1 Jinataj Jesus kaykunata parlaspaña Nefiman, wajyasqa runasman ima, (mayqenkunachus wajyasqas karqanku, atiyta jap’erqankutaj bautizanankupaj, paykuna chunka iskayniyoj karqanku), payqa makinta oqharispa ashkha runasman qhaparerqa nispa: Kusikuyniyoj kankichis kay chunka iskayniyojta kasuspa. Ñoqaqa kay chunka iskayniyojta ajllarqani qankunata yanapanankupaj, kamachisniykichis kanankupajtaj. Paykunaman atiyta qoni yakuwan bautizasunaykichispaj. yakupi bautizasqa kasqaykichistawan, ñoqaqa ninawan bautizasqaykichis Santo Espirituwan. Chayrayku ñoqata rikuytawan, ñoqa kasqayta yachaytawantaj kusikuyniyoj kankichis ñoqapi creespa, bautizakuspataj.

2 Aswan kusikuyniyoj kanku pikunachus parlasqaykichista creenku imatachus willankichis ñoqata rikuwasqaykichisrayku, ñoqa kasqayta yachasqaykichisraykutaj. Arí, kusikuyniyoj kanku parlasqaykichispi creejkunaqa, mayqenkunachus ancha llamp’u sonqoyoj kasqankurayku bautizakunku, imaraykuchus paykuna visitasqas kanqanku ninawan, Santo Espirituwan ima. Paykunaj juchasninku pampachasqas kanqanku.

3 Arí, kusikuyniyoj kanku wajcha sonqoyojkuna, pikunachus ñoqaman jamojkunaqa, imaraykuchus paykunajta janaj pacha reinoqa.

4 Watejmantataj kusikuyniyoj kanqanku waqajkuna, imaraykuchus paykunaqa jallp’ata chayaqenkupaj jap’enqanku.

5 Kusikuyniyoj kanku llamp’u sonqoyojkunaqa, imaraykuchus paykunaqa jallp’ata chayaqenkupaj jap’enqanku.

6 Kusikuyniyoj kanku cheqank kawsaymanta yarqhachikojkuna, ch’akichikojkunapis; imaraykuchus paykunaqa Santo Espirituwan sajsachisqas kanqanku.

7 Kuskikuyniyoj kanku khuyakojkunapis, imaraykuchus paykunaqa khuyakuyta tarenqanku.

8 Kusikuyniyoj kanku llimphu sonqoyojkunaqa, imaraykuchus paykunaqa Diosta rikonqanku.

9 Kusikuyniyoj kanku allinyachejkunaqa, imaraykuchus paykunaqa Diospa wawasnin kanqanku.

10 Kusikuyniyoj kanku ñoqaj sutiyrayku ñak’arejkunaqa, imaraykuchus janaj pacha reinoqa paykunajta kanqa.

11 Kusikuyniyoj kankichis runakuna ñoqarayku qankunapaj rimajtinku, chejnispa muchuchisojtinku, tukuy imatataj llullakuspa contraykichispi nejtinku ima.

12 Imaraykuchus jatun kusikuyniyoj kankichis kankichis may allinta kusikuspa. Imaraykuchus jatunmin janaj pachapi t’inkaykichisqa. Ajinallatataj qankunamanta ñawpajta jamoj profetastapis, chejnispa sufricherqanku.

13 Cheqamanta, cheqamanta niykichis, Ñoqaqa qankunaman qoykichis kay pachaj kachin kanaykichispaj. Kachichus laq’ayanman chayqa, ¿Imawantaj kay pacha kachichakonqarí? Mana imapja walejñachu; mana chayqa jawaman wijch’unallapajña, runa sarunampajtaj.

14 Cheqamanta, cheqamanta niykichis, Ñoqaqa qankunaman qoykichis kay llajtaj k’anchaynin kanaykichispaj. Orqo patapi ruwasqa llajtaqa, mana pakasqa kayta atinchu.

15 ¿Runas k’anchayta jap’ichinkuchu wich’i ukhuman churaykunankupaj? Manapuni, paykuna k’anchayta jap’ichispaqa pataman churanku, wasipi tukuy kajkunata k’anchanampaj.

16 Ajinallatataj k’anchayniykichisqa k’anchachun kay llajtaj ñawpaqempi. Paykunapis allin ruwasqaykichista rikuspa, janaj pachapi kashaj Tataykichista rikuspa, janaj pachapi kashaj Tataykichista yupaychanankupaj.

17 Ama qankunaqa yuyaychischu leyta chinkachej jamusqayta, chayrí, profetaspa yachachisqankuta. Mana chaykunata chinkachejchu jamuni, astawanqa junt’aj jamuni.

18 Cheqamanta niykichis: mana uj juch’uy letra, ni uj ch’iñi rayallapis leymanta chinkarqachu, astawanqa ñoqapi tukuy junt’akorqaña.

19 Ñoqataj Tataypa leyninta, kamachisqasnintawan qoykichisña ñoqapi creenaykichispaj, juchasniykichismanta Diosman kutirinaykichispaj, ñoqaman chimpamunawaykichispajtaj llakisqa sonqoyoj, k’umuykusqa espirituyoj kaspa. Qhawariychis, kamachisqasnin ñawpaqeykichispi kanku, ley junt’asqaña kashantaj.

