1 Jinataj maypachachus Jesus kaykunata parlarqa, chaypacha ajllasqasninman parlarqa ujninmanta ujninman nispa: ¿Imatataj ruwapusunaykichista munankichis Tatayman wicharisqaytawan?

2 Isq’on kajkunataj kuticherqanku nispa: Ñoqayku munayku unaytaña kawsaspa, wañoj jinaña kaspa, yachachiyta tukuspañataj, mayqempajchus ajllawarqayku, chayta ruwaspaña reinoykiman jamuyta munayku.

3 Paykunamantaj nerqa: Kusikuyniyoj kankichis kayta ruwapusunayta munasqaykichisrayku, chayrayku qanchis chunku iskayniyoj watayoj kaspa reinoyman jamuwankichis, ñoqawantaj samarikunkichis.

4 Paykunaman parlaytawan kinsa kajkunaman kutirikorqa, nerqataj: ¿Imatataj ruwapusunaykichista munankichis Tataman wicharisqaytawan?

5 Paykunataj sonqosninkupi phutikorqanku, munasqankuta payman niyta mana atisqankurayku.

6 Paytaj paykunaman nerqa: Yuyayniykichista yachaniña, munankichistaj imatachus munakusqay Juan munarqa, pichus ñoqawan karqa yachachishajtiy, manaraj judios chakatawashajtinku.

7 Chayrayku astawan kusikuyniyoj kankichis, imaraykuchus qankuna mana jayk’ajpis wañuyta rikunkichischu. Astawanqa tukuy Tataj runaspa wawasninkupaj ruwanasninta rikunaykichispaj kawsankichis, tukuy ima junt’akunankama, Tataj munayninman jina. Chaypachataj qhapaj k’anchayniypi, janaj pachaj atiyninkunawan jamusaj.

8 Qankunataj ni jayk’ajpis wañuy nanaykunata ñak’arinkichischu; astawanqa qhapaj k’anchayniypi jamojtiy, uj ñawi ch’ipiypi qankuna uj jinaman tukunkichis, wañoj runamanta mana wañoj runaman. Chaypacha kusikuyniyoj kankichis Tataypa reinompi.

9 Qankunataj aychapi kawsaspa nanaykunata mana sientenkichischu. Phutiyniykichistaj mana kanqachu, kay pachaj juchasninraykulla phutikuwajchis. Tukuy kaykunata ruwasaj munasqaykichisrayku, imaraykuchus kay pacha sayashajtin qankuna munankichis runasta ñoqaman pusayta.

10 Chayrayku qankuna sonqo junt’asqas kankichis; qankunataj Tataypa reinompi tiyakunkichis. Arí, sonqo junt’asqa kankichis, imaynatachus Tata junt’asqa sonqota qowan, kikillantaj. Qankunapis ñoqa jina kankichis, ñoqataj Tata jinallataj kani; Tataj ñoqawan ujlla kayku.

11 Santo Espiritoqa Tatamanta, ñoqamantawan willan. Tatataj runaspa wawasninkuman Santo Espirituta qon, ñoqarayku.

12 Jesus kaykunata niytawan, sapa ujta dedonwan llankharqa, jinapis mana kinsa quedakojkunata llankharqachu. Chaypachataj pay riporqa.

13 Janaj pachataj kicharikorqa. Paykunataj janaj pachaman oqharisqas karqanku, mana parlanapaj kajkunata rikorqanku, uyarerqankutaj.

14 Jark’sqataj karqanku chayta willanankumanta; manataj atiyniyojchu karqanku parlanankupaj, imatachus rikorqanku, uyarerqankutaj, chayta.

15 Aychapichus manachus kasqankuta mana yacharqankuchu; imaraykuchus waj jinaman kutichisqa yacharqankuchus; imaraykuchus waj jinaman kutichisqa kasqankuta yuyarqanku, aychayoj cuerpomanta mana wañojman tukusqankuta yuyarqanku Diospa ruwayninta rikunankupaj.

16 Chaywampis watejmanta kay pachapi yachacherqanku; chaywampis mana yachacherqankuchu imatachus rikorqanku, uyarerqankutaj, imaraykuchus janaj pachapi kamachisqa karqanku chayta mana willanankupaj.

17 Chaywampis wañoj cuerpoyoj kasqankutachus, mana wañoj cuerpoyoj kasqankutachus waj jinaman kutichisqas kasqanku p’unchaypi, chayta mana yachanichu.

18 Chaywampis escribisqasmanta kayta yachani, paykuna kay jallp’a patapi purerqanku tukuy runasta yachachispa, tukuy yachachisqasninkupi creejkunata iglesiaman juntuchaspataj. Creejkunatataj bautizarqanku, tukuy bautizachiskojkunataj Santo Espirituta jap’erqanku.

19 Mana iglesiamanta kajkunataj paykunata carcelman churarqanku. Carcelestaj mana presochayta aterqankuchus, imaraykuchus carceles khuskanmanta partikorqanku.

