Tauturu ’e te tīa’ira’a nō roto mai i te ’āmuira’a rahi

Hōho’a

’utuāfare e tāmā’a ’āmui ra i roto i te piha tūtu

Hōho’a nō te ta’ata pata hōho’a ’e tōna ’utuāfare nā Cody Bell

I muri a’e i te fānaura’a ’o tā’u tamari’i mātāmua, ’ua māuiu au i te hepohepo i muri a’e i te fānaura’a. ’Ua riro ’ei taime fa’ahiahia mau i roto i tō’u orara’a i te mea ē e tamaiti tā’u, terā rā, ’aita tā’u e nehenehe e fāna’o hope roa i te ’oa’oa nō te fāri’ira’a i te hō’ē ’aiū, nō te mea ’ua hepohepo rahi roa vau.

I roto i taua taime fifi ra, ’ua pure rahi au i te Metua i te ao ra. ’Ua ani au iāna ’ia tauturu mai iā’u ’ia fa’aruru i teie tāmatara’a fifi. ’A fātata mai ai te ’āmuira’a rahi i taua pu’e tau fa’atopara’a rā’au ra, ’ua pure ato’a vau ’ia fāri’i au i te tāmāhanahanara’a i roto i te mau a’ora’a a te feiā fa’atere o te ’Ēkālesia.

’A fa’aro’o ai au i te mau a’ora’a i roto i te tuha’a purera’a mātāmua o te ’āmuira’a rahi, ’ua ha’amata vau i te ’ite i te māhanahana. I muri iho, i roto i te piti o te tuha’a purera’a, ’ua paraparau Elder Jeffrey R. Holland nō te pupu nō te Tino ’Ahuru ma Piti ’āpōsetolo nō ni’a i te hepohepo. ’Ua parau ’oia ē, e nehenehe te hepohepo e fa’atupu i te mana’o ē, e au tātou « mai te ’āu’a i pararī ra »¹ (Salamo 31:12). ’Aita roa atu vau i mana’o ē, e fa’aro’o vau i te tā’āto’ara’a o te hō’ē a’ora’a nō ni’a i te mea tā’u e fa’aruru nei.

’Ua riro teie ’ei taime ta’a ’ē nō’u. ’Ua tauturu te a’ora’a iā’u ’ia māramarama ē, ’ua here te Metua i te ao ra iā’u, ’e ’ua ’ite ’oia iā’u. ’Ua māramarama ’oia i te mea tā’u e fa’aruru nei. ’Ua hina’aro ’oia e tauturu iā’u ’e e hōro’a mai iā’u i te tīa’ira’a. ’Ua nā reira ’oia nā roto i te mau parau a Elder Holland.