O Le Tupe Siliva i le Gutu o le I’a

Aisea na faaaofia ai e Mataio lava ia lenei vavega i lana talafaamaumau o le galuega a le Alii? Pe ona o Mataio, i le avea ai ma se ao lafoga, sa ia lagonaina se sootaga patino i lenei tulaga? Pe ona o Mataio na sau mai Kapanaumi, lea na tupu ai lenei mea? Pe na ia faaalia ai se isi faataitaiga o le mana faavavega o Iesu Keriso e poloaiina ai e le gata i elemene (tagai Mataio 8:23–27) ae faapea foi i i’a i le sami? (tagai Kenese 1:28).

A o mafaufau loloto i nei fuaiupu, e tele mea tatou te aoaoina mai le ala na tali atu ai le Faaola i Lana Aposetolo o Peteru. O le tele o vavega na faia e Iesu Keriso o galuega paia sa faaaoga e faamanuia ai isi. Peitai, o lenei vavega, e foliga mai o se avanoa faafaiaoga e fesoasoani ai e saunia Peteru ma isi Aposetolo mo le taitaiga i le lumanai i le malo. E ala i upu ma faatinoga, na aoao atu ai e Iesu Lona faasinomaga o le Alo o le Atua, O Lona mana e iloatino ai le mea na faatoa ta’u atu e Peteru i le au ao lafoga, o Lona “silisiliese” i le iloa tonu o le mea o le a i ai se i’a,¹ ma Lona manao ia aua lava nei faatiga pe avea o se maa tu’ia ia i latou o e vaivai le faatuatua (tagai 1 Korinito 8:9–10; 9:22).

Ua faamatalaina ma le manino e se Aposetolo o aso e gata ai lenei vavega ua mafai ai e Iesu ona “faamautuina lona tulaga o le Alo paia ia Peteru i se ala faavavega. O le a Ia faia se vavega e le masani ai ma tulaga ese, o se mea e leai lava se tasi na faia e ona lima. O le a ia totogia se lafoga na te leʻi aitalafu ai, i tupe na te leʻi mauaina, e faʻamalieina ai i latou o loʻo ia manaʻo e aua neʻi faatiga.”²

O le lafoga faaletausaga o le malumalu, po o le saafiafiga, e nafa ma le lua tareki, po o le afa sekeli, ma sa faamoemoeina mai i alii matutua uma i Isaraelu, e ui lava o ositaulaga ma aoao e masani ona manatu ia i latou lava e tuusaunoaina. O le faamoemoega o lenei tupe lafoga o le lagolagoina lea o le tausiga ma gaoioiga o le malumalu. O se iloiloga faalelotu, ae le o se tulaga manaomia a le malo.

O lenei lafoga sa muai ta’ua o le “tupe togiola” i le taimi o Mose. Afai e i ai se tasi e tuusaunoa mai lenei lafoga, o le Mesia, o Ia lea o le a togiola mo agasala a tagata uma.³ Ae e ui lava i le tautinoga faanatinati a Peteru i le au ao lafoga, nai lo le aoaiina o Peteru, sa aoaoina o ia e le Alii i ni lesona taua.

E pei lava ona masani ai, na aoao mai Iesu e ala i le faia muamua o fesili faatupu manatu. O nei fesili na faamanino atu ai ia Peteru e le o i ai se lafoga a le Alii, aua o Ia o le Alo o le Atua, ma o le malumalu o le maota o Lona Tama ma le Alo. Peitai, faatasi ai ma le agamalu atoatoa, sa Ia “lagolagoina” le tautinoga na faia e Lana Aposetolo ma fesoasoani ia te ia ia malamalama e le o se taimi lea e faatausuai fua ai. E ui semanu e faigofie tele le mauaina o le afa sekeli e tatau ai i se ala masani, ae sa Ia faaaogaina lenei taimi e faamalosia ai le faatuatua o Ana Aposetolo e ala i le faaali atu ia Peteru o Lona mana faavavega e poloaiina ai e oo lava i se i’a i le sami.

Mafaufau i lesona nei na aoaoina e Peteru ma isi Aposetolo ma pe faapefea ona faatatau ia i tatou:

1. Na iloa e Peteru na silafia e Iesu Keriso ona manatu. A o lei tautala Peteru, ua uma ona silafia e Iesu le mea na fai atu ai Peteru ia i latou o e na o mai e ao lafoga. Mulimuli ane, sa faaaoga e Peteru lena lava meaalofa o le iloatino ina ua pepelo Anania ma Safaira e uiga i a laua taulaga (tagai Galuega 5:1–11).

