Ua Na’o Tusiga Faaeletonika
O le Maota o le Alii—Sāvali Lata Mai Nei mai Perofeta, Aposetolo, ma Isi Taitai o le Ekalesia
Tagai i mea na aoao mai talu ai nei e perofeta soifua i luga o ala o faasalalauga faaagafesootai e uiga i le malumalu.
Sa faamalosiau lata mai nei ia i tatou ia Peresitene Russell M. Nelson ina ia “taulai atu i le malumalu i auala e te lei mauaina muamua.”1 Sa ia fautua mai foi: “Faamolemole ia faaavanoa se taimi mo le Alii i Lona maota paia. E leai se mea o le a faamalosia lou faavae faaleagaga e pei o auaunaga i le malumalu ma tapuaiga i le malumalu.”2
Na faamalamalama atili mai e Peresitene Dallin H. Oaks, Fesoasoani Muamua i le Au Peresitene Sili, “E finagalo le Atua ia tatou taumafai uma mo Ana faamanuiaga aupito maualuluga e ala i le tausia o Ana poloaiga aupito maualuluga, feagaiga, ma sauniga, ia e taualuga uma i Totonu o Ona malumalu paia ua fausia i le lalolagi atoa.”3
Aisea e matuā totonugalemu ai le malumalu i lo tatou avea ai ma soo? E pei ona a’oa’o mai Peresitene Nelson: “O le malumalu e taoto i le totonugalemu o le faamalosia o lo tatou faatuatua ma le malosiaga faaleagaga ona o le Faaola ma Lana aoaoga faavae o le taulaiga autu lea o le malumalu. O mea uma o loo aoaoina i totonu o le malumalu, e ala i aoaoga ma e ala i le Agaga, e faateleina ai lo tatou malamalama ia Iesu Keriso. O ana sauniga taua e fusia ai i tatou ia te Ia e ala i feagaiga paia o le perisitua. Ma, a o tatou tausia a tatou feagaiga, Na te faaeeina i tatou iLonamana faamalolo ma faamalosiau [tagai i le Mataupu Faavae ma Feagaiga 109:15, 22]. Ma ioe, oka so tatou manaomiaina o Lona mana i aso o i luma atu.”4
E faaopoopo atu i saunoaga o le konafesi aoao e uiga i le malumalu, ua faasoa mai foi e taitai o le Ekalesia ni sāvali e uiga i nei autu i luga o ala o faasalalauga faaagafesootai, e aofia ai mea nei:
Sui o Outou Olaga ma Faamanuia o Outou Aiga
“O malumalu taitasi e avea o se faatusa o lo tatou auai i le Ekalesia, o se faailoga lea o lo tatou faatuatua i le olaga pe a mavae le oti, ma o se laasaga lea i le mamalu faavavau mo i tatou ma o tatou aiga.
“Ou te folafola atu afai o le a e faaavanoaina se taimi e i ai i totonu o le malumalu e lē aunoa, o le a suia ai o outou olaga. O le a faamanuiaina ai o outou aiga, faamalosia ai lo outou faatuatua ma tatala ai pupuni o le lagi mo outou.”
Peresitene Russell M. Nelson, Facebook, Aok. 14, 2022, facebook.com/russell.m.nelson.
Fesootai Sa’o Atu i Tatou i le Tama Faalelagi ma Iesu Keriso
“O o tatou malumalu o nofoaga aupito paia ia i le lalolagi. E lē gata ina latou tuufaatasia i tatou o ni aiga ae faafesootai sa’o atu i tatou i lo tatou Tama ma Lona Alo, o Iesu Keriso.”
Peresitene Russell M. Nelson, Facebook, Mat. 15, 2021, facebook.com/russell.m.nelson.
Faamalosia o Tagata Talavou
“Ou te manatu o le a i ai se faatosinaga maoae o le malumalu i le tuputupu ae o le faatuatua i le autalavou. O le a faatutu e tagata talavou a latou sini e faaipoipo i le malumalu.
“Ma afai e faamauina outou o ni aiga, o lona uiga o le a susulu ma susulu atili le lumanai. Ou te manatu o se taimi faigata i luma atu, o lea ou te manatu ai o lena taula o le faatuatua ia Iesu Keriso ma le malumalu o Lona maota ma mea uma e tutupu i lena malumalu e faasino moni lava ia Iesu Keriso. Ou te manatu o le a i ai lena aafiaga i le malumalu, ma o le a faamalosia ai tagata talavou. I le afā, ia e mauaa oe lava i luga o le papa o le Faaola. O lena mea o le a e sao atu ai mai i le afā.”
