Pe na Faaleagaina e Ponokalafi Lo’u Gafatia ona Lagona ma Tuuina Atu le Alofa?

Saunia e Camri Burrell

Sa ou salamo mai le faaaogaina o ponokalafi, ae e lē o faamaloloina lava a’u.

Ata

o se tamaitai ua lagonaina le gaogao

Ina ua 14 o’u tausaga, sa ou iloaina sa i ai so’u faafitauli i ponokalafi. Sa ou fai ifo pea ia te a’u lava, “Ou te iloa e lē lelei lenei mea. E tatau ona tu’u.”

Ae o le a ou toe foi mai pea lava pea i le mailei lava lea e tasi. Sa ou tauivi ma lenei taamilosaga mo ni nai tausaga. Ma ina ua mavae le tele o taumafaiga e taofi, sa ou iloa e lē mafai ona ou faatoilaloina lenei mausa na o a’u. Ona sa ou iloaina sa lapataia pea i tatou e perofeta ia aloese mai ai, sa ou maasiasi e aapa atu i soo se tasi mo se fesoasoani, e aofia ai ma lo’u Faaola. Sa tele nauā taimi na ou sese ai. Sa ou lagona sa lē tatau mo a’u le togiolaina. Ae na i’u lava ina ou filifili e saili se fesoasoani.

A o ma feiloai ma lo’u epikopo e uiga i o’u tauiviga, sa ia tali mai ma le alofa. Ae sa amata ona ou iloaina se mea: o a’u tauiviga ma ponokalafi na puaoa ai lo’u gafatia e iloa ai ma maua le alofa—ia alofa ia te a’u lava, ia alofa atu i isi, ma ia alofa i le Atua.

I le saisaitia ai i mamanu o le pepelo mo le tele o tausaga, sa ou manatu afai e iloa e se tasi le mea sa ou tauivi ai, o le a latou lē alolofa ia te a’u. Sa ou manatu foi o le alofa sa lē tumau ma e lē moni.

Mulimuli ane, a o o’u salamo, fausia ni mausa e sili atu ona lelei, ma faatinoina mamanu o le loto pulea ma mafaufauga soifua maloloina, sa amata ona ou iloaina sa lagonaina e Iesu Keriso o’u mafatiaga ma e mafai e Ia ma le Tama Faalelagi ona faamagalo a’u. Sa amata ona ou lagonaina le faamoemoe nai lo le maasiasi. Ae o le a alu ai sina taimi e amata ai ona lagona le alofa i le ala lava lea e tasi.

Lagonaina ma le Faasoaina Atu o le Alofa o le Atua

I ni nai tausaga mulimuli ane, sa ou alu ai i se misiona! Sa ou matuā fiafia lava i le auauna atu i lo’u Faaola, ae o aafiaga tumau mai la’u tauiviga faalilolilo na oo mai i lo’u olaga o se faifeautalai. Sa ou tauivi pea e alofa i isi ma lagona le alofa, aemaise lava mai le Tama Faalelagi.

Ou te le’i faamagaloina lava a’u lava. Sa ou mafaufau pea sa lē alofagia a’u, e ui lava sa ou galue malosi i le faatoilaloina o la’u mausa ua tuanai. Sa ou fefe e faavaivaia pe valaaulia soo se alofa i lo’u olaga ona o le fefe i tiga, lē fiafia, ma puapuaga. O lea sa masani ona ou teenaina ai tagata ma ou lē faatagaina i latou e faalatalata mai ia te a’u.

I se tasi po a o o’u lagonaina le matuā tuuatoatasi, sa ou tootuli ai ma aioi atu i le Tama Faalelagi mo se fesoasoani. Sa ou faailoa atu ia te Ia o’u faanoanoaga i lo’u fefe e alofa ia te a’u lava, ia alofa ia te Ia, ma alofa i Ana fanau e pei ona ou manao ai.

A o o’u tagi, sa ou lagonaina se uunaiga manino ma agamalu i lo’u mafaufau. Sa ou lagonaina sa ta’u mai e le Atua ia te a’u e lē afaina le alofa loloto. O lena alofa o se meaalofa ua Ia tuuina mai ia te a’u—o se taleni sa ou natia. Sa ou lagonaina le uunaiga e tatau ona ou faaaogaina ma faateleina. E pei lava o le alofa o le Atua mo a’u e lē uma lava, sa manaomia ona ou alofa atili.

O lenei alofa mutimutivale mai le Agaga na ootia ai a’u e sili atu nai lo soo se mea sa ou lagonaina muamua. Sa ou lagonaina moni le alofa o le Tama Faalelagi—o le uiga o le avea ma Ona afafine. O se lagona e lē mafai ona ou faamatalaina i ni upu.

