« I te pōirira’a tō’u ao, ’ua fāriu atu vau i te Mesia ra », Liahona, Māti 2023.
Feiā ʼāpī paʼari
I te pōirira’a tō’u ao, ’ua fāriu atu vau i te Mesia ra
Nā roto i te mau mea pōiri e rave rahi e tupu ra ’ati a’e iā’u, ’aita vau i pāpū e aha te aura’a ’ia roa’a te hō’ē niu i roto i te Mesia.
Hōho’a nā Getty Images, nā roto i te hi’ora’a
I roto i te hō’ē a’ora’a nō te ’āmuira’a rahi i ma’iri a’enei, ’ua paraparau te peresideni Henry B. Eyring, tauturu piti i roto i te Peresidenira’a Mātāmua, nō ni’a i te mau tau ’ati rahi i te ao nei : « ’Ua pāpa’i te ’āpōsetolo Paulo ia Timoteo, e tupu te ’ati rahi i taua ’anotau hope’a nei, ’ia ’ite mai ’oe’ (2 Timoteo 3:1).
« … ’E nō reira, e riro ïa ’ei mea fifi atu, ’eiaha rā ’ei mea ’ōhie a’e, ’ia fa’atura i te mau fafaura’a e ti’a ia tātou ’ia rave ’e ’ia ha’apa’o nō te ora i te ’evanelia a Iesu Mesia ».1
I tō’u fa’aro’ora’a i teie mau parau, ’ua pe’ape’a roa vau. ’Ua fa’aruru a’ena vau i te mau tāmatara’a i tō’u fare i Venezuela. Nō reira, i taua taime ra, ’ua vai i roto i tō’u ’ā’au te mau uira’a mai teie, « nāhea vau e nehenehe ai e vai maita’i noa, e mea pōiri mau ho’i te ao nei ? » ’e « nāhea vau e nehenehe ai e ti’aturi i te hō’ē ananahi maita’i i roto i te taunei ’ere’ere mai teie ? ».
’Ua hōro’a mai rā te peresideni Eyring i te rāve’a. ’Ua fa’ahiti ’oia i te Helamana 5:12, ’o tē parau nei nō ni’a i te patura’a i tō tātou niu « i ni’a i te papa ra o tō tātou ora, ’o te Mesia ïa ».
’Ua ti’aturi tāmau noa vau e parau mau teie pāpa’ira’a mo’a, e au ra rā te patura’a i tō’u niu i ni’a i te Fa’aora, e mea ’ōhie roa ’ia parau, ’eiaha rā nō te rave. Noa atu rā te reira, ’a ha’afātata ai au i te Mesia, ’ua ’ite a’era vau e ’āmuihia mai te mau mea ato’a ’ei maita’i nō ’outou, mai te mea e vai pāpū tō ’outou fa’aro’o iāna (hi’o Te Ha’api’ira’a Tumu ’e te mau Fafaura’a 90:24).
Te mana’ora’a ’ua fa’aru’ehia
Tau ’āva’e i ma’iri a’e nei, ’ua fāri’i au i te mau parau ’āpī ri’ari’a mai roto mai i tō’u ’utuāfare. Mai te huru ra, tē marua mai ra tō’u ao i mua iā’u. ’Ua tupu mai te mana’o paruparu, te ta’a ’ore ’e te hepohepo rahi, e tae roa ato’a ’ua ma’i-roa-hia vau !
’Aita vau i māramarama nō te aha mātou i fa’aruru ai i taua mau huru fifi ra, tē tāmata nei ho’i au i te ha’apa’o maita’i. ’Ua uiui au iā’u iho, ’ua rave ānei au i te hō’ē ’ohipa hape. E au ra ’ua pōiri roa te ananahi ’e ’ua tae mai te mana’o ’ua fa’aru’ehia vau e te Metua i te ao ra ’e e Iesu Mesia.
I roto i tō’u ’ati, ’ua paraparau vau i te hō’ē hoa maita’i. ’Ua parau mai ’oia iā’u i te hō’ē mea e’ita roa e mo’ehia iā’u : « i tō’u mana’o, ’ua riro teie ’ohipa ’ei rāve’a maita’i roa nō ’oe ’ia feruri i tō ’oe iho autā’atira’a ’e te Fatu. Noa atu te ’ohipa e tupu ra, tei ia ’oe te fāriura’a i ni’a iāna nō te fāri’i i te tauturu. Mai te mea e nā reira ’oe, e hōro’a mai ’oia ia ’oe i te here ’e te tāmarūra’a tā ’oe e hina’aro i teie taime ».