Peresitene Henry B. Eyring, Facebook, Aok. 17, 2021, facebook.com/henry.b.eyring.
Ia Faamauina o ni Aiga mo le Faavavau
“E leai nisi fale i luga o le fogaeleele—e oo lava i fale e sili ona matagofie—e maua ai mea o loo i ai i malumalu.
“O lo‘u toalua, o Barbara, na maliu i le toeitiiti fa tausaga talu ai. Ae ona sa ma ulu atu i le maota o le Alii ma faamauina o se tane ma se avā e ala i le mana o le perisitua, ua fusia faatasi ai i ma‘ua ma le ma fanau e toafitu, fanau a fanau e 43, ma le silia ma le 100 fanau a fanau a fanau, ma e oo mai ia Iuni 5, 2022 ua 103 fanau a ma fanau, mo le faavavau atoa. Oka se matagofie o le malumalu! E faatumulia lo‘u loto i le olioli aua o le a faatasia lo’u aiga e faavavau. Ma e mafai foi e lou aiga.
“A oo ina e matua e pei o au, o le a e lē fiafia tele i le maua o tupe e tele po o le aveina o se taavale manaia. O le mea aupito sili ona tāua i lou olaga o lou aiga—e lē gata o lou aiga o loo i ai iinei ae faapea foi lou aiga i le faavavau.”
Peresitene M. Russell Ballard, Facebook, 6 Iulai, 2022, facebook.com/mrussell.ballard.
Maua Le Mana o le Faale-Atua
“E sili atu nai lo se isi lava taimi, o loo tatou manaomia le mana ma le malosi lea e oo mai e ala i lo tatou sootaga faalefeagaiga i le Alii o Iesu Keriso.
“Tatou te lē o mai i le malumalu e lalafi ai pe sosola ese ai mai mea leaga o le lalolagi. Ae, tatou te o mai i le malumalu ina ia maua le mana o le amioatua e ala i sauniga faaleperisitua lea e mafai ai ona tatou faafeagai ma faatoilalo le lalolagi o mea leaga.”
David A. Bednar, Facebook, Me 23, 2022, facebook.com/davida.bednar
Avea ma Tagata Fou ia Keriso
“E suia o tatou loto i upumoni tatou te aoaoina i le malumalu e uiga i le Atua ma Iesu Keriso—ma e ala i folafolaga tatou te faia e alolofa ma auauna atu ai. E itiiti lo tatou taulai atu i mea tatou te mananao i ai ae tele i le faaogatusa o o tatou loto ma le finagalo o le Atua. … O le uluai matafaioi o le maota o le Alii e mo i tatou ina ia liua ma avea ma tagata fou ia Keriso.
“E masani lava i le lalolagi, o suiga e taumafai mai fafo i totonu. E toatele e talitonu o le suia o tulaga o se tagata o le auala sili lea e suia ai se tagata.
“Peitai, o le Atua, e masani lava ona galue mai totonu i fafo. Afai tatou te faatagaina o Ia, e mafai e le Atua ona suia o tatou loto—ona faamanuiaina lea o i tatou i le gafatia ma le malosi e suia ai o tatou tulaga.
“I totonu o malumalu paia, o mea tatou te aoaoina ma folafola atu e fai e suia ai i tatou mai totonu, ma mafai ai ona avea atili i tatou ma soo tuuto o Iesu Keriso.”
Elder David A. Bednar, Facebook, Ape. 19, 2022, facebook.com/davida.bednar.
Saunia e Feiloai ma le Atua
“O faamanuiaga autu o malumalu O Le Ekalesia a Iesu Keriso o le Au Paia o Aso e Gata Ai o sauniga o le faaeaga. O le auai i le malumalu e saunia ai i tatou e feiloai ma le Atua.
“O le malumalu o se nofoaga foi o le sulufaiga. I lo’u olaga atoa ua avea le malumalu ma se nofoaga o le mamalu ma le filemu i se lalolagi o loo vavaō. O se mea matagofie le tuua o popolega o le lalolagi i tua o lenei nofoaga paia.
