Te mau ha’amaita’ira’a o te autahu’ara’a

Te autahu’ara’a o te mana ïa ’e te ha’amanara’a o te Atua. Te mau tāne ti’amā tei mau i te autahu’ara’a a Melehizedeka, e rave rātou nā roto i te i’oa o Iesu Mesia, ’a hōro’a ai rātou i te mau ha’amaita’ira’a o te autahu’ara’a. ’A hōro’a ai rātou i teie mau ha’amaita’ira’a, e pe’e rātou i te hi’ora’a o te Fa’aora ’a ha’amaita’i ai rātou ’ia vetahi ’ē.

Hōho’a

mau rima i tu’uhia i ni’a i te upo’o

Hōho’a nā David Winters

Nāhea te mau ha’amaita’ira’a i te hōro’ahia

E hōro’ahia te mau ha’amaita’ira’a o te autahu’ara’a nā roto i te tu’ura’a rima. E tu’u te hō’ē taea’e tei mau i te autahu’ara’a a Melehizedeka i tōna nā rima i ni’a i te upo’o o te ta’ata e fāri’i ra i te ha’amaita’ira’a. ’Ei reira ’oia e hōro’a ai i te hō’ē ha’amaita’ira’a ’ia au i te arata’ira’a a te Vārua. Te feiā e hōro’a i te mau ha’amaita’ira’a ’e te feiā e fāri’i i te reira, e fa’a’ohipa rātou i te fa’aro’o i te Atua ’e e ti’aturi i tōna hina’aro ’e tāna tārena.

I muri a’e i te fānaura’a o te hō’ē tamari’i, e hōro’a te hō’ē taea’e tei mau i te autahu’ara’a iāna i te hō’ē i’oa ’e te hō’ē ha’amaita’ira’a (hi’o Te Ha’api’ira’a Tumu ’e te mau Fafaura’a 20:70). Mai tei mātarohia, e tupu te reira i roto i te hō’ē purera’a ha’apaera’a mā’a ’e te ’itera’a pāpū mana’o. E hōro’ahia nā mua i te tamari’i i te hō’ē i’oa. I muri iho, e hōro’a te taea’e o te autahu’ara’a i te hō’ē ha’amaita’ira’a i te tamari’i.

Hōho’a

tamaiti tei ma’ihia e fāri’i ra i te hō’ē ha’amaita’ira’a o te autahu’ara’a

Te mau ha’amaita’ira’a nō te feiā ma’i

E nehenehe te mau taea’e tei mau i te autahu’ara’a a Melehizedeka e hōro’a i te mau ha’amaita’ira’a i te mau ta’ata tei ro’ohia i te ma’i. E piti tuha’a i roto i teie huru ha’amaita’ira’a : fa’atāhinura’a i te hinu ’e te ha’amaura’a i te fa’atāhinura’a. ’A tahi, e tu’u te hō’ē taea’e o te autahu’ara’a i te hō’ē tōpata hinu ’ōlive tei ha’amo’ahia ’aore rā tei ha’amaita’ihia, i ni’a i te upo’o o te ta’ata ’e e hōro’a i te hō’ē pure poto. I muri iho, nā te tahi atu taea’e tei mau i te autahu’ara’a e ha’amau i te fa’atāhinura’a ’e e hōro’a i te ta’ata i te hō’ē ha’amaita’ira’a mai te au i te arata’ira’a a te Vārua Maita’i.

E nehenehe te mau taea’e o te autahu’ara’a a Melehizedeka e hōro’a i te mau ha’amaita’ira’a nō te tāmāhanahana ’e nō te a’o i te mau melo o te ’utuāfare ’e ia vetahi ’ē e tītau mai i te reira. E nehenehe te hō’ē metua tāne tei mau i te autahu’ara’a a Melehizedeka e hōro’a i te mau ha’amaita’ira’a a te metua tāne i tāna mau tamari’i. E riro te reira ’ei tauturura’a ta’a ’ē ’ia fa’aruru ana’e te mau tamari’i i te mau tāmatara’a ta’a ’ē.

’Ia fāri’i ana’e te mau melo o te ’Ēkālesia i te mau pi’ira’a, e hōro’ahia ia rātou te hō’ē ha’amaita’ira’a i te taime e fa’ata’ahia ai rātou nō te tāvini. E ha’amaita’i te ta’ata fa’atere o te autahu’ara’a ia rātou ma te ha’amanara’a nō te ’ohipa i roto i te pi’ira’a. E hōro’a ato’a te ta’ata fa’atere o te autahu’ara’a ia rātou i te hō’ē ha’amaita’ira’a nō te tauturu ia rātou i roto i tā rātou tāvinira’a.

Hōho’a

e vahine e tai’o ra i tōna ha’amaita’ira’a pātereāreha

Hōho’a nā Shauna Stephenson

Mau ha’amaita’ira’a pātereāreha

E nehenehe te mau melo ti’amā ato’a o te ’Ēkālesia e fāri’i i te hō’ē ha’amaita’ira’a pātereāreha. E hōro’a teie ha’amaita’ira’a i te parau a’o nō te ta’ata iho nō ’ō mai i te Fatu ra. E nehenehe te reira e hōro’a mai i te arata’ira’a ’e te tāmāhanahanara’a i roto i te orara’a o te hō’ē ta’ata. E fa’a’ite ato’a te reira i te ’ōpū o te ta’ata i roto i te ’utuāfare o ’Īserā’ela. ’O te pātereāreha ana’e tei fa’atōro’ahia ’o tē nehenehe e hōro’a i teie huru ha’amaita’ira’a.