’Ua ’ite noa na ’oe

Nā José G. Franco, Utaha, fenua Marite

’Ua fāri’i au i te hō’ē ’itera’a pāpū nō te ’evanelia i fa’aho’ihia mai, terā rā, tē toe noa ra 10 ’āva’e e hope ai tā’u parau fa’aau ’ei ta’ata tāvini nō te tahi atu ’ēkālesia.

Hōho’a

’orometua ’e te mau pīahi nō te séminaire

Hōho’a nā Leslie Nilsson

I te ivara’a o tō’u matahiti, ’ua māuiui tō’u niho. ’Aita e nehenehe fa’ahou e fa’a’oroma’i i te māuiui, terā rā ’aita tā mātou e moni nō te haere i te taote niho. I taua taime ra, tē ora ra vau i pīha’i iho i tō’u māmā rū’au maita’i i Mehiko.

Ma te roimata i roto i tōna mata, ’ua ui mai ’oia iā’u, « tē ti’aturi ra ānei ’oe ia Iesu ’e e nehenehe tāna e tauturu ia oe ? »

’Ua parau atu vau iāna tē nā reira nei au. ’Ua ani mai ’oia iā’u ’ia haere i roto i te piha i pīha’i iho mai, ’ia tūturi i raro ’e ’ia pure nō te ani i te hō’ē temeio. ’Ua nini’i au i tō’u ’ā’au i roto i te pure, ’aita rā hō’ē ’ohipa i tupu. Ma te au ’ore, ’ua ’umi’umi maita’i au i tō’u ta’a ’e ’ua pūpū fa’ahou vau i te piti o te pure. ’Aita i maoro ’ua ’ore te mauiui ! I tō’u horora’a e fa’a’ite i tō’u māmā rū’au, ’ua ’ite atu vau iāna i ni’a i tōna nā turi, tē tāparu ra i te Atua ’ia tauturu i tāna mo’otua na’ina’i. ’Aita roa atu i mo’ehia iā’u taua ’ohipa ra, e māuruuru rahi tō’u i tō’u māmā rū’au.

’Ua tupu te tahi atu mau ’itera’a pae vārua i muri mai.

I te 14ra’a o tō’u matahiti, ’ua reva atu vau i Texas, fenua Marite, nō te ’āmui atu i tō’u nā metua ’e tō’u mau taea’e ’e tuahine. ’Ua ’itehia iā’u te hō’ē ’Ēkālesia i reira, ’e ’ua ha’amata vau i te haere tāmau. Nō tō’u mau ’itera’a ’e te Atua, ’ua hina’aro vau e fa’a’ite i tōna i’oa ’e tāna ’evanelia i te mau ta’ata ato’a e hina’aro e fa’aro’o mai iā’u. I te 15ra’a o tō’u matahiti, ’ua tomo vau i roto i te ha’api’ira’a nō te tāvinira’a nō te riro mai ’ei ta’ata tāvini. E piti matahiti tō’u haerera’a i te mau ha’api’ira’a bibilia hou te ha’api’ira’a, i muri a’e i te ha’api’ira’a ’e i te mau hope’a hepetoma.

I te hō’ē po’ipo’i i te fare ha’api’ira’a tuarua, ’ua fa’aro’o vau i te māniania i roto i te piha tauira’a ’ahu o te mau tamāroa. Tuō mai nei hō’ē ta’ata, « Hei… Momoni ! ». ’Aita vau i fa’aro’o a’enei i te reira ta’o nā mua a’enei, e au ra rā mai te hō’ē parau fa’a’ino.

I muri iho tō’u ’itera’a ē, te ta’ata e tuōhia ra, ’o tō’u ïa hoa maita’i roa ’o Derek.

« Tē pe’ape’a nei au nō tō ’oe pi’ira’ahia ’ei Momoni », tā’u ïa i parau.

’Ua ’ata’ata Derek ’e ’ua nā ’ō mai ra, « ’aita ’oe i ’ite e aha te hō’ē momoni, e ’ere ānei ? »

’Ua parau mai ra ’oia iā’u ē, e i’oa pi’i noa te reira nō te mau melo o Te ’Ēkālesia a Iesu Mesia i te Feiā Mo’a i te mau Mahana Hope’a nei.

« Nō reira, e keretetiano ’oe ? » Tā’u ïa uira’a.

I tōna paraura’a mai, ’ē, ’ua ’oa’oa roa vau i te ’itera’a ē, hō’ē ā tō māua fa’aro’o ia Iesu Mesia.

« ’Ua ui ānei ’oe i te Atua ? »

« ’O vai teie mau momoni », ’ua uiui au, « ’e e aha tā rātou e ti’aturi nei ? »

’Ua haere au i ni’a i te natirara nō te ’imi i te reira. Tau minuti i muri mai, ’ua fa’aoti a’era vau e ’ere roa atu tō’u hoa i te hō’ē keretetiano, ’e tē haere nei ’oia i hade. Nō reira, ’ua tomo atu au i roto i te hō’ē misiōni nō te fa’aora iāna.

I roto i nā matahiti e piti i muri mai, ’ua tai’o vau i te mau buka ato’a tei ’itehia mai iā’u nō ni’a i te ’Ēkālesia, ’oia ato’a te Buka a Moromona tā’āto’a—e piti taime. ’Ua fārerei ato’a vau ia Derek ’e i te mau misiōnare rave tāmau nō te tāmata i te tauturu ia rātou.