20 Chayrayku ñoqaman jamuychis, salvakuychistaj. Cheqamanta niykichis: Manachus kamachisqasniyta junt’ankichis, mayqenkunatachus ñoqa kunan kamachiykichis chayqa, mana yaykunkichischu janaj pacha reinoman.

21 Qankuna uyarerqankichis ñawpa runasman imachus nisqa kasqanta, jinataj ñawpaqeykichispi escribisqa kashan: Ama wañuchinkichu; pillapis wañuchejqa, Diospa juiciompi juchachasqa kanqa.

22 Ñoqataj niykichis: Pillapis hermanompaj phiñakun chayqa, juchachasqa kanqa juiciompaj. Pichus hermanonta wampu nejpis, juiciopi juchachasqa kanqa; chantá pichus hermanonta mana yachaj ninman chayqa: infierno nina lawrayman wijch’usqa kanqa.

23 Chayrayku ñoqaman chimpamuwankichis, mana chayqa ñoqaman chimpamuyta munankichis yuyarikuspa hermanoyki qampaj phiñasqa kasqanta chayqa;

24 Hermanoykiman riy, paywan allinyakuyraj, chaymanta ñoqaman jamuy tukuy sonqowan, qantataj jap’isqayki.

25 Piwanchus phiñanasqa kanki chayqa, paywan usqhayta ñanllataraj rishaspa allinyakuy, ama pay jap’isunampaj, ama carcelman wisq’achisunampaj.

26 Cheqamanta, cheqamanta niyki mana jaqaymantaqa llojsimuwajchu tukuy senineykita paganaykikama. ¿Carcelpi kashaspataj, uj seninellatapis pagayta atiwajchu? Cheqamanta, cheqamanta niyki, Manapuni.

27 Unay tiempopi kajkuna escriberqanku, Ama qhenchachakunkichu.

28 Ñoqatajrí niykichis: Pillapis uj warmita qhawan munapayaspa chayqa, ñapis paywan sonqompi qhenchachakunña.

29 Uyarikuychis, ñoqaqa kamachiykichis ama kaykunata sonqoykichisman yaykojta saqenaykichista.

30 Imaraykuchus asqan allin kanman kaykunata saqenaykichispaj crezniykichista oqharikuspa, ukhu pachaman wijch’usqa kanaykichismantaqa.

31 Jinallatataj ñawpajta escribisqa karqa: Pillapis warminmanta t’aqakojqa, divorcio papelta qopuchun.

32 Cheqamanta, cheqamanta niykichis, Pillapis warminmanta t’aqakun mana qhenchachakojtillan chayqa, warminta adulterio juchaman urmachin; pitajchus chay warmiwan kasarajpis, adulterio juchaman urmallantaj.

33 Escribisqallataj: Ama llullakuspa, qhasimanta Diospa sutimpi jurankichu; Diospa ñawpaqempi imatachus jurasqaykita junt’anki.

34 Ñoqataj cheqatapuni niykichis: amapuni jurankichischu janaj pacharaykupis, imaraykuchus Diospa trononmin.

35 Nitaj mundoraykupis jurankichischu, imaraykuchus mana uj chujchallatapis yurajyachiyta, nitaj yanayachiyta atiwajchu.

36 Amallataj umaykiraykupis jurankichu, imaraykuchus mana uj chujchallatapis yurajyachiyta, nitaj yanayachiyta atiwajchu.

37 Chayrayku parlayniykichisqa kay jina kachun: Arí, arí, nispa; chayrí, Mana, mana, nispa: imaraykuchus, kaymanta astawanqa, sajramin.

38 Jinataj escribisqa kashan, ñawimanta ñawi, kirumanta kiru nisqa kasqanta.

39 Ñoqataj niykichis: Sajra runamanqa ama kutichikuychischu; pillapis paña uyaykipi laq’asojtenqa, lloq’e uyaykitawan kutirichiy.

40 Pichá munan pleiteasuyta p’achaykita qhechusunampaj chayqa, ponchoykitawan saqepuy.

41 Pillapis uj leguata paywan rinaykita munan chayqa, uj jinatawan riy.

42 Pillapis imata mañakusojtenqa qoriy; manukusuyta munajmampis, ama, mana niychu.

43 Escribisqallataj: Runa masiykita munakunki, enemigosniykitataj chejninki.

44 Noqataj niykichis: Enemigosniykichista munakuychis; maldecisojkunaman allinta kutichiychis; chejnisojkunapaj allin kajta ruwapuychis; rimasojkunapaj, muchuchiosojkunapaj ima Diosmanta mañapuychis.

45 Ajinata ruwaspaqa, janaj pachapi kashaj Tataykichispa wawasnin kankichis. Payqa, sajra runaspaj, k’acha runaspajpis intita llojsichimun.

46 Chayrayku imakunachus unay tiempomanta kanku, imakunachus leypi kajkuna, chaykunaqa ñoqapi junt’akunku.

47 Mawk’a kajkunaqa tukukunku, tukuy imataj mosojyasqaña.

48 Chayrayku imaynatachus ñoqawan, janaj pachapi kaj Tataykichiswan cabal kayku, ajinallatataj qankunapis cabal kanaykichista munayman.