Ua Na’o Tusiga Faaeletonika: Autalavou Matutua
Pulea o le Tagata Lava Ia: O Se Taamilosaga o le Taumafai ma Toilalo
Pe na i ai se taimi na e tauivi ai e amata—pe taofi—le faia o se mea, e ui lava sa e manao moni i ai? O ni fautuaga nei se lima mo le atiina ae atili o le loto pulea.
“Aue, ua ou toe faia fo’i!”
Pe ua e fai ifo ea lena tala ia te oe lava ina ua uma ona e ‘aia lena fasi keke sa e folafola ia te oe lava o le a e lē toe ‘aia? Pe ina ua uma ona e faasolosolo i ni nai tusiga a ua tea lou taimi moe, po o le ita ina ua uma ona e fai mai e te lē faia? Ou te manatu sa tauivi i tatou uma e tuu le faia o se mea e ui lava sa tatou mananao ma le faamaoni e taofi.
O le faataitaia o le loto pulea ua na o se vaega e tasi o le avea ma soo. Na fautuaina e Alema lona atalii o Sepulona ina ia “pulea ou tuinanau uma, ina ia mafai ona faatumuina oe i le alofa” (Alema 38:12). E pei lava o se faagutu e taofi ai le malosi o se manu, o le atiaeina o le loto pulea o o tatou lagona ma tuinanau e mafai ona fesoasoani ia i tatou e maua ai le tele o le mafutaga ma le Agaga.
Ae o le mauaina o le loto pulea e lē faigofie. E masani lava o se taamilosaga o le taumafai ma toilalo seia oo ina tatou ausiaina. Ae o nisi nei o fautuaga e fesoasoani ia te oe i au taumafaiga e faafailele se loto pulea sili atu.
Taulai atu i le Faaola
E tusa lava pe tatou te taumafai e fai le mea sili tatou te mafaia, tatou te faia lava ni mea sese. E faia e tagata uma. A tupu lena mea, e faigofie ona lagona le lotovaivai po o le mafaufau pe o le mafai ea ona tatou toe lelei. I upu a Elder Michael A. Dunn o le Fitugafulu, o le olaga “e mafai i nisi taimi ona lagona le pei o le 1 pasene le alu i luma ae 2 pasene le alu i tua.”1
Ae ua valaaulia ma le alofa i tatou e le Faaola ia taumafai pea. O le a Ia faamalosia ma fesoasoani ia i tatou. O le a Ia suia o tatou loto ma o tatou olaga. O o tatou sootaga faalefeagaiga ma Ia e aumaia ia i tatou le avanoa sili atu i Lona mana. Ae afai e “tumau lo tatou lē fefe i lo tatou pulunaunau e taumafai ai pea ia ausia le 1 pasene o manuia, o lē sa ‘tauave o tatou faanoanoa’ [Isaia 53:4] o le a tauaveina i tatou.”2
Aua le Faavaivai
Se’i o’u faamalamalamaina atu lenei manatu i se tala. Sa faia e se aiga ni fuafuaga e o faatasi i se malaga fiafia. Sa latou fiafia e asiasi i se nofoaga fou ma maua ai ni mea maoae na tutupu ai.
Pe tusa o le afa o le latou malaga, na leaga ai le latou taavale. Sa latou faanoanoa ma lotovaivai. Sa latou lagonaina ua maimau uma a latou taumafaiga, o lea sa tonu ai ia i latou e toe foi i le fale ma toe amata la latou malaga.
Ia, atonu e te faapea ifo ia te oe lava, e faavalevalea lena mea—aisea o le a latou toe amata atoa ai? Ae tatou te lē faia ea le mea lava e tasi i nisi taimi? O nisi taimi tatou te lagona ai le lotovaivai po o le talitonu sese faapea o se mea sese itiiti e tasi e tapēese ai le alualu i luma ua tatou ausia. Ae o mea sese e lē tafiesea ai le alualu i luma tatou te faia a o tatou taumafai ia avea atili e faapei o Iesu Keriso. E pei ona faamalamalama mai e Elder Dieter F. Uchtdorf o le Korama a Aposetolo e Toasefululua: “Na maliu Iesu Keriso, le Alo o le Atua, ina ia lē tausalaina i tatou e a tatou mea sese ma taofia ai e faavavau lo tatou alualu i luma. Ona o Ia, ua mafai ai ona tatou salamo, ma ua mafai ai ona avea a tatou mea sese ma ala tatou te oo atu ai i le mamalu e sili atu.”3 E manaomia ona tatou onosai ia i tatou lava ma tumau i le faamoemoe.
Faatulaga ni Sini Laiti.