I te 17ra’a o tō’u matahiti, ’ua ha’afeti’ahia vau i te ha’api’ira’a nō te tāvinira’a, ’ua fa’atōro’ahia ’ei ta’ata tāvini, ’e ’ua riro mai ’ei ’orometua nō te hō’ē ’āmuira’a na’ina’i i Texas. E piti ’āva’e i muri mai i tō’u fa’atōro’ara’ahia, ’ua paraparau fa’ahou vau i te mau misiōnare.

’Ua ui mai hō’ē o rāua, « ’ua tai’o ’oe i te Buka a Moromona ’e ’ua fa’aro’o ’oe i te mau ha’api’ira’a ato’a tā māua e nehenehe e pūpū atu, ’ua ui ānei rā ’oe i te Atua ē, e parau mau ānei tā māua parau poro’i ? E ’ite ’oe i te hō’ē pāhonora’a nō ’ō mai iāna ra, e ’ere ānei ? »

« ’Oia mau », ’ua pāhono atu au ma te ha’apeu.

’Ua pāhono mai ra te misiōnare, « ’ia hi’o ana’e au i te reira, e’ita roa atu ’oe e pau » « Mai te mea ’ua ani ’oe i te Atua e parau mau ānei te mea tā tō ’oe hoa e ti’aturi nei, ’e e pāhono mai te Atua, ’aita, nō reira ’ua fa’aoti ïa ’oe i te misiōni nō te reira ’oe i ha’amta ai i teie tere. Mai te mea rā e parau mai ’oia e parau mau tā māua parau poro’i, ’ua feruri ānei ’oe i te mau mea ato’a tā ’oe e nehenehe e roa’a mai ».

’Aita roa atu vau i feruri a’enei mai te reira te huru. I taua pō ra, ’ua tūturi au i roto i tō’u piha i muri a’e i te tai’ora’a i te Moroni 10:3–5. E mea ’ōhie roa te pāhonora’a a te Atua, e mea pūai rā. Ma te reo iti ha’iha’i, ’ua pāhono mai ra ’oia iā’u : « ’Ua ’ite noa na ’oe ».

Hō’ē pene ’āpī i roto i tō’u ti’ara’a pipi

I teienei tē vai ra tō’u ’itera’a pāpū nō te ’evanelia tei fa’aho’ihia mai, e aha ïa te parau nō tā’u tāvinira’a ? Tē toe ra 10 ’āva’e e hope ai tā’u parau fa’aau ’ei ta’ata tāvini. I muri a’e e rave rahi pure ’e te ’āparaura’a ’e te Atua, ’ua fa’aoti au e rave fa’aoti roa tā’u tāvinira’a. I roto i nā 10 ’āva’e i muri mai, ’ua tāmau noa vau i te fa’a’ite i te mau parau mau mātarohia o te bibilia, terā rā mai te mea e nehenehe, e ’āpiti atu vau i te hi’ora’a ātea o te ’evanelia i fa’aho’ihia mai. ’Ua fāri’i te mau ta’ata i teie mau parau mau ’e ’ua rahi atu tā’u nana iti mai te 20 e fātata atu i te 150.

I muri a’e i te fa’aotira’a tā’u parau fa’aau, ’ua pūpūhia mai iā’u te hō’ē ti’ara’a tāmau, ’ua ’ite rā vau ’ua tae te taime ’ia bāpetizohia vau i roto i te ’Ēkālesia. ’Ua tae te taime nō te ha’amata i te hō’ē pene ’āpī i roto i tō’u tere ’ei pipi.

I tō’u paraura’a i te reira i te mau melo o tō’u ’utuāfare, ’aita rātou i ’oa’oa—i te ha’amatara’a. Terā rā, e toru ’āva’e i muri mai i tō’u tomora’a i roto i te ’Ēkālesia, ’ua bāpetizo vau i tō’u metua vahine ’e e piti o tō’u taea’e ’e tuahine. I muri a’e i tō’u tāvinira’a i te hō’ē misiōni rave tāmau i roto i te misiōni nō Oklahoma i Oklahoma City, ’ua bāpetizo vau i tō’u teina tuahine.

Mai te mea e ui mai te hō’ē ta’ata nō te aha vau i taui ai i te ha’apa’ora’a fa’aro’o, i te mau taime ato’a e pāhono atu vau, « ’aita vau i taui i te ha’apa’ora’a fa’aro’o—e keretetiano ha’apa’o noa ā vau. ’Aita, ’ua ha’apūai noa rā vau i tō’u aura’a ’e te Fa’aora nā roto i te rirora’a ’ei melo bāpetizohia nō tāna ’Ēkālesia—Te ’Ēkālesia a Iesu Mesia i te Feiā Mo’a i te mau Mahana Hope’a nei ’Ua ’ite pāpū roa vau iāna i teienei, hau atu i te ’ōroto, maoti te fa’aho’ira’ahia mai te ’evanelia, te Buka a Moromona, te mau peropheta nō teie tau, ’e te mau ’ōro’a mo’a nō te fa’aorara’a ’e te fa’ateiteira’a e vai ra i roto i te hiero ».

I teie mahana, tē fāna’o nei au i te ha’amaita’ira’a nō te ravera’a i te ’ohipa ’ei ’orometua rave tāmau nō te sēminaire. Tē hōro’a noa nei ā vau i tō’u orara’a ia Iesu Mesia ’e i tāna ’evanelia. ’E tē tāmau noa nei ā vau i te parau i te mau ta’ata ato’a e fa’aro’o mai i te « parau maitata’i o te ’oa’oa rahi ra » (Luka 2:10).