Itulau i le Lotoifale
Faamanatuina o Lo Tatou Faaola i le Taimi o le Kerisimasi
E pei ona tautino mai e se pese lauiloa, o le Kerisimasi o “le taimi sili lea ona matagofie o le tausaga!”1 Ae o nisi taimi, i le lotolotoi o le faanatinati i le faatauina o meaalofa, fuafuaga o patī, ma le teuteuina o fale, e faigofie lava ona galo ai le mafuaaga moni mo le vaitau. I tala o i lalo, ua faasoa mai ai e tagata o Le Ekalesia a Iesu Keriso o le Au Paia o Aso e Gata Ai ni tu ma aga masani faaleaiga ma ni manatuaga faapitoa na fesoasoani e faatumauina ai lo tatou Faaola i le totonugalemu o a latou faamanatuga o le Kerisimasi.
Mai ia Sister Phyllis Marshall
Uarota a Massey Park, Siteki a Aukilani Papatoetoe
I le avea ai ma se tina talavou, sa amata ona ou nofouta i le ala ua pei ai le Kerisimasi ma tulaga faapisinisi i tausaga taitasi. Sa ou fiafia i teuteuga ma musika na taina i faleoloa ma i luga o leitio, ae sa latou uunaia ni manatu maaleale o mea e tatau ona tatou faatauina, ma foliga o o tatou fale ma a tatou meaai e tatau ona fai. Sa le’i faatatau i le soifua mai o lo tatou Faaola, o le mafuaaga moni mo le vaitau. O lea la, i se tasi tausaga sa ma fuafua ai ma lo’u toalua o Simi e faataitai se mea. I le taeao o le Kerisimasi, sa feala a’e le fanau i le na o le tolu meaalofa i lalo o le laau ma se faamanatu o le auala na maua ai e lo tatou Faaola le na o le tolu meaalofa mai le Au Makoi. I tausaga na sosoo ai, sa ma taumafai isi auala e faatumauina ai taulaiga o le Kerisimasi ia Iesu Keriso. E aofia ai le foai faalilolilo, lea e matou te tuuina ai se pusa o meaalofa ma meaai i se aiga e le tagolima, e tu’itu’i ona tamomoe lea ma lalafi. Sa ma amataliaina foi ni faigalotu i le taeao o le Kerisimasi e faatumulia i pesepesega ma le tatalo ma se faitauga faaaloalo o tala faatusi paia o le soifua mai o lo tatou Faaola. O nisi o nei gaoioiga ua avea ma tu ma aga masani tumau, ma ua faia ai se eseesega i le ala matou te fiafia ma faamanatu ai le Kerisimasi, o se aiga.
Mai ia Bree-Ell Rangi
Uarota a Alfriston, Siteki a Aukilani Manurewa
O se tu masani a matou ma lo’u aiga pe a matou faamanatuina le Kerisimasi o le, pe a oo i le Kerisimasi, matou te feala mai i luga ma faitau le tala o le soifua mai o le Faaola. Matou te talatalanoa i le taua o Ia ia i tatou, o ositaulaga na Ia faia ma faamanuiaga ua Ia tuuina mai ia i tatou.
I lo’u olaga atoa i le Peraimeri ma le Autalavou, ou teufatuina i taimi uma manatuaga o le Kerisimasi o taimi taua ma lo’u aiga ma le aiga lautele. O se tasi o manatuaga e sili ona ou faapelepele i ai o le taimi na tofu ai matou ma o’u tei ma se meaalofa mai lo’u tinamatua. Sa ia afifiina matua lelei atoatoa le meaalofa, ma ina ua ou tatalaina, sa ou te’i e vaai i se tusi. Sa le na o se tusi masani, ae O Le Tusi Mamona. I lena taimi out e le’i malamalama atoatoa i le taua o lenei meaalofa. O se taimi mulimuli ane, a o ou tuputupu ae, na ou iloa ai le suamalie o i ai i lenei meaalofa. O lenei manatuaga e uiga i lo’u tinamatua e le’i mouese lava. E oo lava i le laitiiti, sa ia faatulagaina le talalelei i lo’u olaga. O lana faataitaiga ma lona alofa mo le Faaola na faamalosia ai lo’u faatuatua ma la’u molimau.
Ou te iloa o loo soifua lo’u Tama, o Iesu o le Keriso, ma ua avanoa le tuugamau. Ou te molimau atu afai e te mauaina Lona alofa i taimi o le vaivai, o le a Ia tuuina atu ia te oe le malosi . . . po o le a lava le faigata o le a oo mai. Ou te tuuina atu ai lenei mea ia te outou i le suafa o Iesu Keriso, amene.