E maita’i te mau mea ato’a.

Hōho’a

Russell M. Nelson tē hi’o ra i te hōho’a o te ’ā’au

Hōho’a nō Russell M. Nelson nā Eldon K. Linschoten

I te ’ōmuara’a o te mau matahiti 1980, tō’u metua tāne, tei ro’ohia i te ma’i māfatu pūai, ’ua ravehia te hō’ē tāpūra’a māfatu tā mātou i ti’aturi ē, e fa’aroa atu ā te reira i tōna ora.

I te reira tau, te rāve’a maita’i i fa’a’ohipahia e te mau taote tāpū, e mea ’āpī ïa i Urutue. ’Ua mono te mau taote tāpū i te tāpo’i māfatu i te hō’ē tāpo’i ha’avare. I te pae hope’a, ’ua mātaro-maita’i-hia taua rāve’a ra, ’e ’ua fa’aora e rave rahi ora.

Nō te mea e fa’a’ohipahia te reira rāve’a ’āpī fa’ahiahia, e rave rahi mau taote māfatu tei haere mai e hi’o i te tāpūra’a. ’A rave ai te mau taote i te tāpūra’a, ’ua pārahi noa tō’u metua vahine i roto i te piha tīa’ira’a ma te pe’ape’a. Mai te huru ra ē, ’aita e hope’ara’a tō te hora.

’Ua ’oa’oa roa māua i te ’itera’a ē, ’ua manuia maita’i te tāpūra’a. I te haerera’a mai te mau taote i rāpae i te piha tāpūra’a, ’ua fa’aātea mai te hō’ē taote i te tahi atu mau taote ’e ’ua haere i roto i te piha tīa’ira’a. E taote rātere ’oia tei haere mai i Urutue nō te hi’opo’a i te tāpūra’a.

’Ua ha’afātata mai ra ’oia i tō’u metua vahine, ’ua fa’aea ’e ’ua tāpe’a mai iāna i ni’a i te tapono ma te huru ha’apāpū. I muri iho, ma te hi’o i roto i tōna nā mata, nā ’ō mai ra ’oia, « e maita’i te mau mea ato’a ».

’Ua tano te taote. ’Ua ora mai tō’u metua tāne e 24 matahiti fa’ahou, ma te tāvini i te Fatu ma tōna ’ā’au ato’a—ma te ea maita’i i teienei—e tae roa i te mahana hope’a o tōna orara’a.

I roto i te ’āmuira’a rahi a te ’Ēkālesia ’aita i maoro a’e nei, ’ua ha’amana’o tō’u metua vahine i taua fārereira’a ta’a ’ē ra e rave rahi matahiti i ma’iri. ’Oia mau, e ha’amana’o ’oia i te reira i te mau taime ato’a i taua taote tāpū ra tei haere mai—te peresideni Russell M. Nelson—e paraparau i te feiā mo’a.

E mea ta’a ’ē te tā’āto’ara’a o te mau peropheta a te Fatu nō tātou, noa atu te huru. E mea ta’a ’ē te tahi nō te mea, ’ua tāvini rātou ’ei peresideni nō te ’Ēkālesia i tō tātou ’āpīra’a. E mea ta’a ’ē te tahi nō te mea, ’ua tāvini rātou ’ei peresideni i te taime ’a bāpetizohia ai tātou. Nō tō’u metua vahine ’e nō’u, e mea ta’a ’ē te peresideni Nelson nō te mea ’ua ’ite ’oia ē, ’aita te mau rapa’aura’a rarahi ato’a e ha’aputapū noa i te feiā ma’i, i te feiā ato’a rā tei herehia e te ta’ata ma’i. ’Ua ’ite ’oia e hina’aro te mau melo o te ’utuāfare i te mau parau fa’aitoitora’a, te pūai ’e te tāmāhanahanara’a mai te mea, tē fifi ra te ora o te hō’ē tei herehia.

E vai noa tō māua māuruuru i te mau parau ha’apāpūra’a a te peresideni Nelson e rā ’ē te tau i Urutue, ’e nō tōna orara’a i roto i te tāvinira’a i tō tātou Metua i te ao ra ’e i te mau tamari’i a tō tātou Metua i te ao ra.