Sa ou manao e faia ia sili atu le lelei i le faasoaina atu o lenei alofa i isi ma faatagaina isi e faasoa mai ia te au. Sa ou tatalo mo avanoa e faalolotoina ai lenei gafatia mo le alofa ma i le āluga o taimi sa faamanuiaina i le tele o aafiaga e faasoa atu i ou tuagane ma uso.

E Mafai e le Alofa Faa-Keriso ona Suia Mea Uma

Sa ou salamo mai le faaaogaina o ponokalafi, ae sa manaomia pea ona faamalolo lou loto. Ma o lena faamalologa e lei tupu i le taimi e tasi—o le mana o le Faaola na oo mai e ala i le sailia o Ia i le suesueina o upumoni i tusitusiga paia ma tatalo faatauanau mo se fesoasoani. Sa amata ona ou talitonu na lava le alofa o Ia ma le Tama Faalelagi ia te au e ofo mai ai ia te au le togiola. Sa ou lagonaina o lo’u tiga ma lo’u ita ia te au lava ia ua alu ese lemu atu.

O le tala i le laau o le ola i le 1 Nifae 8 na aoaoina ai au i le ala e mafai ai ona ou sailia Iesu Keriso. Ua i ai tagata uma i se nofoaga ese i le olaga. O nisi taimi, o le sailia o lo tatou ala ia te Ia e alu ai le taimi. Ae ou te iloa o loo faatalitali mai le olioli e faavavau ia i tatou a o tatou uia laasaga i luga o le ala o feagaiga e agai atu ia te Ia.

O mea sese e lē faamatalaina ai i tatou. E manao Satani ia tatou mafaufau faapea e lē alofagia i tatou ma lē agavaa. Ae e sese lena mea. E Alofagia Atoatoa i Tatou Ma e mafai ona fesoasoani Keriso ia i tatou ia tutulai ae i luga atu o a tatou agasala.

E toatele o loo tauivi ma ponokalafi po o isi mausa latou te lē mananao i ai, ma e masani lava, e pei o lou tulaga, o nei mausa e tupuolaola i le faalilolilo ma le faaesea. Ae ua ou vaaia le ala e mafai ai e le alofa faa-Keriso ona suia mea uma mo i latou o e tauivi.

O i tatou o e tauivi e mafai ona saili muamua le malamalama e ala i le faamaoni. O le fausiaina o sootaga malolosi ma amiotonu ma le Tama Faalelagi ma Iesu Keriso, lou aiga, ma au uo e mafai ona avea ma faamanuiaga sili ona aoga i au taumafaiga e fausia ni mausa lelei atu ma sau ia Keriso.

A’o ia saunoa atu ia i latou o loo tauivi ma ponokalafi, sa fautua mai ma le alofa Elder Ulisses Soares o le Korama a Aposetolo e Toasefululua:

“O le valaaulia e sau i le Faaola o lona uiga o le faamoemoe. … A tatou taliaina lenei valaaulia, ua tatou faamaulaloina i tatou lava i Ona luma. … Ae o le a le uiga o le faamaulaloina o i tatou lava i Ona luma? Atonu o lona uiga … ia talosaga atu mo se fesoasoani mai o tatou taitai, mai o tatou tau aiga, mai o tatou aiga, e oo lava i fomai faapitoa. … O lona uiga foi e lē tatau lava ona tatou fiu e taumafai. E leai se isi e atoatoa. Tatou te faia uma lava ni mea sese. … O loo i ai i le Alii se alofa atoatoa mo i tatou uma. E malamalama o Ia i o tatou tiga, luitau ma faafitauli.

“Afai la tatou te liliu atu o tatou loto ia te Ia … e mafai e le Alii ona faamagalo i tatou, [Na te] mafai ona opoina i tatou, e mafai ona alofa ia i tatou, malamalama, ma mafai ona fesoasoani ma tuuina mai ia i tatou le malosi e lē fiu ai. Aua nei galo o loo avanoa le alofa tunoa o le Alii ia te outou i le taimi muamua, i le taimi nei, ma le taimi ‘pe a uma mea uma e mafai ona outou faia’ (2 Nifae 25:23).”¹

Tatou te lē tau lalafi i le maasiasi—e mafai ona tatou aapa atu, faamaoni, ma ole atu mo se fesoasoani. O le iloaina e alofagia a’u e le Tama Faalelagi ma i latou o siomia au na faia ai se eseesega tele i lo’u tomai e faamalolo ai mai le faaaogaina o ponokalafi ma ona taunuuga, auā o lena malamalama na fesoasoani ia te au e iloa ai e mafai ona togiolaina au, alofaina, ma agavaa mo le fesoasoani a Keriso.

E faapena foi ia i tatou a o tatou saili atu ia te Ia.