Tā’u hi’ora’a nā ni’a mai

Hōho’a

Te vāhi tupua’i mou’a Roy

Hōho’a nō te vāhi tupua’i mou’a Roy nā te fatu hōho’a

’Aita i maoro a’enei, ’ua haere au i te hō’ē tere orihaere fa’ahiahia nā ni’a i te tupua’i mou’a Roy, i roto i te mau mou’a nehenehe nō te motu apato’a o Niu Terani. Nō te mea ho’i ē, e rave rahi hora e hope ai te orihaerera’a, ’ua rave noa vau i te mea e hina’arohia e au : te tahi mau mā’a ’amu’amu ’e e rave rahi pape.

I tō’u ha’amatara’a, ’ua teimaha a’ena tā’u pūtē tua. Hō’ē ’āfa hora te haerera’a, ’ua ’ite hau atu vau i te teimaha o tā’u pūtē i ni’a i tō’u tapono ’e te tua. I te hō’ē taime, ’ua feruri au e fa’aru’e i te tahi pape tā’u. ’Ua ’ite ’oi’oi rā vau ē, e hina’aro vau i te reira.

Hō’ē hora ’e te ’āfa hou ’a tāpae atu ai i ni’a i te mou’a, ’ua teitei ri’i a’e te ’ē’a ’e ’ua tāpo’ihia i te hiona. ’Ua ha’amata vau i te feruri ē, e’ita vau e tae i ni’a, ’ua tūra’i rā tā’u ’ōpuara’a iā’u ’ia tāmau noa i te haere.

I te taera’a vau i ni’a, ’ua māmā roa tā’u pūtē tua. I te reira taime, ’ua ’amu vau i tā’u mau mā’a ’e ’ua inu i te pae rahi o tā’u pape. ’A fa’afa’aea noa ai au ’e ’a māuruuru ai i te hi’ora’a nehenehe nā ni’a mai, ’ua feruri au i tō’u tere—i ni’a i te mou’a ’e i roto i te orara’a.

E rave rahi hora tō’u haerera’a ma te ta’uma, ma te fa’a’amu ’e ma te fa’ainu i tō’u tino, ’ia roa’a iā’u te pūai nō te tāmau noa i te haere. Te mea tei riro ’ei hō’ē hōpoi’a i te ha’amatara’a—te pape fa’aora—’ua ha’amaita’i te reira iā’u ’ia tae’ahia tā’u fā.

Tē ’ite pā’āto’a nei tātou i te mau taime maita’i ’e te mau taime fifi, terā rā, e tauturu te Vārua Maita’i ia tātou ’ia rave i te mau fa’aotira’a maita’i. Fātata roa vau i te fa’aru’e hau atu i te ’āfa rītera pape i ni’a i te purūmu, ’ua fa’auruhia rā vau ’ia tāpe’a noa i te reira.

Ma te mata papepape, ’ua ha’amāuruuru vau i tō’u Metua i te ao ra nō teie mau mana’o. Te vaira’a vau i roto i te mau mou’a tei tāpo’ihia i te hiona i taua mahana ra, ’ua fa’auru te reira iā’u ’ia hi’opo’a i tō’u orara’a, tā’u mau fa’aotira’a, tā’u mau fā ’e tā’u iho pūtē tua.

Hou tō’u tere orihaerera’a, ’ua ’ī roa vau i te pāpū ’ore nō ni’a i tō’u orara’a ’e tā’u ’ohipa i roto i te hō’ē fenua ’e’ē. I teienei rā, tē mana’o nei au e maita’i te mau mea ato’a. ’Ua ’ite au ē, e ha’apa’o te Fatu iā’u.

Ma te ’āpiti atu i te Vārua, ’ua ’ite au e nehenehe tā’u e rave i te mau fa’aotira’a ’o tē fa’ateitei iā’u i te pae ferurira’a, i te pae tino ’e i te pae vārua. ’E ’ia teimaha vau, e nehenehe tā’u e fāriu atu i ni’a i tō tātou Fa’aora, te puna nō te « pape ora » (Ioane 4:10). ’Ua ’ite au ē, e fa’a’amu ’oia iā’u ’e e ha’amāmā ’oia i tā’u hōpoi’a (hi’o Mataio 11:28–30).