“O lagona o le tutusa ma le lotogatasi e faatumulia ai le malumalu. E oofu papae tagata uma. E leai se faailoga o le tamaoaiga, tulaga, po o ni ausiaga faaleaoaoga; o i matou uma o uso ma tuafafine ua faamaualaloina i matou lava i luma o le Atua.
“O le i ai o se malumalu o le Alii … o se faamanuiaga moni lava faalelagi. I le avea ai o se tasi o Aposetolo a le Faaola, ou te molimau atu i le paia o le Faaola ma i lalo o le taitaiga a le Tama, ua Ia taialaina ai lenei galuega faaselesitila o le faaolataga ma le faaeaga.”
Elder Quentin L. Cook, Facebook, 20 Nov., 2022, facebook.com/quentin.lcook
Ia Maua Uma Avanoa Paia e Mafai e le Atua ona Tuuina Mai
“Afai tatou te faamaoni i feagaiga tatou te osia i totonu o malumalu O Le Ekalesia a Iesu Keriso o le Au Paia o Aso e Gata Ai, e mafai ona tatou maua avanoa paia uma e mafai ona tuuina mai e le Atua.”
Elder D. Todd Christofferson, Facebook, Aok. 15, 2022, facebook.com/dtodd.christofferson.
Saili le Malologa ma le Toe Faafouina
“Sa ou faasoa atu talu ai nei ni manatu i tamaiti aoga … e uiga i le ala e mafai ai e se tautinoga e galue, o se mataupu faavae taua moni lava o le talalelei, ona liliu le lē lelei pe afai e lē paleni ma le malolo ma le toe faafouina po o le tauaveina i se tulaga matautia lea e avea ai ma se ituaiga o tapuaiga.
“E mautinoa lava lo tatou manaomia o le malologa mo le faafouga faaletino, ae o le lava o le avanoa mo le malologa ma le mafaufau loloto e taua foi mo le faafouina faaleagaga. O le mea moni, a aunoa ma le faafouga faaleagaga, e mafai ona avea le agaga ma pologa i le tino.
“E mafai ona tatou maua le faafouga faaleagaga i le Sapati faapea foi i totonu o le malumalu, le maota o le Alii. A o tatou laa atu i totonu o le malumalu, tatou te laa ese mai le lalolagi. Tatou te aai i le areto e fafagaina ai ma feinu i le vai mama o le filemu faaleagaga. O nisi taimi tatou te talanoa ai e uiga i galuega faalemalumalu, ae e mafai foi ona tatou talanoa e uiga i le malologa i le malumalu.
“Ou te uunaia outou taitoatasi ia saili le malologa ma le faafouga i vaiaso taitasi i tapuaiga i le Sapati ma i le malumalu.”
Elder D. Todd Christofferson, Facebook, Iulai 7, 2021, facebook.com/dtodd.christofferson
Tuu “le Maota o le Alii” ia Goto Ifo i Lou Agaga
“Oka se aafiaga mamalu ma le fiafia o le faapaiaina lea o le Malumalu o Praia Cape Verde. O le masalosalo, lotovaivai, lē mautonu, ma luitau e mafai ona fetaiai ma le tele o tagatanuu o Cape Verde, ae o lenei malumalu o le a avea o se faamanuiaga ma se sulu taiala i tagata uma i le atunuu pe o se tasi o se tagata auai o le Ekalesia a Iesu Keriso pe leai.
“O le malumalu o le maota moni lava o le Alii. Tuu atu na upu ia magoto lemu i totonu o lou agaga. O Lona maota lea.
“E faafesootai e malumalu le lagi ma le lalolagi. O ni nofoaga paia, avanoa paia, ma se fetaula’iga i le va o le lalolagi ma le faavavau.
“Ioe, o loo i ai luitau i le olaga nei. Ae faatasi ai ma lo tatou faatuatua ia Iesu Keriso, e mafai ai ona tatou tulimatai atu ma le olioli i o tatou ola e faavavau. O lenei maota paia ua avea ma se nofoaga o le mauaina o faaaliga ma se sulufaiga o le filemu. Ou te iloa o le a tumau le Alii i lenei malumalu fou faatoā faapaiaina i masina, tausaga, ma tausaga e tele o i luma atu.
Elder Neil L. Andersen, Iuni 20, 2022, facebook.com/neill.andersen.
