“Faaitaha ko ha Kāinga ʻia Kalaisi,” Liahona, Sepitema 2023.
ʻOku Talitali Lelei Kimoutolu ki he Makasini ko ʻEní
Faaitaha ko ha Kāinga ʻia Kalaisi
ʻOku fiemaʻu ʻa e leʻo ʻo e houʻeiki fafiné mo e houʻeiki tangatá fakatouʻosi ke fakahoko ʻa e ngāue ʻa e ʻEikí. Neongo ʻene makehé, ka ʻoku tau fetokoniʻaki, ʻoku tau faaitaha ʻi heʻetau taumuʻa tatau ke hoko ko ha kau ākonga ʻa Kalaisí.
ʻOku ʻikai fiemaʻu ke hanga ʻe hotau ngaahi faikehekehe ʻi he tuʻunga tangata pe fefiné ʻo toʻo ʻetau tokangá mei he taumuʻa ko ʻení. Ka ke fakamālohia fakataha ʻe hotau ngaahi faikehekehé mo hotau ngaahi talēnití mo e ngaahi tokoní ʻa ʻetau ngāue fakamāmani lahi ʻo e fakamoʻuí mo e hakeakiʻí. Naʻe tohi ʻe ʻEletā Kēliti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he makasini ko ʻení ʻo pehē, “ʻoku tau aʻusia ha ngaahi fili lelei ange pea lavameʻa lahi ange ʻi he ngāue ʻa e ʻEikí ʻi heʻetau fakamahuʻingaʻi ʻetau ngaahi tokoní mo e ngāue fakatahá, ko ha kāinga ʻi Heʻene ngāué” (peesi 4). Te tau lava fēfē ʻo maʻu ʻa e faʻahinga uouangataha ko iá? Kuo pau ke tau tui ʻe lava ke ngāue ʻa e ʻEikí mo hotau ngaahi tūkunga makehé ke maʻu ai ha lelei ʻi Hono puleʻangá.
ʻI heʻeku fakamatala ʻi he peesi 8, ʻoku ou vahevahe ai ʻa e meʻa kuó u ako mei he talanoa ʻi he Fuakava Foʻoú ki he fefine Kēnaní, ʻa ia naʻe fekumi ki he Fakamoʻuí ke fakamoʻui hono ʻofefiné. Naʻe ʻikai ke kau ʻa e fefiné ki he fale ʻo ʻIsilelí. Ka naʻá ne tui ʻe lava ʻe he mālohi ʻo e ʻEikí ʻo fakamoʻui ʻene tamá, pea naʻe fakatahaʻi ia ʻe he tui fakaofo ko ʻení mo e kakai ʻo e fuakavá pea hoko ʻa e maná.
Tau vakai muʻa ki he Fakamoʻuí ʻi he meʻa kotoa pē ʻoku tau faí, ʻo “taha [hotau] lotó ʻi he uouangataha mo e feʻofoʻofani.” (Mōsaia 18:21). ʻOku tau monūʻia ke ako mei he ngaahi faikehekehe mālohi ʻo e niʻihi kehé pea fakamahuʻingaʻi kinautolu ʻo hangē ko Kalaisí. ʻOku ou houngaʻia ke maʻu ha Tauhisipi ʻoku fanongo ki he ngaahi leʻo makehe ʻo ʻEne fanga sipí takitaha.
Fakaʻapaʻapa atu,
Palesiteni Camille N. Johnson
Palesiteni Lahi ʻo e Fineʻofá