“Ko hono Tokangaekina ʻo Kinautolu ʻoku Faingataʻaʻiá,” Liahona, Sepitema 2023.
Ngaahi Tefitoʻi Meʻa Mahuʻinga ʻo e Ongoongoleleí
Ko hono Tokangaekina ʻo Kinautolu ʻoku Faingataʻaʻiá
Naʻá Ne Fakamoʻui ha Ngaahi Mahaki Kehekehe, tā fakatātaaʻi ʻe J. Kirk Richards, ʻoua naʻa hiki hano tatau
ʻI heʻetau hoko ko e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku tau muimui ai ki he akonaki ʻa e ʻEikí ke tokangaekina ʻa kinautolu ʻoku faingataʻaʻiá. ʻOku tau tokanga ki he niʻihi kehé ʻaki ʻetau tauhi kiate kinautolu, tokoniʻi kinautolu ke nau moʻui fakafalala pē kiate kinautolu, mo vahevahe ʻa e meʻa ʻoku tau maʻú.
Sīpinga ʻa Sīsū Kalaisí
Naʻe ʻofa, fakafiemālieʻi, mo lotua ʻe Sīsū Kalaisi ʻa kinautolu naʻa nau feohí. Naʻá Ne “faʻa feʻaluʻaki ʻo fai lelei” (Ngāue 10:38 Te tau lava ʻo muimui ki Heʻene sīpingá ʻaki ʻetau ʻofa, fakafiemālieʻi, tokoni, mo lotua ʻa kinautolu ʻoku tau feohí. Te tau lava maʻu pē ʻo kumi ha ngaahi founga ke tokoniʻi ai ʻa e niʻihi kehé.
Ngāue Fakaetauhí
ʻOku fakaʻaongaʻi ʻa e foʻi lea ngāue fakaetauhí ʻi he folofolá pea ʻi he Siasi ʻo e ʻEikí ke fakamatalaʻi ʻa e founga ʻoku tau fetauhiʻaki aí. ʻOku vahe ʻa e kau maʻu lakanga fakataulaʻeikí ko ha kau tangata ngāue fakaetauhi ki he fakafoʻituitui pe fāmili takitaha ʻi he uōtí pe koló. ‘Oku vahe ʻa e kau fafine ngāue fakaetauhí ki he fefine lalahi takitaha. ʻE fakapapauʻi ʻe he kau tangata mo e kau fafine ngāue fakaetauhí ʻoku manatua mo tokangaʻi ʻa e kāingalotu kotoa pē ʻo e Siasí.
Ko Hono Tokoniʻi ʻo e Niʻihi Kehé Ke Mouʻi Fakafalala Pē Kiate Kinautolú
Te tau lava ʻo tokoni ki he kau mēmipa ʻo e fāmilí mo e ngaahi kaungāmeʻá ke nau moʻui fakafalala pē kiate kinautolu ʻaki hono poupouʻi kinautolu ke nau kumi ha ngaahi founga fakaleleiʻi taimi lōloa ʻo ʻenau ngaahi palopalemá. Te tau lava leva ʻo poupouʻi kinautolu ʻi heʻenau ngāueʻi ʻenau ngaahi taumuʻá. Maʻu ha fakamatala lahi ange fekauʻaki mo e moʻui fakafalala pē kiate kitá ʻi he Liahona ʻo ʻAokosi 2023 ʻi he Fakamatala ki he Ngaahi Tefitoʻi Meʻa ʻi he Ongoongoleleí.
Ko hono Tokoniʻi ʻo e Niʻihi Kehé
ʻOku lahi ha ngaahi founga te tau lava ai ʻo tokoni kiate kinautolu ʻoku tau feohí mo tokoni ke feau ʻenau ngaahi fiemaʻu fakatuʻasino, fakalaumālie, mo fakaelotó. ʻE lava ke tokoniʻi kitautolu ʻe he ako fekauʻaki mo e niʻihi kehé ke tau ʻiloʻi ʻa e founga te tau lava ai ʻo tokoniʻi lelei ange kinautolú. Te tau lava foki ʻo lotua ha fakahinohino ke tau ʻiloʻi ʻa e meʻa te tau lava ʻo fai ke tokoni aí.
Ko Hono Vahevahe ʻo e Meʻa ‘Oku Tau Maʻú
Te tau lava ʻo tokoni ki he niʻihi kehé ʻaki hono vahevahe ʻa e meʻa kuo tāpuekina ʻaki kitautolu ʻe he ʻOtuá. Hangē ko ʻení, te tau lava ʻo foaki ha paʻanga ʻaukai feʻunga pe foaki ʻofa ki he paʻanga Tokoni ʻOfa Fakaetangata ʻa e Siasí. Te tau lava foki ʻo ngāue ʻi hotau koló mo hotau ngaahi uiuiʻi faka-Siasí.
Ngaahi Fatongia ʻo e Kau Taki ʻo e Siasí
ʻOku tokangaʻi ʻe he pīsopé hono tokangaekina ʻo kinautolu ʻoku faingataʻaʻia ʻi hono uōtí. Te ne lava ʻo fakaʻaongaʻi ha paʻanga mei he foaki ʻaukaí ke tokoniʻi ʻaki ʻa e kāingalotu ʻoku ʻi ai ʻenau ngaahi fiemaʻú. ʻE tokoniʻi ʻe he kau taki kehé, kau ai hono ongo tokoní mo e kau palesitenisī ʻo e Fineʻofá mo e kōlomu ʻo e kaumātuʻá, ʻa e kāingalotú ke nau maʻu ha ngaahi maʻuʻanga tokoni te nau lava ʻo fakaʻaongaʻi ke feau ʻaki ʻenau ngaahi fiemaʻú.
Ngaahi Ngāue ʻOfa Fakaetangata ʻa e Siasí;
ʻOku tokoniʻi ʻe he Siasí ʻa e kakai ʻi he funga ʻo e māmaní ʻaki ha tokoni fakavavevave, ngaahi ngāue fakakolo, mo ha ngaahi polokalama kehe hangē ko e vai maʻá mo e ngaahi huhu maluʻí. Ke ʻilo lahi angé, vakai ki he Tāleni H. ʻOakesi, “Tokoniʻi ʻo e Masivá mo e Faingataʻaʻiá,” Liahona, Nōvema 2022, 6–8.