O Le A Se Mea e Mafai Ona Ou Faia e Fesoasoani Ai i le Tama Teine a La’u Tama?

Sa ou tootuli i aso uma i le tatalo mo Heta. Sa matou tatalo o se aiga lautele, ae sa faaesea pea e Heta o ia lava. Sa ou manao i le Atua e toe faaleleia o ia i le teineitiiti fiafia sa i ai o ia.

Ao faaauau pea ona ou tatalo, na faamanatu mai e le Agaga ia te au se aoaoga mai ia Peresitene Gordon B. Hinckley (1910-2008): “Ia aua lava nei galo o nei fanau o atalii ma afafine o le Atua ma e ao ona outou vaavaaia e pei o a outou lava, o Ia na uluai avea ma matua ae tou te lei avea ma matua ma e na te lei aveesea Lana aia tatau faamatua po o le naunau i Ana fanau iti nei.”¹

Sa amata ona ou tatalo mo le finagalo o le Atua, Lana taimi, ma Lana taitaiga, ae le o la’u. Sa manaomia ona ou faaaloalo o Ia o le Tama i le Lagi o Heta. Sa ou saili e faalogo i le Agaga, ae le na o le tatalo ma le atuatuvale ina ia faia lo’u loto. Sa ou iloa o le a Ia tausia Heta. Sa ou faitau ma toefaitau le 3 Nifae 18:20: “Ma o soo se mea tou te ole atu ai i le Tamā i lou igoa, e sao, ma talitonu o le a outou maua, faauta, o le a tuuina mai lava ia te outou.” Na folafola mai e le Tama Faalelagi, o lea na ou filifili ai o le a ou faatuatuaina o Ia.

Sa faamanatu mai e le Agaga ia te au o au o le matua matua ma e mafai ona ou alofa ia Heta i se auala ese nai lo ona matua. Sa manaomia ona ou faaali atu sa ou fiafia i lona faatasi ma au. Sa ma fetesia’i. Sa ma talanoa e uiga ia i ma’ua uma o ni afafine o le Atua, ma sa faia ni ma talanoaga faaletalalelei. Sa ia faia ni ata faapitoa lava mo au. Sa ou opoina o ia i avanoa uma na ou maua. Sa ma kuka faatasi, faatau faatasi, ma matamata faatasi i ana ata tifaga e sili ona fiafia i ai.

A o mavae atu masina, sa faasolosolo manuia teisi o ia. Faatasi ai ma le fesoasoani a lona tina, sa ia aoao atu ai se lesona o le Sau, Mulimuli Mai ia te A’u faalevitio i le matou aiga. O isi taimi sa ia faasoa mai ai se mau. Sa ia faia ni kuki ma le uso o lona tina ma taaalo ma ona tausoga i taaloga.

Na amata ona suia lemu le olaga o Heta. Sa ia faauo atu i se teineitiiti i le pitonuu a o faasavali lana taifau. Sa fautuaina o ia e ona matua e nofo mo le vasega a Tamaitai Talavou i le Aso Sa, ae le na o le auai i le sauniga faamanatuga. Sa ia feiloai i se uo fou i se gaoioiga a le autalavou. A o lagona e Heta le malosi atili, sa tonu ia te ia o le a ia taumafai e toe foi atu e auai i le aoga. Ua lelei nei o ia i le aoga ma ua fiafia i le seminare.

Ata

atigi ma le pepe

Ata na tusia e Carolyn Vibbert

Ia Lotofaafetai

Faatasi ai ma laa taitasi na uia e Heta, sa ou lagonaina le lotofaafetai tele. Ou te faafetai mo ona matua, lona aiga lautele, tamaitai talavou ma o latou taitai, ma se faiaoga tuuto o le seminare. Ou te faailoa atu lo’u agaga faafetai mo nei agelu i le lalolagi i a’u tatalo i aso taitasi.

O le olaga o Heta e le atoatoa, ae ua ia maua le poto, malosi, ma le lototele e ala i lenei tofotofoga. E mafai ona ia toe faasoa atu lana ataata fiafia, ma le tiotio ia i latou o siomia o ia. O loo tuputupu a’e o ia o se talavou faamanuiaina ma taulai atu i vaifofo. O le Atua o le Tama Faalelagi o Heta ma o le a fesoasoani ia te ia ia avea o ia ma tagata sili ona lelei. E talia e ona matua faalelalolagi le Agaga ma saili e taiala lona olaga i Lana fesoasoani. Ou te faalogo pea pe a manaomia ona latou talanoa, ma ou te faaali atu i taimi uma le alofa.

E eseese uma olaga o tagata. Ma e sili atu le silafia e le Tama Faalelagi o le auala e faamanuia ai i tatou taitoatasi.

Ou te faafetai ua tatou maua le avanoa “e leoleo ai e le aunoa le tasi ma le isi.”² O tofotofoga faaleaiga e faamanuiaina ai lo’u olaga aua e ala mai ia i latou, ua aoaoina ai a’u e le Tama Faalelagi. “Ia e lotomaualalo; ma o le a taitai ai oe e le Alii lou Atua i le lima, ma tuu mai ia te oe tali i au tatalo” (Mataupu Faavae ma Feagaiga 112:10).

O Ia o lo’u Tama Faalelagi e taiala e faapea foi ma Heta.