Очих газартаа аюулгүй удирдуулж хүрсэн

Энэ жил Мормоны Номыг судлахдаа бид Лихай гэр бүлийнхэнтэйгээ амлагдсан нутаг руу аялсан тухай уншсан. Лихайн гэр бүл аян замын туршид юу үзэж туулсныг бод.

• Бошиглогчдыг дагаж, тэдэнд итгэснийх нь төлөө тэднийг шоолон доромжилж байсан.

• Гэр бүлийн тав тухаа өмнө нь огт очиж үзээгүй аглаг буйд дахь амьдралаар сольсон.

• Хэр хол явах, хаана хүрэх, хэр удаан явах нь тодорхойгүй байдлаар аялсан.

• Өлсгөлөн, гуниг зовлон, өвчин, үхэл тохиолдсон.

• Заримдаа шалтгааныг нь ойлгохгүй эсвэл хэрхэн гүйцэтгэхээ мэдэхгүй хүнд хэцүү даалгаврыг биелүүлж байсан.

• Бүтэлгүйтэл, саад, үл ойлголцол, урам хугарал тохиолдож байсан.

• Залуу гэр бүлүүдийг авч явахад хүндрэлтэй нөхцөл байдал учирч байсан.

Аяллын үеэр Их Эзэн тэдэнд хэрхэн тогтмол тусалж байсныг бид харсан. Тэрээр

• бошиглолын удирдлага, хувийн илчлэлт,

• амлагдсан адислал болон гэрээнүүдийг агуулсан судрууд,

• угийн бичиг, гэр бүлийн түүх,

• хэрэгцээг нь хангах шинэ багаж, арга барил,

• зовлон бэрхшээлийг тэсэн гарах чадвар,

• сайн мэдэхгүй үүргээ гүйцэлдүүлэх мэргэн ухаан, зааварчилгаа,

• Лиахона (тэдний аяллыг чиглүүлэхэд туслах багаж) болон

• гэр бүлийг нь аюулгүй байдал, хамгаалалтаар хангасан.

Лихайн гэр бүлийн адил бидний аялал бэрхшээл, золиослолыг шаардах болно. Аврагч мөн бидэнд гайхамшигтай арга замуудаар байнга туслах болно. Нифай “зөв зам нь Христэд итгэх … өөрсдийн бүхий л хүчин чадал, оюун мөн чадлаараа, мөн өөрийн бүхэл бодгалиар бишрэн шүтэх” (2 Нифай 25:29) талаар заасан. Бид Есүс Христэд итгэх, Түүний үгийг даруухнаар хүлээн авах, үйлдэхдээ зоригтой байхыг сонговол тулгарах зовлон бэрхшээл дунд баяр баясгалан, адислалыг олох болно. Аян замдаа бид Их Эзэний биднээр хийлгэхийг хүсэж буй зүйлсийг гүйцэлдүүлж чадна гэсэн итгэлтэй байх болно (1 Нифай 3:7-г үзнэ үү).

Аврагч бидэнд үргэлжлүүлэн тусалсаар байдаг олон арга замын заримаас дурдвал:

Зураг

Есүс Христийн хөрөг

Үүр цайж, гэрэл цацарсан өдөр эхэллээ, Саймон Дюүи

Тэр бидэнд сургаалаа өгдөг

Есүс Христ “эхлэлээс төгсгөл хүртэл мэднэ” (Абрахам 2:8). Тэр түүнчлэн “замыг тавьж, зааж чиглүүлнэ.”¹ Христийн сургаал хэмээн танигдсан, судрууд дахь Түүний сургаал бол аврагдаж, хамгаалагдахын тулд бид бүгдийн дагах ёстой зам юм.

Бид Есүс Христэд итгэх итгэлээ тасралтгүй хэрэгжүүлж, тогтмол наманчилж, баптисм хүртэж, Ариун Сүнсний бэлэг хүлээн авч, гэрээнд орж, тэсэж тэвчихийн тулд хамгийн сайнаараа хичээх ёстой. Хариуд нь бидэнд өршөөл, итгэл найдвар, мөнх амьдралыг амласан. (2 Нифай 31:2–20-ийг үзнэ үү.)

Салаа зам, хоорондоо харшлах үзэл бодлын ертөнцөд Христийн сургаал биднийг зөв зам руу чиглүүлж; тодорхой, явах боломжтой зүг чигээр хангадаг (2 Нифай 31:21-ийг үзнэ үү).

Зураг

Ахлагч Тай уулын орой дээр зогсож байгаа нь

Гэрэл зургийг зохиогчийн зөвшөөрлөөр нийтлэв.

Урагшлах итгэл

Олон жилийн тэртээ би цастай ууланд төөрч, даарч, ганцаардан, цөхрөнгөө барж билээ. Өөр юу хийхээ мэдэхгүй байсан тул би шинэхэн орсон цасан дээр өвдөглөн, Тэнгэрлэг Эцэгт хандан тусламж хүсэн залбирав. Би Түүнтэй зовж, айж байгаа зүйлсээ хуваалцан, хэн нэгэн намайг олж, аврахын төлөө гуйлаа.

Намайг залбираад босох үед миний эргэн тойрон цасаар хучигдаж, моддыг үзэсгэлэнтэй нам гүм байдал нөмрөн авсан байв. Энэ нам гүм байдал ойролцоох бутны шаржигнах чимээгээр сарнив. Надаас насаар ах хоёр хүү гарч ирлээ. Тэд аль хэдийн уулын оройд гарчхаад, замаар явахын оронд уулнаас гулгаж буухаар шийдсэн нь тэр аж. Өөр олон газар байсаар атал тэд гулгасаар миний байсан газар хүрч ирсэн гээд бод доо!

Тэднийг надаас юу хийж байсныг минь асуух үед би тэдэнд төөрснөө хэлэв. Тэд намайг өөрсөдтэй нь хамт явахыг урин, бид уулын бэл дэх жим рүү аюулгүй гулган буув. Эцэст нь бид үлдсэн хүүхдүүдтэй дахин нийлсэн юм.

Бид өөрсдийн хувийн аялалд итгэл, бэлэн байдал, тэвчээртэй урагшлах үедээ Аврагчийг бидэнтэй хамт хэрхэн алхаж, бидэнд хэрхэн идэвхийлэн тусалдаг болохыг олж хардаг байгаасай. Есүс Христ бол зам, үнэн, амь мөн. Түүнд итгэх бидний итгэл оюунд маань амар амгалан, аялалд маань баяр баяслыг авчрах болтугай.