1 Chaypachataj escribisqa kajkuna junt’akonqanku: Takiy mana wawallikoj, qanqa mana nacecherqankichu; Takiy, jatunta qhapariytaj, mana nacechej; imaraykuchus sapan warmej wawasnin astawan kanku qosayoj warmej wawasninmanta, nin Señor.

2 Carpaykita jatunyachiy, tiyanaykejpa qhatanasninta aysachunku; ama mich’akuychu, waskhasniykita jatunyachiy, estacasniykita kallpachay.

3 Imaraykuchus qanqa wiñanki paña maki laduman, lloq’e maki ladumantaj, qampa mirayniykitaj gentilesta jap’enqanku chayaqepaj, ch’inyasqa llajtasta junt’achenqankutaj.

4 Ama manchachikuychu, imaraykuchus mana p’enqachisqachu kanki; amataj opayaychu, imaraykuchus mana p’enqachisqachu kanki. Imaraykuchus qonqanki sipas kaspa p’enqayniykita, manataj yuyarikunkichu sipas kaspa sajrapi qhawasqa kasqaykita; manañataj yuyarikunkichu mana qosayoj kaspa sajrapi qhawasqa kasqaykita.

5 Imaraykuchus ruwajniyki, qosayki, Angelespa Señornin sutiyoj; Kacharichejniyki, Israelpa Ajllasqan, tukuy kay pachaj Diosnin sutichasqa kanqa.

6 Imaraykuchus Señor wajyasorqa saqesqa, espiritupi phutiyniyoj warmi jinata, qhesachasqa kashajtiykitaj sipas warmi jinata, Diosniyki nin.

7 Pisi tiempopaj saqerqayki, chaywampis jatun khuyaykunawan tantachisqayki.

8 Tumpata phiñakuspa, uyayta pakarqani qanmanta, chaywampis wiñay k’acha kaywan khuyasqayki, Señor Kacharichejniyki nin jinata.

9 Kayqa Noej yakusnin jina ñoqapaj kanku, imaynatachus juramentowan nerqani manapuni Noej yakusnin kay pachata ujtawan p’ampanankuta, kikillantataj juramentowan nini mana qankunawan phiñakunayta.

10 Imaraykuchus jatuchas orqos chinkarenqanku, juch’uy orqostaj qhechusqas kanqanku, chaywampis khuyayneyqa mana qanmanta chinkarenqachu, nitaj llajtaywan tratochasqay qhechusqachu kanqa. Chayta nin qampaj khuyakuyniyoj Señorniyki.

11 ¡O qan phutiyniyoj, wayrawan kayman jaqayman apaykachasqa kaj, mana sonqochasqataj! Ñoqa cimientoykita sayarichisaj allin coloreswan, cimiento rumisniykitataj churasaj k’acha rumiswan.

12 Ventanasniykita ruwasaj k’acha rumismanta, punkusniykichistataj ruwasaj k’acha rumismanta. Tukuy kantusniykitataj ruwasaj qanta gustasoj rumismanta.

13 Tukuy wawasniykitaj Señormanta yachachisqa kanqanku; may allin sonqo tiyayniyoj kanqanku wawasniyki.

14 Wakichisqa kanki allin ruwaykunapi; karupi kanki presochasqa kaymanta, imaraykuchus mana manchachikunkichu, manchachiymanta karupi kanki, chay mana qanman chimpasunanrayku.

15 Qhawariy, cheqamanta tantakonqanku contraykita, mana ñoqa wajyasqayraykutajchu; pipis qampa contraykita tantakunman qanrayku urmanqa.

16 Qhawariy, ñoqa brasasta ninapi phukoj herrerota, pichus ruwanampaj herramientasta ruwan, payta ruwani; ruwanitaj tukuchejta tukuchuinampaj.

17 Mana ima qampa contraykipaj maqanapis jatunyanqachu; jinataj tukuy qampa contraykipaj juzgaj qallutapis qanqa juchachanki. Kayqa Señorpa kamachisnimpa chayaqenku, allinta ruwasqankutaj ñoqamanta jamun, Señor nin jinata.