei mea i le ola.’

“O le faalogona lena mo au,” na ioeina e Adele.