O le a i ai taimi e na o le pau le mea e mafai ona tatou mafaufau i ai o le tele o lo tatou toilalo. Tatou te taumanatunatu pe o le a i ai se taimi o le a tatou oo ai i le tulaga o le loto pulea tatou te mananao ai. Ae o taimi na, atonu ua tatou manatu e tele mea e mafai ona faamoemoeina mai ia i tatou (tagai Mosaea 4:27).
E lē faapea la e tatau ona tatou lafoai a tatou taumafaiga ia maua le loto pulea. Nai lo lena, e tatau ona tatou taulai atu i mea e mafai ona tatou ausia i le taimi nei. Na fautua mai Peresitene M. Russell Ballard, o le Sui Peresitene o le Korama a Aposetolo e Toasefululua e tatau ona tatou “faatutu ni sini mo se taimi puupuu … ua paleni lelei—e lē tele tele pe laiti tele, ma e lē maualuluga tele pe maualalalo tele. Tatalo mo le taitaiga faalelagi i le faatuina o au sini.”4
A o tatou ausia sini laiti taitasi, i le āluga o taimi o le a tatou vaai ai i le tele o mea ua tatou ausiaina pe a tatou taulai atu i le isi laasaga nai lo le tini.
Atinaeina o Faiga Maloloina e Taulima Ai
O nisi taimi tatou te taulimaina ai lagona e ala i le faia o se mea e ese ai o tatou lagona. Mo se faataitaiga, pe a ou matuā atuatuvale lava, ou te fiafia e ai i meaai ou te fiafia i ai. Ae o nisi taimi o nei amioga e mafai ona avea ma mausa leaga e faigata ona motusia.
E aoga le tomanatu ma malamalama i soo se masani ua tatou oo i ai. Afai e i ai sa’u mausa o le faaaogaina o la’u telefoni pe a ou ivā, ona mafai lea ona ou taulai atu pe aisea ua ou lagona ai le ivā. Afai e mafai ona ou faia isi gaoioiga aoga e taulima ai lo’u ivā, o le a faigofie atu ona atiina a’e le puleaina o le tagata lava ia e mafua ai lo’u faaaogaina o la’u telefoni.
Ua folafola mai e le Faaola o “mea vaivai” e mafai ona avea ma mea malolosi pe a tatou o mai ia te Ia ma ole atu mo Lana fesoasoani paia (Eteru 12:27).
Faataitai le Agaalofa Ia Oe Lava
I a tatou taumafaiga e taumafai ia avea atili e faapei o le Faaola, e mafai ona oo mai lagona lē fiafia ia i tatou lava pe a tatou lē ausia Lana faataitaiga. O nisi taimi tatou te ta’u ai ia i tatou lava ni mea lē lelei e pei o le, “O le a le lava lava lo’u lelei,” po o le, “O a’u o se vale!” Atonu tatou te manatu o nei faaupuga o ni faasalaga talafeagai pe e tatau ai ina ia faaosofia lelei atili ai i tatou. Peitai, o na faaupuga e mafai ona talepeina i tatou i lalo ma faafaigata ai mea—ma e lē mai le Atua.
Afai e sau se uo lelei ia i tatou ma faasoa mai o latou manaoga ma taumafaiga ina ia lelei atili ae sa ia faasoa mai foi o latou toilalo ma vaivaiga, o le a sa tatou tala o le a fai atu ia i latou? Pe tatou te lē faamalosiauina ea i latou, ta’u atu ia i latou lo tatou mitamita ia i latou, ma patipatia o latou manuia laiti uma?
E tatau ona tatou faia lea mea e tasi ia i tatou lava. Nai lo le faasalaina o i tatou lava, e tatau ona tatou talisapaia mea lelei tatou te faia ma vaai i a tatou mea sese o ni avanoa e avea ai ma ni tagata sili atu ona lelei.
O i tatou o atalii ma afafine o le Atua. Ma e mafai ona tatou taulai atu i lo tatou faasinomaga paia nai lo le faaigoaina o i tatou lava e faavae i o tatou mausa po o faafitauli. Ua ofoina mai e le Tama Faalelagi ia i tatou le tele o avanoa lona lua e pei ona tatou manaomia (tagai Isaia 55:7). E mafai ona tatou taumafai e faalautele mai lea lava mea e tasi ia i tatou lava.
O le Faaola o lo Tatou Malosi’aga
Atonu e faigata i le asō, ae i le āluga o taimi e mafai ona tatou lelei atili atu. Ua folafola mai e le Faaola ia i tatou a tatou faia la tatou vaega, tumau i luga o le ala o feagaiga, ma tumau e oo i le iuga, ua lava Lona alofa tunoa mo i tatou (tagai Eteru 12:27). Tau lava o lo tatou taumafai pea; Ia talitonu pea; ma le onosai “faatalitali i le Alii” (Isaia 40:31). Mo a’u, o se faamautinoaga tele lenei mea. A o tatou galulue i le faaleleia atili o i tatou lava, o le a faamalosia ma taialaina i tatou e le Alii.