O Mafuaaga e Ono e Tumau ai le Faamoemoe mo se Faaipoipoga Fiafia

I le totonugalemu o le folafolaga i le aiga o loo i ai upumoni e faapea, “o le faaipoipoga i le va o se alii ma se tamaitai ua faauuina e le Atua ma o le aiga e totonugalemu i le fuafuaga a le Foafoa mo le taunuuga e faavavau o Ana fanau.”² E tele mau ua faamanatu mai ai ia i tatou le taua o le faamauina faatasi o alii ma tamaitai o se tane ma se ava (tagai, mo se faataitaiga, Kenese 2:18; 1 Korinito 11:11; 4 Nifae 1:11; Mose 3:18). “Na foafoaina le fogaeleele ma sa toefuataiina lenei Ekalesia ina ia mafai ai ona faatulaga aiga, faamauina, ma faaeaina e faavavau,”³ na a’oa’o mai ai Peresitene Russell M. Nelson.

Na faasoa mai foi e Peresitene Nelson le mafuaaga e taua tele ai le faamauga i le malumalu:

O le faaipoipoga i le va o se alii ma se tamaitai e paia—ua faauuina e le Atua [tagai i le Mataupu Faavae ma Feagaiga 49:15–17 Ou te faamautinoa atu foi le lelei silisili o se faaipoipoga i le malumalu. O se ituaiga faaipoipoga aupito mautu lea e mafai e lo tatou Foafoa ona ofo mai i Lana fanau.

“E ui o le faaolataga o se mataupu e patino i le tagata, ae o le faaeaga o se mataupu faaleaiga. E na o i latou ua faaipoipo i le malumalu ma ua faamauina a latou faaipoipoga e le Agaga Paia o Folafolaga, o le a faaauau ona avea ma taitoalua pe a mavae le oti [tagai i le Mataupu Faavae ma Feagaiga 76:53; 132:7] ma maua le tikeri aupito maualuga o le mamalu selesitila po o le faaeaga.”⁴

A o tatou saili ia maua ma faamamaluina se faaipoipoga faaselesitila, ua tatou alualu i luma i a tatou matafaioi e faavavau ma i feagaiga faaeaina.

O le faaipoipoga e mafai ona vave ona fesuiai mai lagona lofituina i le lagonaina e pei o se faamanuiaga ma se avanoa sili pe a tatou manatua e lē mo na o se alii ma se tamaitai ia faamanuiaina faatasi. Ae, o loo latou saili foi ia manuia i se faigapaaga ma le Tama Faalelagi. E pei ona sa a’oa’o mai Peresitene Nelson: “Ina ia agavaa mo le ola faavavau, e tatau ona tatou osia se feagaiga faavavau ma tumau ma lo tatou Tama Faalelagi [tagai Mataupu Faavae ma Feagaiga 132:19]. O lona uiga o se faaipoipoga i le malumalu e lē gata i le va o le tane ma le avā; e opomauina ai se faigapaaga ma le Atua [tagai i le Mataio 19:6].”⁵ Ma a tatou faipaaga ma le Atua, ua faamanuiaina i tatou i le mauaina o Lona mana e faamanuia ai a tatou taumafaiga a o tatou fefautuaai ma Ia.

E pei ona aoao mai Elder Ulisses Soares o le Korama a Aposetolo e Toasefululua: “E ala i le faamauga i le malumalu, e ulu atu ai se tamaitai ma se alii i le faatulagaga paia o le faaipoipoga i le feagaiga fou ma faavavau. O le faatulagaga lea o le perisitua, ua tuuina atu ai ia te i la’ua ia faamanuiaga e faavavau ma le mana paia e taitai ai mataupu a lo latou aiga a o latou ola e tusa ai ma feagaiga na la osia. Mai i lena taimi, la te agai atu ai i luma ma le fegalegalea’i ma i le faigapaaga atoa ma le Alii, aemaise e tusa ai ma o la tiutetauave taitasi na atofa mai le lagi mo le faafaileleina ma pulefaamalumalu ai i lo la’ua aiga.”⁶

Ua saunoa perofeta i le tele o taimi e uiga i faamanuiaga e oo mai e ala i faamauga i le malumalu ma aiga e faavavau. Mo se faataitaiga, o lenei ituaiga o faaipoipoga ma aiga e mafai ona tuuina mai:

• “Le puna o lo tatou olioli silisili”⁷

• O se “iloaina atoatoa o … faamanuiaga … toetoe lava a le oo i lo tatou malamalama faaletino”⁸

• “O se vaega taua o le sauniuniga mo le ola e faavavau”⁹

• “Avanoa sili atu mo le fiafia nai lo … soo se isi lava sootaga faaletagata”¹⁰

• “O le faavae mo le faatulagaga faaagafesootai, o le punavai o le mama, ma le faavae mo le faaeaga e faavavau”¹¹

• “O se meaalofa faapelepele mai le lagi”¹²

• “O lagona sili ona loloto ma matagofie o lagona uma”¹³

• “O le galuega aupito sili ona taua a le Alii o le a e faia”¹⁴

• “O oa silisili i le lalolagi ma i le lagi”¹⁵

• “O faamanuiaga silisili”¹⁶

• “O lemafuaagasili ona taua o o tatou olaga atoa. … Afai o le a tatou tuuto atu i tatou lava i lenei galuega, o le a tatou faaleleia isi vaega uma o o tatou olaga”¹⁷

• “O se avanoa paia o le a aoao ai [i tatou] ia avea atili e faapei o le Atua”¹⁸

• “O le puna o lo tatou alualu i luma e faavavau ma le olioli ma le faatulagaga a lo tatou Tama Faalelagi”¹⁹

• “O se sootaga alofa, tumau, ma sili atu ona atoatoa”²⁰

• “O se punavai o le faamalieina e lē faatusalia, e oo lava i le olioli”²¹

• “O faamanuiaga maoae o fanau ma le fiafia latou te aumaia ia i tatou i lenei olaga ma le faavavau”²²

• “O se paaga moni ma tutusa”²³

• “O le lotogatasi na aoao mai e le Faaola”²⁴

• “Olioli atili i la tatou malaga i le ola e faavavau”²⁵

• “O lo tatou gafatia e auauna atu ai i le tasi ma le isi ma le tasi ma le isi … o le tele o tagata e matuai tele lava”²⁶

• O le “matuai fiafia lava e faavavau”²⁷

• “Olioli tele ma le faamalieina i le olaga faitino”²⁸

• “O se tasi o olioliga paia o le olaga”²⁹

• O se aafiaga “tauia” ma le “matagofie”³⁰

• O le taialaina e le “Alii … i mea uma … aafiaga tuputupu ae faatasi”³¹

• “O se faatulagaga silisili mo le faatoilaloina o soo se tulaga e manatu faapito pe manatu ifo na o oe lava”³²

• “O le avanoa mo le aafiaga sili o le alofa ma sauniuniga mo se olaga uluola”³³

• “O le siosiomaga silisili lea e mafai ona latou ola ai e tusa ma a latou feagaiga ua osia ma le Atua”³⁴

• “O le fili … aua lava nei inoino i le mana e faavaivaia ai le faavae o lo latou mafutaga e faavavau”³⁵

• “O se penina e le mafaatauina, o se oa o le taua e le iu”³⁶

• “O se ala paia ua faauuina. … E leai lava se isi sootaga o soo se ituaiga e mafai ona maua ai le fiafiaga tele, e fua mai ai mea lelei e tele, pe aumaia ai le faaleleia tele faaletagata”³⁷

• “O le fiafia moni i lenei olaga ma i le faavavau”³⁸

E lē gata ina saunia e le faaipoipoga i le va o se alii ma se tamaitai le tuputupu ae e faavavau, ae e maua ai foi se faatulagaga sili mo le tausiaina o fanau ma le faamanuiaina o malo. Na aoao mai Elder D. Todd Christofferson o le Korama a Aposetolo e Toasefululua: “O se aiga e fausia i luga o le faaipoipoga a se alii ma se tamaitai e maua ai se faatulagaga sili mo le fuafuaga a le Atua ia lauusiusi—o le faatulagaga mo le fanauina o fanau, o e o mai i le mama a’ia’i ma le taumamaina mai le Atua, ma le siosiomaga mo le aoaoina ma sauniuniga o le a latou moomia mo se olaga manuia faaletino, ma se olaga e faavavau i le lalolagi a sau. O se vaega toaitiiti o aiga e fausia i na ituaiga o faaipoipoga e taua mo nuu ia ola ai ma lauusiusi. O le mafuaaga lena e uunaia ai e nuu ma malo ma puipuia le faaipoipoga ma le aiga o ni faalapotopotoga anagatā. E lē na o se mea e uiga i le alofa ma le fiafia o tagata matutua.”³⁹

