Fakakomipiuta Pē: Kakai Lalahi Kei Talavoú
Ko e Meʻa Naʻe ʻIkai Mahino Kiate Au fekauʻaki mo e Fakamoʻuí
ʻI he fuoloa ange ʻeku puké ʻi he meʻa naʻá ku ʻamanaki ki aí, naʻá ku ako ai ʻoku ʻikai fiemaʻu ia ke u fehangahangai toko taha pē mo e ngaahi faingataʻá.
ʻI he taimi naʻe tō ai ʻa e mahaki fakaʻauhá ʻi he 2020, naʻá ku kau ʻi he fuofua kakai naʻe puke ʻi he COVID-19 ʻi hoku feituʻú ʻi Sikotilaní. Naʻá ku ʻuluaki fakakaukau ko ha kiʻi momoko siʻisiʻi pē. Ka ʻi he fakalau atu ʻa e taimí, naʻe fakaʻau ke toe kovi ange ʻeku tuʻunga moʻui leleí, pea aʻu pē ki he faingataʻaʻia ʻa e mānavá. Naʻe lahi ʻa e maumau ki hoku mongá mo e halanga mānavá, pea naʻá ku faingataʻaʻia ʻi he faʻa tāvaivaiá.
Naʻe laka hake ʻi he taʻu ʻe taha mo e kongá ʻa e fakaakeaké, pea naʻe ʻikai ke u lava ʻo kau ki ha faʻahinga sipoti pe ʻekitivitī fakatuʻasino lolotonga ʻa e taimi ko iá. Naʻe pau ke u kiʻi taʻofi ʻa e meʻa kotoa pē. Naʻe aʻu ʻo u mavahe mei he ʻunivēsití ʻi ha taʻu ʻe taha, pea naʻá ku fuʻu loto-mamahi ʻaupito—loto-mamahi ʻi hoku ngaahi tūkungá pea ʻita ki he Tamai Hēvaní ʻi he taimi naʻe hangē he ʻikai lava ke u toe saí.
ʻOku Tau Mālohi Ange ʻi heʻetau kau fakataha mo Sīsū Kalaisí
Neongo ʻeku faʻahinga fakakaukau peheé, ka naʻe hokohoko atu pē ʻeku moʻui ʻaki ʻa e ongoongoleleí. Naʻe hokohoko atu ʻeku ʻalu ki he lotú mo fai ʻa e meʻa naʻá ku lavá ke tokoni mo tokoniʻi ʻa e niʻihi kehé. Naʻe māmālie pē ʻa e kamata ke fakalakalaka ange ʻa e tūkunga naʻe ʻi ai ʻeku fakakaukaú.
ʻI he taimi naʻe kamata ke mole atu ai ʻa e ngaahi fakaʻilonga naʻe fuʻu kovi tahá, naʻá ku maʻu ha uiuiʻi taʻe-ʻamanekina ke ngāue ʻi he fakataha alēlea māʻolunga ʻi hoku siteikí. Neongo ʻeku tailiilí, ka naʻá ku tali ʻa e uiuiʻí mo ha ʻamanaki lelei ʻe ʻomi ʻe he ʻEikí ha founga ke u fua ai hoku fatongiá neongo naʻe ʻikai sai ʻeku tuʻunga moʻui leleí (vakai, 1 Nīfai 3:7).
Ko e taha ʻo e ngaahi fuofua ngāue naʻe vahe mai ke u faí ko e malanga kau ki he Fakamoʻuí mo ʻEne Fakaleleí. ʻI he lea kotoa pē naʻá ku fai kau ki he kau muimui kehe ʻo Sīsū Kalaisí, naʻe tupulaki ʻa e mahino naʻá ku maʻu kau kiate Iá mo e meʻa naʻá Ne fakahoko maʻakú. Naʻá ku fakatokangaʻi naʻá ku tukunoaʻi ha konga mahuʻinga ʻo ʻEne Fakaleleí—naʻe mamahi mo pekia ʻa e ʻEikí ʻo ʻikai ngata pē ki heʻetau ngaahi angahalá ka ki hotau ngaahi faingataʻaʻiá. ʻOkú Ne ʻafioʻi ʻa e founga ke langaki hake ai kitautolu ʻi hotau ngaahi ʻahiʻahí (vakai, ʻAlamā 7:12).
Naʻe akonaki kimuí ni ʻa Palesiteni Kamila N. Sionisoni, ko e Palesiteni Lahi ʻo e Fineʻofá, ʻo pehē:
“ʻE lava ke fakamaʻamaʻa ʻe Sīsū Kalaisi ʻetau kavengá.
“ʻE lava ke toʻo ʻe Sīsū Kalaisi hotau ngaahi mafasiá.
“ʻOku ʻomi ʻe Sīsū Kalaisi ha founga ke tau tauʻatāina ai mei he mafatukituki ʻo e angahalá.
