1 Jinataj kaykunata parlaytawampacha, watejmanta Jesusqa ashkha runasman kutirikorqa, siminta kicharerqataj nispa: Cheqamanta, cheqamanta niykichis: Ama wajkunata juchachaychischu, qankunapis ama juchachasqas kanaykichispaj.

2 Ima juchawanchá wajkunata juchachankichis, chayllawantaj qankunapis juchachasqas kankichis. Ima medidawanchus wajkunata medinkichis, chayllawantaj medisqas kankichis.

3 ¿Imaraykutaj hermanoykej ñawimpi q’opitata qhawanki, qampa ñawiykipi k’aspitataj mana rikunkichu?

4 Chayrí, ¿imaynatataj hermanoykita niyta atiwaj: Saqeway ñawiykimanta q’opitata orqhojta niwajchu, qampa ñawiykipitaj k’aspi kashajtin.

5 ¡Puraj uya! Qampa ñawiykimantaraj k’aspita ñawpajta orqhokuy. Chaymantataj sut’inta rikuspa, hermanoykej ñawinmanta q’opitata orqhonki.

6 Ama Diospaj ajllasqa kajta alqosman qoychischu. Nitaj khuchismampis perlasniykichista wijch’uychischu; pajtataj chakisninkuwan sarurankumana, kutirimuspataj janch’usunkichisman.

7 Mañakuychis, qosqaykichistaj; mask’aychis, tarinkichistaj; punkuta takaychis, kicharisonqachistaj.

8 Imaraykuchus, mañakojqa jap’in; mask’ajpis tarin; punkuta takajtapis kicharinku.

9 ¿Pi runataj qankunamanta kanman, wawan t’antata mañakojtin rumita qojrí?

10 ¿Challwata mañakojtimpis, kataritachu qonman?

11 Sichus qankuna sajra runas kaspa, allin imasta w awasniykichisman qoyta yachankichis chayqa, ¿Imaraykutaj mana janaj pachapi kashaj Tataykichis aswan allin imastaraj qonmanchu, paymanta mañakojkunaman?

12 Chayrayku imatachus mañankichis runas qankunapaj ruwanankuta chayqa; ajinallatataj qankunapis paykunapaj ruwaychis; imaraykuchus kayta leyqa kamachin, profetaspis.

13 K’ullku punkunejta yaykuychis. Imaraykuchus anchomin punkoqa, jatuntaj chinkayman pusaj ñampis; chaynejta yaykojkunarí ashkhas kanku.

14 Imaraykuchus, punkoqa k’ullkumin; k’ullkullataj kawsayman pusaj ñampis. Pisistaj kanku chayta tarejkunaqa.

15 Llulla profetasmanta allinta qhawakuychis; paykunaqa jamusunkichis ovejas jina p’achallisqas; ukhunkupitaj suwa atojkuna kanku.

16 Ruwasqasninkunejta paykunata rejsinkichis. ¿Khishkasmantachu uvasta pallanku; chayrí, khishka qhorasmantachus higostapis pallanku?

17 Ajinata, allin sach’aqa, sumaj poqoykunata qon; mana walej sach’ataj, manallataj allin poqoykunatachu qon.

18 Sumaj sach’aqa, mana atinchu qoyta mana walej poqoykunata; nillataj mana allin sach’apis, allin poqoykunata qoyta atinchu.

19 Ima sach’allapis, mana walejta poqojtenqa k’utusqa, ninamantaj wijch’usqa.

20 Ajinata, ruwasqasninkunejta paykunata rejsinkichis.

21 Mana tukuy ¡Señor, Señor! niwajchu, janaj pacha reinoman yaykonqa. Mana chayqa, janaj pachapi kashaj Tataypa munayninta ruwajlla yaykonqa.

22 Chay p’unchaypeqa, ashkhas niwanqanku: ¡Señor, Señor! ¿Manachus sutiykipi profetizarqayku, sutiykipitaj supaykunata qharqorqayku; sutillaykipitaj ashkha milagrostapis ruwarqayku?

23 Chaypachataj paykunaman nisaj: Ni jayk’aj qankunata rejserqaykichischu; t’aqakuychis ñoqamanta sajrata ruwajkuna.

24 Pillapis kay nisqasniyta uyarispa ruwan chayqa; sumaj yuyayniyoj, rumi patapi wasichakoj runaman rijch’akun.

25 Para juch’amorqa, mayustaj chayamorqanku, wayrastaj sinchita wayramuspa chay wasiman wajtakamorqanku. Chay wasitaj, mana urmarqachu rumi patapi ruwasqa kasqanrayku.

26 Pichá kay nisqasniyta uyarin, manataj kasunchu chayqa, mana yuyayniyoj, t’iyu patapi wasichakoj runaman rijch’akun.

27 Para jich’akamojtintaj, mayus chayamorqanku; wayrastaj sinchita wayramuspa wasiman wajtakamorqanku, t’iyu patapi ruwasqa kasqanraykutaj waseqa urmachisqa karqa, thunikuynintaj manchay karqa.