1 Cheqamanta, cheqamanta niykichis waj ovejas tiyapullawantaj mayqenkunachus mana kay jallp’amantachu kanku, manataj Jerusalen jallp’amantachu, manataj maypichus ñoqa yachachiniña, mana chaymantachu.

2 Imaraykuchus paykuna, pikunamantachus parlashani, manaraj parlasqayta uyarinkurajchu, manaraj paykunawan rikuchikunichu.

3 Chaywampis Tata kamachiwarqa paykunaman rinaypaj, paykunataj parlasqayta uyarenqanku. Paykunataj ovejasniywan yupasqas kanqanku, uj t’aqalla kanampaj uj sapan michejniyojtaj; chayrayku paykunaman rini paykunawan rikuchikoj.

4 Kamachiykichistaj kay nisqasniyta escribinaykichispaj ripunaytawan, Jerusalen llajtay, pikunachus rikuwarqanku, ñoqawan karqankutaj yachachishajtiy, sichus paykuna mana Tatamanta mañakunkuchu ñoqaj sutiypi Santo Espiritunejta yachanankupaj qankunamanta, waj familiasmantawan, pikunamantachus mana yachankuchu, chayqa, kay escribisqasniykichis waqaychasqas kanqanku, gentilesman rikhurichisqas kallanqankutaj. Ajinataj gentilespa junt’ayninkunanejta wawasninkoj puchun, pikunachus mana creesqankurayku ch’eqerachisqas kanqanku kay jallp’a patapi, paykuna t’aqaman yaykuchisqas kanankupaj, jinapis ñoqa, Kacharichejninkumanta, yachanankupaj.

5 Chaypachataj kay pachaj tawantin kantusninmanta paykunata tantachisaj. Chaypachataj junt’achisaj Tataj tukuy Israelpa wawasninwan tratochasqanta.

6 Kusikuyniyojtaj kanku gentilesqa ñoqapi creesqankurayku, Santo Espiritupi, paynejtawan, pichus ñoqamanta, Tatamantawan paykunaman willan.

7 Ñoqapi creesqankurayku, Tataqa nin, mana creesqaykichisraykutaj, o Israelpa wawasnin, qhepa p’unchaykunapi gentailes cheqa kajta yachanqanku, tukuy kaykunata yachanankupaj.

8 Chaywampis, Tata nin, ay mana creej gentilesmanta. Imaraykuchus kay jallp’a pataman jamorqanku, llajtaytaj, pikunachus Israelpa wawasnin kanku, paykunata ch’eqeracherqanku. Llajtaytaj, pikunachus Israelpa wawasnin kanku, paykunamanta qharqosqas karqanku, sarusqastaj karqanku.

9 Tataqa gentilesta khuyasqanrayku, Tata llajtayta, mayqenchus Israelpa wawasnin, paykunata juzgasqanraykutaj, cheqamanta, cheqamanta niykichis tukuy kaykuna pasasqankutawan llajtayta, pikunachus Israelpa wawasnin kanku, jasut’icherqani, muchucherqani, wañucherqani, paykunamanta qharqocherqanitaj chejnisqas kanankupaj, asipayasqas, juch’uyyachisqas kanankupajtaj.

10 Ajinatataj Tataqa kamachiwan qankunaman ninayta: Maypachachus gentilesqa evangelioypa contranta juchallikunku, sonqonkoj orqullonwan jatunchakuspa, tukuy runasmanta, tukuy llajtasmanta astawan, maypachachus tukuy impai llullakunku, pantachinku, engañanku, sajrata ruwankutaj, maypachachus tukuy imaymana puraj uya kanku, wañuchej kanku, lantista yupaychanku, qhenchachakunkutaj; junt’a evangelioyta qhesachaspa, chaypachaqa Tata nin, junt’a evangelioyta paykunamanta qhechusaj.

11 Chaypachataj yuyarisaj llajtaywan tratochasqayta, o Israelpa wawasnin. Noqataj evangelioyta paykunaman apachisaj.

12 Qhawachiykichistaj, Israelpa wawasnin, gentiles mana atiyniyoj kasqankuta qankunata atipanankupaj. Ñoqataj yuyasaj qankunawan tratochasqayta, Israelpa wawasnin. Qankunataj yachankichis junt’a evangelioymanta.

13 Chaywampis, Tata nin, sichus gentiles juchamanta kutirikunku, ñoqaman kutirikunkutaj chayqa, paykuna llajtaywan yupasqas kanqanku, o Israelpa wawasnin.

14 Llajtaytataj, mayqenchus Israelpa wawasnin, paykunata mana saqesajchu paykunaman yaykojta, sarojtataj Tata nin.

15 Paykunataj mana ñoqaman kutirikunkuchus, manataj parlasqayta uyarinkuchu chayqa, paykunata saqesaj, arí llajtayta saqesaj, Israelpa wawasninta, paykunaman yaykojta, sarojtataj. Laq’a kachiman rijch’akonqanku, mayqenchus mana imapaj valenñachu, mana chayqa jawaman wijch’usqa kanampaj, llajtaynejta sarusqa kanampajtaj, o Israelpa wawasnin.

16 Cheqamanta, cheqamanta niykichis, ajinata Tataqa kamachiwarqa kay llajtaman qonayta kay jallp’ata chayaqenkupaj.

17 Chantarí profeta Isaisaspa nisqasnin junt’asqas kanqanku, mayqenkunachus nin:

18 Jark’ajniykichiskuna qhaparenqanku; paykunataj kuska takenqanku, imaraykuchus paykunapura ñawimanta ñawiman rikunakonqanku Señor ujtawan Sionta sayarichejtin.

19 Kusikuychis, takiychistaj, Jerusalempa ch’in jallp’asnin; imaraykuchus Señorqa llajtanta sonqochan, Jerusalenta kacharichintaj.

20 tukuy llajtaspa qhawayninkupi Señorpa llimphu makin q’alakun. Tukuy kay pachaj kantusnintaj Diospa salvacionninta qhawanqanku.