Na aoao mai foi Peresitene M. Russell Ballard, o le Sui Peresitene o le Korama a Aposetolo e Toasefululua e faapea:

“A oo ina faia e tagata ia tautinoga faaleaiga ma faalelotu i mataupu faavae o le talalelei, ona amata lea ona manuia faaleagaga ma e tele foi ina faapena le faaletino.

Ma, e moni, e faamalolosia nuu lautele a o faatupulaia ai le malolosi o aiga. O tautinoga i le aiga ma tulaga faatauaina omafuaagaautu ia. Toetoe o isi mea uma lava eaafiaai. A faaipoipo ia ulugalii ma faia tautinoga a le tasi i le isi, latou te matuā faateleina lava o latou avanoa e soifua manuia ai faaletamaoaiga. A fananau mai fanau i se ulugalii ua faaipoipo ma i ai uma se tinā ma se tamā, e tele foi o latou avanoa ma le manuia tau galuega. A oo foi ina galulue ma taaalo faatasi aiga, e lauusiusi foi tuaoi ma nuu, e faaleleia le tamaoaiga, ma e itiiti foi ma tau lē manaomia e le malo ni polokalama fesoasoani mo e matitiva.”⁴⁰

E tusa lava pe na e sau mai se aiga e lē o se faavae o se faaipoipoga le alofa ma le lotogatasi, ia manatua e mafai ona e fatuina se siosiomaga e faatotonugalemu ia Keriso i lou aiga. Na a’oa’o mai Elder Christofferson e faapea “e mafai ona tou avea ma augatupulaga, atonu o se augatupulaga muamua i lou aiga, lea e mafai ona faatulaga ia mamanu paia na faauuina e le Atua mo aiga ma faamanuia ai augatupulaga uma e mulimuli mai ia te oe.”⁴¹

Ma e pei ona fautuaina mai i le Mo Le Malosi o le Autalavou: O se Taiala mo le Faia o Filifiliga: Manatua “e silafia e lou Faaola lou tulaga, ma e alofa o Ia ia te oe. Ia onosai, faaauau pea ona tausia poloaiga a le Atua, ma avea o se faataitaiga lelei i lou aiga. Fausia ni sootaga i totonu o lou aiga faaleuarota. Saunia nei e fausia lou lava aiga e faavae i aoaoga a Iesu Keriso.”⁴²

E mafai ona tatou maua le mafanafana tele i le iloaina o le a taialaina i tatou e le Alii i o tatou manaoga amiotonu mo se faaipoipoga malosi ma o le a Ia saunia punaoa ma le malosi tatou te manaomia e fatu ai le “fiafia i le olaga faaleaiga,”⁴³ e tusa lava pe e lē o mea ia na tatou oo i ai i le taimi ua tuanai.

E oo lava ia i latou o loo galulue agai atu i se faaipoipoga e faavavau, e lē o tagata uma o le a mauaina lena faamanuiaga i lenei olaga. Ae e mafai ona tatou maua le mafanafana i lenei folafolaga mai ia Peresitene Nelson, o le mataupu faavae ua aoaoina foi e le toatele o isi perofeta: “Ua ou iloa e toatele tagata matutua o le Ekalesia e lei faaipoipo. E ala i le leai o ni o latou lava faaletonu, latou te feagai ai ma tofotofoga o le olaga na o i latou. Ia manatua e i tatou uma, i le ala ma le taimi a le Alii lava ia, e leai se faamanuiaga o le a taofia mai Lana Au Paia faamaoni.”⁴⁴

A o tatou faatalitali i le Alii mo na faamanuiaga, e mafai ona tatou “faia ma le fiafia mea uma ua i ai i lo tatou mana” ona “tutu lea ma le filemu” ma “vaai i le faaolataga a le Atua, ma mo lona aao e faaali mai” (Mataupu Faavae ma Feagaiga 123:17). Ma e mafai ona tatou saunia e maua le faamanuiaga silisili ua ofoina mai ia i tatou—faaeaga i le olaga a sau.