“O Le Ola Tutoatasi e Faamalosia ai i Tatou,” Liahona, Aok. 2023.
O Mataupu Faavae Autu o le Talalelei
O Le Ola Tutoatasi e Faamalosia ai i Tatou
O le ola tutoatasi o lona uiga e mafai ona tatou tausia manaoga o i tatou lava ma o tatou aiga. A tatou ola faalagolago ia i tatou lava, o le a sili atu foi ona lelei lo latou auauna atu ma tausia isi. Ae o le ola tutoatasi e le faapea e tatau ona tatou feagai na o i tatou ma o tatou luitau. E mafai ona tatou talosaga atu mo se fesoasoani mai uo, aiga, tagata o le uarota po o le paranesi, ma tagata tomai faapitoa pe a tatou manaomiaina.
O Mataupu Faavae o le Faalagolago o le Tagata Ia te Ia Lava
O le ola tutoatasi e manaomia ai le a’otauina, usiusitai, ma le galue malosi. Tatou te faia le mea sili tatou te mafaia e tausia ai i tatou lava, ma e mafai ona tatou fesili atu i isi mo se fesoasoani pe a manaomia. Peitai, ina ia ola tutoatasi moni, e tatau foi ona tatou aoao ia maua le faatuatua ia Iesu Keriso. Ma a o tatou galulue e fesoasoani ia i tatou lava, o le a Ia faamalosia i tatou.
Ola Tutoatasi Faaleagaga
E mafai ona tatou fausia lo tatou ola tutoatasi faaleagaga e ala i le galulue e faamalosia a tatou molimau ia Iesu Keriso. Tatou te faia lenei mea a o tatou tatalo, suesue i tusitusiga paia, auai i le lotu, usitai i poloaiga, ma faia isi mea e aumaia faalatalata atili ai i tatou ia Keriso. O le iloaina e naunau o Ia e fesoasoani mai ia i tatou o le a tatou maua ai le faatuatua e tumau malosi ai e tusa lava pe faigata le olaga.
Ola Tutoatasi Faaletino
O le ola tutoatasi faaletino e aofia ai le mafai ona taulimaina manaoga faaletino o i tatou lava ma o tatou aiga. E aofia ai meaai, fale, soifua maloloina, ma isi manaoga. Tatou te faia lenei mea e ala i le mauaina o se aoaoga lelei, aoaoina po o le faalauteleina o tomai manaomia, galulue malosi, faaaogaina ma le atamai o o tatou taimi, ma le puleaina lelei o a tatou tupe.
Ola Tutoatasi Faalelagona
O le ola tutoatasi faalelagona o le tomai lea e fetuunai ai i luitau faalelagona ma le lototele ma le faatuatua. E tofu i tatou uma ma malosiaga ma vaivaiga. Faafetai i le talalelei, ua tatou iloa e mafai ona tatou filifili pe faapefea ona tali atu ia i latou. O le tali atu ma le faatuatua i le Alii e faateleina ai lo tatou tomai e fetaiai ai ma isi faigata ma le faamoemoe sili atu.
Aotauina
E tatau ona tatou aoao i taimi uma. E finagalo le Atua ia tatou aoaoina o tatou mafaufau ma faaleleia atili o tatou tomai i lenei olaga atoa ma i le olaga a sau. O le tele o lo tatou aoaoina, o le tele foi lena o lo tatou avea ma se faatosinaga sili atu mo le lelei ma le tausiga o i tatou lava, o o tatou aiga, ma i latou e manaomia le fesoasoani.
Faamanuiaga o le Ola Tutoatasi
Ua aoao mai perofeta a o tatou faaleleia lo tatou ola tutoatasi, o le a faamanuiaina i tatou i le faamoemoe ma le filemu sili atu. O le a mafai ona tatou fesoasoani i o tatou aiga ma isi o loo manaomia le fesoasoani. Ma o le a faamanuiaina i tatou i le tele o avanoa ma faatasi ai ma le tomai e faaauau ai pea ona alualu i luma.
Punaoa o le Ekalesia
E mafai e lau siteki ona ofo atu ni vaega o le ola tutoatasi. E mafai e nei vaega ona aoao atu ia te oe mataupu faavae o le ola tutoatasi ma tomai e pei o le puleaina o au tupe po o le mauaina o se galuega e sili atu. E mafai ona e maua punaoa e faatatau i ai i le Gospel Library. Filifili “Tusi ma Lesona” sosoo ai ma le “Ola Tutoatasi.”