’Ua taui taua mau parau ra i tō’u hi’ora’a ātea. ’Ua riri au ’e ’ua pēpē ’e ’ua tapitapi au i te huru tupura’a o tō’u orara’a, terā rā, nā’u e mā’iti. Noa atu te mau mea tā tātou e fa’aruru nei, tē vai ra tō tātou mau mata’u, ’aore rā te mau fifi tā tātou e fa’aruru nei, tei pīha’i iho noa Iesu Mesia ia tātou i te mau taime ato’a. Tei ia tātou nei te mā’itira’a e fāriu atu i ni’a iāna ma te fa’aro’o, ’eiaha rā e fa’aātea ’ē iāna, i roto i te mau taime ’ārepurepu.
Mea nā reira tātou i te ha’apa’ari i tō tātou niu nō te fa’aro’o iāna ’e ’ia pāto’i i te mau tāmatara’a i roto i te ao nei. Nā roto i te mā’itira’a iāna.
Mai tā Elder D. Todd Christofferson nō te pupu nō te Tino ’Ahuru ma Piti ’āpōsetolo i ha’api’i : « I roto i teie auahi tāmāra’a, ’eiaha na tātou e riri i te Atua, e ha’afātata rā i te Atua. E pi’i i te Metua nā roto i te i’oa o te Tamaiti. E ’āpe’e ia rāua nā roto i te Vārua, terā mahana ’e terā mahana. E vaiiho i te taime hau ia rāua nō te fa’a’ite mai i tō rāua ha’apa’o ia ’outou. E ha’amātau mau ia rāua ’e ha’amātau mau ia ’outou iho ».2
’Ua tīa’i noa te Mesia ’ia fāriu atu vau iāna nō te tauturu. ’Aita te reira e parau nei e ha’amo’e ’oia i tō’u mau fifi ato’a, ’aore rā e fa’a’āfaro ’oi’oi i te mau mea ato’a i roto i tō’u orara’a ’e tō’u ’utuāfare, ’ua tauturu rā ’oia iā’u ’ia riro ’ei ta’ata maita’i a’e, ’ia ’ite i te ’oa’oa ’e ’ia riro ’ei mea maita’i a’e.
’E i te roara’a o te tau, ’a ’imi ai au i te Fa’aora nā roto i te pure, te tuatāpapara’a i te pāpa’ira’a mo’a ’e te fa’aro’o, ’ua tauturu ’oia iā’u ’ia fa’a’ore i te hapa a te mau melo o tō’u ’utuāfare, ’e ’ia tītau manihini fa’ahou i te ’oa’oa i roto i tō’u orara’a, noa atu ’aita ā te tahi mau tāmatara’a i ’āfaro atu ra.
E fafaura’a nō te pārurura’a
E mau mahana ’ati rahi mau teie. Tē fa’aro’o nei tātou i te mau tama’i ’e te parau tama’i, te mau ma’i pe’e, te mau ’ati nātura—’e ’ua pāpū iā’u tē vai ra te mau tau fifi a’e i muri nei. Teie rā, te patura’a i ni’a i te papa o Iesu Mesia ’e te ti’aturira’a iāna, e hōro’a tāmau noa mai te reira ia tātou i te hau ’e te ’oa’oa, noa atu te mea tā tātou e fa’aruru nei. Mai tā te peresideni Eyring i ha’api’i mai, « nō rātou i rotopū ia tātou nei e ha’ape’ape’a nei nō tātou iho ’e nō te feiā tā tātou e here nei, tē vai ra te ti’aturira’a i roto i te parau fafau tā te Atua i parau nō te hō’ē vāhi pāpū i roto i te mau vero i muri nei ».3
Auē ïa fafaura’a pūai ’e te nehenehe. ’E ’ua ’ite au i te reira parau fafau i te tupura’a i roto i tō’u orara’a. ’Ua ’ite au teie te ’evanelia a Iesu Mesia i fa’aho’i-fa’ahou-hia mai, ’e ’o ’oia te puna o te mau ha’amaita’ira’a ato’a. ’O ’oia te māramarama, ’o ’oia tō tātou Fa’aora ’e ’o tātou tāna mau māmoe. ’A mā’iti ana’e iāna ’e ’a mā’iti i te fa’aro’o.
Tē ora nei te ta’ata pāpa’i i Zulia, i Venezuela.