20 Jallp’api t’oqoman wijch’usqa karqanku, chaywampis jallp’ata k’amerqanku Diospa palabranwan, atiyninraykutaj kacharisqa karqanku kay jallp’aj ukhu t’oqonmanta llojsinankupaj. Chayrayku mana aswan ukhu t’oqota allayta aterqankuchus paykunata jap’inankupaj.

21 Kinsa kutitaj hornoman wijch’usqa karqanku, manataj ruphasqachus karqanku.

22 Iskay kutitaj phiña animalespa cuevanman wijch’usqa karqanku, paykunataj phiña animaleswan pujllarqanku imaynatachus juch’uy ovejaswan pujllanku wawas, mana nanachikuspa.

23 Chaymanta tukuy Nefij llajtampi purerqanku, Cristoj evangelionta yachacherqankutaj tukuy jallp’a patapi kajkunaman. Paykunataj Diosman kutirikorqanku, Cristoj iglesianman tantakuspa. Chayrayku chay mirayninmanta kaj runasqa bendecisqa karqanku Jesuspa parlasqanman jina.

24 Kunantaj ñoqa, Mormon, uj tiempopaj kaykunamanta parlayta tukuni.

25 Ñoqa escribinayasharqani mana wañoj ajllasqasnimpa sutisninkuta, jinapis Señorqa escribejta jark’awarqa, chayrayku mana escribinichu, imaraykuchus paykuna pakasqa kanku kay mundomanta.

26 Ñoqataj paykunata rikorqani, paykunataj sirviwarqanku.

27 Paykunataj gentiles ukhupi kanqanku, gentilestaj mana paykunata rejsenqankuchu.

28 Paykunataj judio runas ukhupi kanqanku, judio runastaj mana paykunata rejsenqankuchu.

29 Señorqa yachayninman jina munajtintaj, paykuna yachachenqanku ch’eqerachisqa Israelpa familiasninta, tukuy llajtasta, ayllusta, parlaykunasta, runastawan. Paykunataj ashkha runasta Jesusman pusanqanku munayninku junt’asqa kanampaj, paykunapi Diospa creechina atiyninrayku.

30 Paykunataj Diospa angelesnin jina kanku. Diosmanta mañakunku Jesuspa sutimpi chayqa, mayqen runawampis rikuchikuyta atinku munasqankumana jina.

31 Chayrayku paykunanejta jatun t’ukuchina ruwaykuna ruwasqas kanqanku, manaraj jatun jamoj p’unchay chayamushajtin, maypachachus tukuy runas Cristoj juzgana tiyanan ñawpaqempi sayarinanku tiyan.

32 Arí, gentiles ukhupipis paykunanejta jatun t’ukuchina ruway ruwasqa kanqa, manaraj chayamushajtin chay juzgana p’unchay.

33 Tukuy Cristoj t’ukuna ruwasqasninmanta willaj escriturasta jap’iwajchis chayqa, yachawajchispuni kaykuna junt’akunankuta Cristoj parlasqanman jina.

34 Ay mana Jesuspa parlasqanta uyarejmanta. Jinataj, ay pimantachus ajllasqa, paymana kachasqa kajkunaj parlasqankuta mana uyarinchu. Imaraykuchus pichus mana Jesuspa parlasqanta jap’inchu, payqa mana Jesusta jap’inchu; chayrayku qhepa p’unchaypi Jesus payta mana jap’enqachu.

35 Paykunapaj aswan allin kanman karqa mana nacekunanku. ¿Yuyankichischu tukuchiyta atinaykichista phiñasqa Diospa justicianta, pitachus runaj chakinwan sarusqa karqa, chaynejta salvacion jamunampaj?

36 Kunantaj uyariychis, willarqaniña Señorpa ajllasqasninmanta, arí, kinsa kajkunamantapis, pikunachus janaj pachaman oqharisqas karqanku. Mana yacharqanichu wañuymanta mana wañuyman llimphuchasqachus manachus kasqankuta.

37 Chaywampis escribisqaymanta, Señorta taporqani. Paytaj willawarqa cuerposninku waj jinayasqa kasqanta, mana chayqa paykuna wañuyta rikunkuman karqa.

38 Chayrayku mana wañuyta rikunankupaj cuerposninku waj jinayachisqas karqanku, nanachiykunasta, phutiykunastawan mana muchunankupaj, astawanqa kay mundoj juchasninraykulla.

39 Kunantaj kay cuerpomanta cambio mana qhepa p’unchaypi cuerpomanta cambio jinachu, chaywampis paykuna waj jinayachisqa karqanku, chayrayku Satanas mana atiyniyojchu karqa, paykunata mana tentanampaj. Paykunataj aychapi llimphuchasqa karqanku, k’anchayniyoj kanankupaj, kay pachaj atiyninkuna mana paykunata jap’inankupajtaj.

40 Kay jina kawsaypi quedakunanku karqa Cristoj juzgana p’unchayninkama. Chay p’unchaypitaj asqan jatun cambiakuyta jap’enqanku, Diospa reinonman yaykonqankutaj, mana aswan chaymanta llojsinankupaj, astawanqa wiñaypaj wiñayninkama Dioswan tiyakunankupaj.