“Ko Sīsū Kalaisi hotau fakafiemālié. …
“… He ʻikai ke u lava ʻo fakahoko toko taha ia, pea ʻoku ʻikai fiemaʻu ia ke u fakahoko toko taha, pea he ʻikai ke u fai ia. ʻI heʻeku fili ke haʻisia ki hoku Fakamoʻui ko Sīsū Kalaisí, ʻo fakafou ʻi he ngaahi fuakava kuó u fai mo e ʻOtuá, ʻʻoku ou faʻa fai ʻa e ngaahi meʻa kotoa pē ʻia Kalaisi ʻokú ne [fakamālohia] aú.ʼ[Filipai 4:13].”1
ʻOku ou fakahehema foki ke fakafalala pē ki hoku iví, pea ʻi heʻeku hīkisiá naʻá ku pehē te u lava ʻo ikunaʻi toko taha pē hoku ʻahiʻahí. Ka naʻá ku ʻiloʻi naʻe ʻikai ke u taʻe-malava koeʻuhí he naʻe fuʻu faingataʻa ʻa e ʻahiʻahí; ka koeʻuhí naʻe ʻikai ke u fakangofua ʻa Sīsū Kalaisi ke Ne foaki mai Hono mālohí mo e poupoú.
Naʻe faifai pea liliu ʻe he mahino ʻokú Ne foaki mai kiate au ʻo fakafou ʻi Hono mālohi faifakamoʻuí ʻa e meʻa kotoa pē. Neongo he ʻikai faingofua pe vave ʻeku fononga ki he fakaakeaké, ka naʻe lava ke u maʻu ha nonga, fiefia, mo ha mālohi ʻi heʻeku tafoki kiate Iá.
Ko Hono Fakaloloto ʻEtau Fetuʻutaki mo Kalaisí
ʻOku ʻikai fiemaʻu ia ke tau fehangahangai toko taha pē mo ha faʻahinga ʻahiʻahi. Te tau lava ʻo falala ki hotau Fakamoʻuí ke maʻu ha mālohi. Naʻá ku ʻiloʻi ko e faingataʻa fakalaumālie naʻá ku ongoʻi lolotonga ʻeku puké naʻe tupu ia mei he ʻikai ke u maʻu ha mahino ki hoku vā fetuʻutaki mo e Tamai Hēvaní mo Sīsū Kalaisí pea mo e ivi te Na lava ke ʻomi kiate au ʻi he hokohoko atu ʻeku tokoní, fekumi, mo muimui kiate Kinauá.
Naʻe ʻomi ʻe Palesiteni Tāleni H. ʻOakesi, ko e Tokoni ʻUluaki ʻi he Kau Palesitenisī ʻUluakí, ha fakamanatu mālohi ʻo ʻetau fetuʻutaki mo e Fakamoʻuí ʻi heʻene pehē: “[ʻOkú] Ne ʻafioʻi … ʻetau fāifeingá, hotau loto-mamahí, hotau ngaahi ʻahiʻahí, pea mo ʻetau faingataʻaʻiá, he naʻá Ne foua loto-fiemālie kinautolu kotoa, ko ha konga mahuʻinga ʻo ʻEne Fakaleleí. Pea tuʻunga heni, hono fakaivia Ia ʻe Heʻene Fakaleleí ke ne tokoniʻi kitautolu—ke foaki mai ʻa e ivi ke tau lava ʻo fuesia iá.”2
Meʻamālié, naʻe poupouʻi au ʻe he ʻEikí ke u toe mālohi ange ʻi he feinga ke maʻu ha mahino kiate Iá. Pea ʻi he mahino lelei ange kiate au Iá, kuó u lava ʻo vakai lahi ange ki Hono toʻukupú ʻi heʻeku moʻuí mo mamata ki he ngaahi mana ʻo e fakamoʻuí, neongo kapau naʻe fuoloa ange ia ʻi he meʻa naʻá ku ʻamanaki ki aí. Hangē foki ko e akonaki ʻa Palesiteni Sionisoní, “ʻOku tāpuekina ʻa e kau tauhi fuakavá ʻaki ʻa e fakafiemālie ʻa e Fakamoʻuí.”3
Kuo hoko hono fakatupulaki ʻa e mahino ʻoku ou maʻu ki he Fakamoʻuí mo hono tauhi ʻeku ngaahi fuakavá ko ha tāpuaki lahi ʻi heʻeku moʻuí. Kuó Ne foaki mai ha tokoni fakalaumālie mo fakatuʻasino lahi fau mei hoku ngaahi faingataʻaʻiá. Te u lava ʻo palōmesi atu ʻi hoʻo feinga ke fai ʻa e meʻa tataú, ʻe mahino ʻa e ʻofa ʻa e ʻEikí mo hoʻo taumuʻa fakalangí. Te ke maʻu ha mālohi ʻoku mahulu ange ʻi ho iví—ʻo hangē ko ia ʻoku ou maʻú.