Hili ʻa e Faingataʻá: Ko Hono Fakatupulaki ʻo e Loto Vilitakí mo Hono Tali ʻo e Fakamoʻuí

Naʻe fononga fakataha ʻa Samu mo Lusi ʻi ha fononga meʻalele, pea naʻe mohe ʻa e fakaʻuli ʻo e meʻalele naʻá na ʻi aí ʻo sīfā mei he halá. Naʻe tupu heni ha toutou tāfisi ʻenau kaá. Naʻe ʻikai lavea lahi ʻa Samu pea hangē naʻe ʻikai ke ne fuʻu tokanga ki he meʻa naʻe hokó. Naʻá ne ʻi ai ke fakafiemālieʻi ʻa Lusi, he naʻe pau ke simaʻi hono uma naʻe fasí.

Hili ha ngaahi uike siʻi mei ai, ʻi he toe hoko mai ha faingamālie ke fononga meʻalele ai ʻa Samú, naʻá ne ongoʻi hohaʻa ʻi heʻene fakakaukau atu ki he ngaahi houa lōloa ʻi he halá.

Naʻe foua ʻe Samu ʻa e uesia fakaeongo naʻe tupu mei ha aʻusia faingataʻa. Naʻá ne momou ke talanoa ki ha taha fekauʻaki mo ia. Ka ʻi heʻene talanoa mo Lusí, naʻá ne ʻilo ai naʻe kau ʻa Lusi ʻi ha fakatuʻutāmaki ʻi ha meʻalele kimuʻa peá ne ʻiloʻi ʻa e ongo naʻe maʻu ʻe Samú. Naʻá na aleaʻi ʻa e meʻa naʻe ako ʻe Lusi mei he meʻa naʻá ne aʻusia kimuʻa ʻi heʻene ngāue ʻaki ʻene tui kia Sīsū Kalaisí, lotua ha fakahinohino, mo tokonia ʻe he faifaleʻí ʻi he taimi naʻá ne faingataʻaʻia aí.

ʻĪmisi

ʻīmisi ʻuliʻuli mo hinehina ʻo ha kiʻi fuʻu ʻakau siʻisiʻi mo ha foʻi siakale lanu mata

ʻAmanaki Lelei mo e Fakamoʻui ʻo fakafou ʻia Sīsū Kalaisí

Neongo pe ko e hā hotau faingataʻaʻiá, ʻe lava ke fakafou mai ʻa e fakamoʻuí ʻi he Fakamoʻui ko Sīsū Kalaisí. Koeʻuhí ko e Fakalelei taʻefakangatangata, manavaʻofa mo e ʻaloʻofa ʻa e Fakamoʻuí, te Ne lava ʻo fakamoʻui ʻa e ngaahi kafo kotoa pē ʻoku hoko ʻi he moʻui fakamatelié ni, neongo pe ʻoku hoko ʻa e fakamoʻui ko iá ʻi he moʻuí ni pe moʻui ka hokó. ʻOku ʻi ai ʻa e taimi ʻe niʻihi ʻoku fuoloa ange ia ʻi he meʻa ʻoku tau ʻamanaki pe fiemaʻu maʻatautolú—ʻo aʻu ki he tokoni fakalangi ʻa e Fakamoʻuí. Ka te Ne lava ʻo fakamoʻui kitautolu (vakai, 3 Nīfai 17:7).

Naʻe akonaki ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē: “ʻOku mooni e maama ʻa e ʻOtuá. ʻOku lava ke maʻu ia ʻe he taha kotoa pē! ʻOkú Ne foaki e moʻuí ki he meʻa kotoa pē. ʻOkú Ne maʻu e mālohi ke fakanonga e mamahi mei he kafo loloto tahá.”¹

ʻOku ʻikai ha taha te ne ʻilo ʻa e lahi hotau faingataʻaʻiá ʻo hangē ko e Tamai Hēvaní mo e Fakamoʻuí. “[ʻOku] hāʻele hifo [ʻa e ʻEikí] ki lalo ʻi he ngaahi meʻa kotoa pē, ʻa ia ʻokú ne ʻafioʻi ai ʻa e ngaahi meʻa kotoa pē, koeʻuhí ke ne ʻi he meʻa kotoa pē pea nofoʻia ʻi he meʻa kotoa pē” (Tokāteline mo e Ngaahi Fuakava 88:6). Naʻe akoʻi ʻe Sisitā ʻEimi A. Laiti, Tokoni ʻUluaki ʻi he Kau Palesitenisī Lahi ʻo e Palaimelí:

“ʻOku tau maʻu kotoa ha meʻa ʻi heʻetau moʻuí kuo maumau pea ʻoku fiemaʻu ia ke monomono, fakaleleiʻi, pe fakamoʻui. ʻI heʻetau tafoki ki he Fakamoʻuí, pea tuku hotau lotó mo e ʻatamaí kiate Iá, ʻi heʻetau fakatomalá, ʻokú Ne hāʻele mai ki he feituʻu ʻoku tau ʻi aí ‘mo e fakamoʻuí ʻi hono kapakaú’ [2 Nīfai 25:13], ʻo Ne fāʻofua mai kiate kitautolu, peá Ne folofola mai, ‘ʻOku lelei pē. … Te ta lava fakataha ʻo fakaleleiʻi ʻa e meʻá ni!’

ʻOku ou fakamoʻoni atu ʻoku ʻikai ha meʻa ia ʻi hoʻo moʻuí ʻe maumau ʻo laka ange ʻi he mālohi fai fakamoʻui, huhuʻi, mo e mālohi fakaivia ʻo Sīsū Kalaisí.”²

ʻOku maʻu ʻi he folofolá ha ngaahi sīpinga ʻo e faifakamoʻuí mo e ngaahi founga ke fakamoʻui aí—pea ʻi he moʻui ʻa hotau ngaahi fāmilí, kaungāmeʻá, mo e ngaahi kuí. Ko e hā ha ngaahi founga naʻe taʻeueʻia ai hoʻo ngaahi kuí?³

ʻI he taʻu 13 ʻa Hulioó, naʻe ngaohikovia fakasekisuale ia ʻe heʻene faʻētangatá. ʻI he fakalau ʻa e taimí, naʻe kamata ke ne fakamamaʻo mei hono fāmilí ʻo nofonofo tokotaha holo pē . Naʻe ngāue ʻi ha taimi ʻe niʻihi ʻo hangē naʻe ʻikai ha meʻa naʻe hokó, ka naʻá ne maʻu ʻi ha ngaahi taimi ʻe niʻihi ha ngaahi ongo kehekehe. Kuó ne lava maʻu pē ʻo mapuleʻi ʻene moʻuí—naʻa mo e ngaahi taimi ʻokú ne ongoʻi fuʻu fiefia aí, ʻo hangē ko hono fanauʻi mai hono fohá. ʻOkú ne toe ongoʻi lotomamahi foki. Ko e fakaofi eni hono fohá ki he taʻu motuʻa naʻe ngaohikovia ai ʻa Hulioó, pea ʻi he fakakaukau ʻa Huliō ki he ngaahi meʻa ʻe lava ke aʻusia ʻe hono fohá, ʻokú ne fefaʻuhi mo ha ngaahi fakakaukau mo ha ngaahi ongo fekauʻaki mo hono mahuʻinga fakataautahá mo hono tuʻunga taʻengatá.

Neongo ʻoku hoko ʻa e faingataʻaʻiá ko ha konga ʻo ʻetau moʻui fakamatelié, ka ʻoku ʻikai ko hotau tuʻunga taʻengatá ia. Ko hotau tuʻunga taʻengatá ʻa ʻetau hoko ko e fānau ʻa e ʻOtuá. Naʻe akonaki ʻa Palesiteni Lāsolo M. Nalesoni ʻo pehē:

“Ko hai koe?

ʻUluaki mo mahuʻinga tahá, ko ha fānau koe ʻa e ʻOtuá.

Uá, ʻi hoʻo hoko ko ha mēmipa ʻo e Siasí ko e fānau koe ʻo e fuakavá. Pea tolú, ko ha ākonga koe ʻa Sīsū Kalaisi.”⁴

ʻIkai ngata aí, ʻoku ʻikai hoko ʻa e faingataʻá ko ha ʻata ʻo hotau mahuʻingá pe moʻui tāú. Naʻe fakamahinoʻi ʻe Sisitā Soi D. Sōnasi, Palesiteni Lahi mālōlō ʻo e Palaimelí, ʻa e ongo fakakaukau ʻe ua ko ʻení ʻi heʻene akoʻi:

“ʻOku ʻuhinga ʻa e mahuʻinga fakalaumālié ki heʻetau fakamahuʻingaʻi kitautolu ʻi he founga ʻoku fakamahuʻingaʻi ʻaki ʻe he Tamai Hēvaní kitautolú. …

… ʻOku maʻu hotau tuʻunga tāú ʻi he talangofuá. Kapau te tau faiangahala, ʻoku tau taʻetaau, ka ʻoku ʻikai ʻaupito ke tau taʻe-mahuʻinga.”⁵