Aafiaga i Faamanuiaga Ofoofogia
“Po o le a lava lo tatou matutua, e mafai e malumalu ona faamanuiaina o tatou olaga i ni auala matagofie.”
Elder Gary E. Stevenson, 24 Iulai, 2022, facebook.com/stevenson.gary.e.
Manatunatu i le Filemu e Oo Mai
“O tusiata fale, faatufugaga, lanu sesega, ma isi elemene o mamanu [o malumalu] e fuafuaina ma le faaeteete faatasi ma le lotoifale i le mafaufau.
“O le matagofie ma le gauai e tuuina atu i auiliiliga uma e fatu ai se maota o le Alii. O nei faamatalaga e tāua i le ala lava e tasi na tāua ai le matagofie o le malumalu o Solomona, ae ua na o le pusa o maataua—ae lē o maataua.
“O le ‘penina tau tele’ o sauniga, feagaiga, folafolaga, ma faatonuga na maua ai iina. O le fiafia ma le olioli na lagonaina e i latou i itu uma e lua o le veli a o latou mauaina faamanuiaga o le malumalu ma o mai ia Keriso.
“Ou te valaaulia outou ia tomanatu i le filemu lea e sau mai tapuaiga ma auaunaga i le malumalu.”
Elder Gary E. Stevenson, Facebook, Set. 14, 2021, facebook.com/stevenson.gary.e
Faalatalata Atili i le Atua ma le Tasi ma le Isi
“E ala i feagaiga paia tatou te osia i le maota o le Alii, e mafai ai e lo tatou Faaola ona fesoasoani e faalatalata atili atu i tatou i le Atua ma le tasi ma le isi a o tatou lalagaina faatasi o tatou loto ma le agaalofa, faamagaloga, ma le alofa mutimutivale ua tuuina mai e Keriso.”
Elder Gerrit W. Gong, Facebook, Tes. 5, 2022, facebook.com/gerritw.gong.
Aluese mai le Lalolagi Tuufua ma Pagatia
“Faaalu se taimi tele faatasi ma le Alii i Totonu o Ona malumalu. O malumalu o maota totino moni o le Alii. Ma a tatou i ai iina, e mafai ona tatou lagonaina se uunaiga manino ua tatou tuua le lalolagi tuufua ma le pagatia i tua atu.”
Elder Ulisses Soares, Facebook, Tes. 8, 2022, facebook.com/soares.u.
Saunia Fanau mo le Maota o le Alii
“O Tyrone o se tagata e 11 tausaga le matua i Harare, Zimbabwe, o se tagata fou O Le Ekalesia a Iesu Keriso o le Au Paia o Aso e Gata Ai. O loo fausia i le taimi nei se malumalu i Harare, ma o loo sauniuni tagata o le ekalesia mo faamanuiaga e maua mai le malumalu. Ina ua maea se lesona se tasi e uiga i malumalu i le Feagaiga Tuai ma le vaaia o lenei mea na tupu o le Uo i le Uo i le tautotogo e uiga i faamanuiaga o le malumalu, sa talosagaina tamaiti e fatu ni faataitaiga o le malumalu e faaaoga ai mea e mafai ona latou maua. O piliki ma maa ua malepelepe, o tumutumu o lau o tolo, ma o se fasi paipa e lei taulimaina lava ma le migao ma le fatufatuai.
“Na fausia e Tyrone se malumalu matagofie e faasoa atu. Sa ia faaali atu lana faataitaiga matagofie i tagata uma i le lotu, faaali atu potu, faamalama, ma e oo lava i faaupuga faapitoa i luga ae o le faitotoa.
“Ou te fiafia e vaai atu i tamaiti o aoao e uiga i faamanuiaga e faavavau o loo maua i le maota o le Alii. E mafai ona tatou saunia i latou e ala i le aoaoina o i latou e uiga i feagaiga o le a latou osia iina. E mafai nei ona latou amata saunia e papatiso mo tagata o o latou lava aiga, maua faaeega paia, ma ia faamauina mo le olaga nei ma le faavavau atoa. E mafai ona tatou aoao i latou a o latou ulu atu ma auauna atu i le malumalu, o le a latou lagonaina atoatoa le mana o le Faaola i o latou olaga.”
Peresitene Susan H. Porter, Facebook, Tes. 19, 2022, facebook.com/PrimaryPresident.