Nāhea te Fa’aora i te tauturu iā’u ?

Hōho’a

e ta’ata e tūturi nei i mua ia Iesu

Fa’aorara’a i te lepera, nā E. S. Hardy © Providence Collection / parau fa’ati’a nō Goodsalt.com

« ’Ua hāmani maita’i haere » Iesu Mesia (Te ’Ohipa 10:38) : ’Ua fa’aora ’oia i te hō’ē lepera (hi’o Mataio 8:2–3). ’Ua fa’aora ’oia i te tāvini o te hō’ē ra’atira fa’ehau, tei feruri e ’ere ’oia i te mea ti’amā, ’ua ti’aturi rā ’oia e tauturu mai iho ā te Fa’aora iāna (hi’o Mataio 8:5–13). ’Ua pūpū ’oia i te hau i tāna mau pipi i roto i te hō’ē vero (hi’o Mataio 8:23–27). I tōna ’itera’a i te hō’ē vahine tei ’oto roa nō te pohera’a tāna tamaiti hō’ē roa, ’ua tāmāhanahana ’oia iāna ’e ’ua hōro’a iāna i te tīa’ira’a, ’e ’ua fa’ati’a mai ra i tāna tamaiti mai te pohe mai (hi’o Luka 7:11–15).

’Ātivite

E nehenehe tātou e ’ite i te mana o te Fa’aora i teie mahana mai te mea e fa’a’ohipa tātou i te fa’aro’o iāna. ’A tai’o i te hō’ē o te mau ’ā’amu nō roto mai i te tai’ora’a o te Mai, pe’e mai nō teie hepetoma. ’A hi’o e mea nāhea tō te Fa’aora pāhonora’a i te mau hina’aro ’e i te fa’aro’o o te ta’ata.

’A feruri ’aore rā ’a ’āparau i teie mau uira’a i muri nei nō te feruri e mea nāhea tō te Fa’aora tauturura’a ia ’outou i roto i tō ’outou orara’a :

I tei hea taime tō’u tu’ura’a i tō’u fa’aro’o i roto i te Fa’aora ’e te ’itera’a i tāna fa’aorara’a (i te pae manava, i te pae ferurira’a, i te pae vārua, ’aore rā i te pae tino) ?
I tei hea taime tō’u ’itera’a i tōna hau ?
I tei hea taime tō’u fāri’ira’a i te tauturu mana’o-’ore-hia nā roto mai i te Fa’aora ?
I tei hea taime tō’u ’itera’a i tōna rima nā roto i te hō’ē temeio ’aore rā te hō’ē aroha rahi ?
I roto i tō’u orara’a i teienei, nāhea vau i te ha’apūai i tō’u fa’aro’o iāna ’e ’ia fāri’i i tāna tauturu ?