Naʻe ʻikai liliu ʻe he ngaohikovia naʻe kātekina ʻe Huliō ʻi he nima ʻo ʻene faʻētangatá ʻa e mahuʻinga mo e moʻui taau ʻa Hulioó. Naʻe ʻikai ke ne teitei faiangahala ka naʻe fakaangahalaʻi ia ʻe ha tokotaha kehe . ʻE faingataʻa ʻi he taimi ʻe niʻihi ke ke manatuʻi ho mahuʻingá mo e moʻui tāú ʻi he taimi kuo ngaohikovia ai koé. Manatuʻi, naʻe ʻikai ke ke faiangahala, kuo teʻeki ai holo ho mahuʻingá, pea ʻokú ke taau ke hokohoko atu ʻi he hala ʻo e fuakavá.

ʻI he kamata ke falala ʻa Huliō ki he ʻEikí, naʻá Ne tokoniʻi ʻa Huliō ke ne ʻiloʻi ʻoku ʻikai liliu ʻe he ngaahi aʻusia fakamatelié ʻa e ʻofa ʻa ʻetau Tamai Hēvaní kiate kitautolú. ʻOkú ne ako ʻi he taimí ni ke ʻiloʻi, naʻa mo e ngaahi meʻa fakamamahi naʻe hokó, naʻe ʻikai ke nau liliu hono mahuʻingá, tuʻunga taʻengatá, pe ko ʻene moʻui tāú.

ʻE tokoni hono fakatupulaki ʻo e moʻui fakafalala fakaeloto pē kiate kitá ke fakaʻaongaʻi ha ngaahi maʻuʻanga tokoni fakafoʻituitui lelei ke matuʻuaki ʻaki ʻa e ngaahi polé mo e ngaahi ongo faingataʻá. Te ke lava ʻo fakatupulaki ʻa e loto-vilitakí, ʻa e malava ko ia ke liliu mo mapuleʻi ʻa e ngaahi ʻahiʻahí—kau ai ʻa e faingataʻaʻiá.

ʻOku kau ʻi he loto-vilitakí ʻa e fekumi ki he poupou mo e fakahinohino mei he Tamai Hēvaní mo Sīsū Kalaisí, tokoniʻi ʻa e niʻihi kehé, mo hono tokoniʻi koe ʻe he niʻihi kehé ʻo ka fiemaʻu pea ʻi ha founga taau.

ʻE tokoni atu ʻa e ngaahi ngāue ko ʻení, naʻe fokotuʻu mai ʻe ha kau faifaleʻi fakapalōfesinale, ke ke fakatupulaki ʻa e loto-vilitakí:

1. Fakatupulaki ho vā fetuʻutaki mo e niʻihi kehé

2. Fakatupulaki ʻa e tuʻunga lelei fakatuʻasinó

3. Kumi hoʻo taumuʻa ʻi he moʻuí

4. Fakatupulaki ha ngaahi fakakaukau ʻoku moʻui leleí

5. Kumi tokoni ʻi he taimi ʻokú ke fiemaʻu aí⁶

ʻĪmisi

ʻīmisi lanu ʻuliʻuli mo hinehina ʻo ha ongo fafine mo ha foʻi tapafā lōloa lanu mata

1. Fakafehokotaki mo e Niʻihi Kehé

ʻOku faʻa tokoni ʻa e vā fetuʻutaki leleí ki he faifakamoʻuí. ʻI hoʻo fetuʻutaki mo kinautolu ʻoku nau fakamālohia mo poupouʻi koe ke ke tafoki ki he Fakamoʻuí mo ʻetau Tamai Hēvaní, te ne ala fakahoko ʻa e meʻa makehe ʻokú ke fiemaʻu ke kakato ange ho fakamoʻuí.

Naʻe fetuʻutaki ʻa Samu kia Lusi, ʻo vahevahe ʻene manavasiʻí mo e ongoʻi taʻefiemālié. Naʻe tokoniʻi ia ʻe he vā fetuʻutaki ko ʻení ke ne toe tokanga mo loto-vilitaki ange. Naʻá ne tokoniʻi ia ke ne ʻilo ha ngaahi founga ʻe lava ke fakaakeake fakaeloto mo fakalaumālie ai.

Fakakaukau ke fokotuʻu ha ngaahi taumuʻa ke fakatupulaki ha fehokotaki mālohi ange mo e niʻihi kehe ʻokú ke falala ki aí. Ko e ngāue fakaetauhí ko ha founga ia ʻe taha ʻoku tau fetuʻutaki ai mo e niʻihi kehe ʻi he Siasí.