“E Mafai Ona Aumai ma A’u Lena Tusi?,” Liahona, Aok. 2023.
O Leo o le Au Paia o Aso e Gata Ai
E Mafai Ona Aumai ma A’u Lena Tusi?
Sa ou masalosalo i lo’u uunaiga faaleagaga seia oo ina fesili mai le fafine sa i o’u luma e uiga i le Tusi a Mamona.
Ata na tusia e Brian Call
O le gauai atu i le valaau a le perofeta i le 19 o o’u tausaga, sa ou saunia ai au lava e auauna atu i se misiona talai. E lei leva, ae ou maua se valaauga i le Misiona a Mekisiko Hermosillo.
A o ou faatalitali e ulufale atu i le nofoaga autu e aoao ai faifeautalai i le Aai o Mekisiko, sa oo ina ou popole i le auala o le a ou faasoa atu ai le talalelei. Sa ou mafaufau, “O le a se mea e tatau ona ou faia e saunia ai?”
I se tasi taeao ae ou te lei alu mo le galuega, sa ou tuuina se kopi fou o le Tusi a Mamona i la’u ato. Ona ou tatalo lea, “Le Tama Faalelagi, fesoasoani mai ia ou iloa le auala e tuuina atu ai lenei Tusi a Mamona i soo se tasi lava e te auina atu i ai au.” Ona ou alu lea mo le galuega.
Ina ua uma le galuega, sa ou alu i le inisitituti o mataupu faalelotu. E oo atu i le taimi lena, ua galo ia te a’u le tusi o lo’o i la’u ato. Peitai, ina ua ou oso i luga o le pasi e toe foi i le fale, sa ou nofo i autafa o se tamaitai talavou o loo faitauina le Tusi Paia.
Sa ou lagonaina se uunaiga malosi na faapea mai, “O le tagata lenei.” Sa ou masalosalo i le uunaiga i le taimi muamua, ae sa ou toe lagonaina foi.
“Faamalie atu,” sa ou fai atu ai a o ou aumaia i fafo la’u Tusi a Mamona, “e taua tele lenei tusi ia te a’u, ma ou te fia tuuina atu ia te oe.”
Faatasi ai ma se vaaiga o le le fiafia, sa ia tali mai, “Leai, faafetai.” A o tusi atu i lana Tusi Paia, sa ia faaopoopo mai, “Ua lava lenei tusi mo a’u.” Ona ia tu lea i luga ma aluese, ma tuua na o au i luga o la’u laina nofoa.
A o ou nofo ai iina mo se minute sa ou lagonaina le teenaina ma le valea, ma mafaufau e uiga i lo’u lagona, sa liliu mai le fafine sa i o’u luma ma fai mai, “Faamolemole, o e manao lava e foai ese lena tusi?”
O le mea moni, sa la lagonaina mai ma lona toalua le ma talanoaga ma le tamaitai talavou.
“Ioe!” Sa ou tali atu ai.
A o ma talanoa, sa ou iloa ai sa mananao le ulugalii e faitau le Tusi a Mamona. Sa la mananao foi e aoao atili e uiga i le Ekalesia. Sa ou fiafia lava e tali a la fesili.
O lena aso sa ou aoaoina ai mo au lava e faapea “ua sinasina le fanua ua saunia e selesele” ma “afai ua te [i tatou ] le manao e auauna atu i le Atua ua valaaulia [i tatou] i le galuega” (Mataupu Faavae ma Feagaiga 6:3; 4:3).
Na faia a’u e le Atua o se meafaigaluega i Ona aao. I aso nei, o le faia o le galuega faafaifeautalai o se mea e sili ona pele i lo’u olaga.