“Te ke Fie ʻIlo Lahi Ange?,” Liahona, Sepitema 2023.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Te ke Fie ʻIlo Lahi Ange?
Naʻe makehe ha taha ʻo ʻeku kau nofo tēnití mei he kau sōtia kehé, ko ia naʻá ku fehuʻi ange pe ko e hā hono ʻuhingá.
Ko hono papitaiso ʻo e tokotaha faʻu tohi, fai ʻe Thomas Salisbury ʻi Sông Bé Lake, Vietnam.
Laʻitā naʻe maʻu ʻi he angalelei ʻa e tokotaha faʻu tohí
Naʻá ku kau ki he Kau Tau ʻa e ʻIunaiteti Siteití ʻi ha lōloa ko e taʻu ʻe tolu peá u tūʻuta ki Vietinami Saute ʻi hoku taʻu 20. Hili ha māhina ʻe valu, naʻe vahe au ki ha ʻiuniti ʻi he tokelau-hihifo ʻo Saikoní. Lolotonga ʻeku ʻi aí, naʻá ku fakatokangaʻi vave naʻe makehe ha taha ʻo ʻeku kau nofo teniti ko Tōmasi Salisipelí mei he taha kotoa.
Naʻá ne fuʻu makehe ʻaupito pea faifai peá u fehuʻi ange, “Tomu, ko e hā ʻokú ke fuʻu makehe ai mei he toengá ?”
Naʻá ne tali mai, “Koeʻuhí ko ha mēmipa au ʻo e Siasí.”
“Ko e hā ʻa e Siasi ko iá?” Ko ʻeku fehuʻí ange ia.
Naʻá ne fokotuʻutuʻu ke u talanoa mo ia pea mo Hāloti Luisi, ko ha taha ʻosi ngāue fakafaifekau naʻe hoko ko ha tokoni ki he faifekau fakakautau ʻa e ʻiunití. Lolotonga ʻemau fuofua fakataha ʻi ha tēniti naʻe hoko ko ha kiʻi falelotu siʻisiʻí, naʻá ku loto fiemālie kapau te u tui moʻoni ki he meʻa ʻokú na talamai kiate aú, te u papitaiso. Naʻá ku maʻu foki mo ha tatau ʻo e Tohi ʻa Molomoná, ʻa ia naʻá ku faʻo ʻi he kato siʻisiʻi taha ʻo hoku talausesé pea lau ia ʻi he taimi kotoa pē naʻá ku faingataʻaʻia ai.
Naʻe hoko atu ai ha ngaahi fealēleaʻaki lahi, peá u ʻiloʻi naʻe tali ʻe he lēsoni takitaha ʻa e ngaahi fehuʻi naʻá ku maʻu ʻi heʻeku fekumi ki he moʻoní. Ka ʻi he fehuʻi mai ʻe Tomu mo Hāloti pe ʻoku ou fie papitaisó, naʻá ku talaange ʻikai. Naʻe ʻikai ke u ʻilo pe te u lava fēfē ʻo tauhi kotoa ʻa e ngaahi fekau kuó na akoʻi maí.
Hili haʻaku kau atu ki ha konifelenisi fakavahefonua ʻi Saikoni, naʻá ku ʻalu ki ʻAositelēlia ʻi ha uike ʻe taha ʻo mālōlō. Lolotonga ʻeku ʻi aí, naʻe kamata ke u fakatokangaʻi ʻa e mahuʻinga ʻo e ngaahi akonaki ʻo e ongoongoleleí kiate aú. ʻI heʻeku foki ki Vietinemí, naʻá ku fakahā leva kia Tomu ʻoku ou fakaʻamu ke u papitaiso.
Hili ha taimi nounou mei ai, naʻe papitaiso au ʻe Tomu ʻi he anovai Songi Peé, naʻe fakamaʻu au ʻe Hāloti ko ha mēmipa ʻo e Siasí, pea fakanofo au ko ha tīkoni ʻe he kulupulita ʻo e Siasí ko Tīmote Hili.
ʻI heʻeku foki ki ʻapi ki he ʻIunaiteti Siteití hili ha uike ʻe ono mei ai, naʻá ku fakafeʻiloaki ʻa e ongoongoleleí ki hoku kaumeʻa fefiné, ʻa ia naʻe hoko ko hoku uaifí. Naʻá ne tali foki mo e pōpoaki ʻamanaki leleiʻanga ʻo e ongoongoleleí.
Te u houngaʻia maʻu pē ʻi hono ʻeke mai ʻe Tomu pe ʻoku ou fie ʻilo lahi angé. Naʻe tali ʻe heʻene sīpingá mo ʻene fakaafé ʻeku fakaʻānaua fuoloa ke ʻilo ʻa e moʻoní mo fiefia ʻi he ngaahi tāpuaki ʻo e ongoongoleleí.