2. Na aoao mai Iesu e tusa lava po o a mea e manaomia po o mea tautupe, o le a saunia lava e le Alii se ala mo Lana galuega e agai ai i luma, pe faavavega pe masani ai.

Ata

pusa o loo matala o i ai tupe ma isi aitema i totonu

O se faataitaiga faaonaponei o le “tupe siliva i le i’a” na tupu a o malaga atu Polika Iaga ma Heber C. Kimball e ala i le taavale solofanua e ui atu i Initiana ma Ohaio a o agai atu i misiona i Egelani. Sa amata la laua malaga i le $13.50 ma sa lei faamoemoe e mafai ona laua malaga mamao atu i le taavale solotoso, ae i nofoaga uma e malolo ai, ina ua alu Polika Iaga i lana pusa, sa ia maua faavavega le tupe e manaomia e totogi ai le latou pasese i le isi nofoaga e tu ai.⁴ I le taunuu atu, ua latou totogiina le silia ma le $87. E pei ona tusia i se api talaaga a le Au Peresitene Sili o le 1860: “Sa alu atu [Polika Iaga] i lana pusa, ma sa faateia tele o ia i le mauaina o nisi o [tupe] iina, ma e oo mai i lenei aso na te [lei] iloa [pe na faapefea] ona oo mai iina vagana ai se sui le vaaia mai le lalolagi Faalelagi e auina atu le Folafolaga o le Talalelei.”⁵

3. Pe a manaomia, o le a faia e le Alii vavega e faataunuu ai folafolaga na faia e taitai o Lana Ekalesia. I le 1967, na folafola mai ai e Peresitene Spencer W. Kimball e faapea, a o faia e tagata o le Ekalesia la latou vaega, o le a pa’ū le Pupuni Uamea i Europa ma le Pupuni Ofe i Asia e faataga ai le galuega faafaifeautalai ina ia olaola i le lalolagi atoa.⁶ I lena taimi, o lenei iuga sa foliga mai e mamao lava, e lei mafaufauina, ma e le mautinoa. Ae peitai, i totonu o le luasefulu tausaga, sa solo mai nei puipui i ni auala sa lei faamoemoeina, ma faavavega.

4. E ui lava o le avea ai ma soo o Keriso atonu tatou te iloa e sa’o i tatou, ae e i ai taimi o le tausisi po o le tauanauina ia iloa e isi lo tatou sa’o o le a na ona tupu ai se faatausuai e le manaomia. Ma e sili atu ona leaga, e mafai ona avea o se maa tu’ia i le alualu i luma faaleagaga o se isi tagata.

O se faataitaiga matagofie o lenei agamalu ma le le naunau e avea ma se maa tu’ia o loo maua i le aafiaga lenei a Peresitene James E. Faust (1920–2007), o le sa avea muamua ma fesoasoani i le Au Peresitene Sili. “O lona atalii, o Marcus, na talanoa … e uiga i le o ma ia i le malumalu i Uosigitone, D.C., e auai i se sauniga o le malumalu [faaeega paia]. Ina ua tuuina atu e Peresitene Faust lana pepa faataga mo le ulufale atu—o se pepa faapitoa sa faaaoga e le au pulega aoao—sa lei iloaina e le tagata faigaluega o le malumalu o ia po o le pepa faataga ma teena lona auai atu. ‘Nai lo le faamaasiasiina o le tagata e ala i le ta‘u atu ia te ia po o ai o ia, sa faanoi ma le faaaloalo e Tamā o ia lava ae matou o ese uma.’”⁷

Ou te faafetai mo le tala a Mataio i le tupe siliva i le i’a. O Peteru le faifaiva, o se tagata matua faaletagata lava ia ma e lei mafaufauina, ua toe faaalia foi se vavega e aofia ai le fagota.⁸ E aumaia ai ia i tatou le faamoemoe o le a fesoasoani mai foi le Alii ia i tatou ia tuputupu ae e ui lava i a tatou mea sese. E pei o Peteru, o le a tatou aoao mai le faataitaiga a lo tatou Matai, o lē sa onosai i mea sese ma le agamalu e ui i le i ai o le mana uma.

E pei o Aposetolo anamua, tau ina ia tatou iloa le Alii o le Alo o le Atua, ma faatuatuaina i auala faavavega, e mafai ona Ia saunia auala tatou te faataunuu ai Ona faamoemoega. Ma i la tatou auaunaga ma sootaga ma isi, tau ina ia tatou mafaufau ma le toto’a i soo se upu po o faatinoga e mafai ona avea o se maa tu’ia, aemaise lava i soo se tasi e vaivai i le faatuatua.